BJP-to-appoint-women-corporators-on-all-committees : शहराध्यक्ष दयाशंकर तिवारी यांनी जाहीर केले भाजपचे ‘महिला धोरण’
Nagpur भाजपने नागपूर महापालिकेत एक धाडसी निर्णय घेतला आहे. महापौर, उपमहापौरपदी महिलांची नियुक्ती केल्यानंतर अतिशय महत्त्वाच्या समजल्या जाणाऱ्या स्थायी समिती, परिवहन समिती, अग्निशमन समितीसह एकाही समितीत एकाही पुरुष नगरसेवकांना एंट्री दिली जाणार नाही. या सर्व समित्यांवर फक्त महिला आणि महिलाच नगरसेविकांची नियुक्ती केली जाणार आहे.
एवढेच नव्हे तर मिनी महापौर म्हणून ओळखल्या जाणाऱ्या झोन समितीच्या सभापतीसुद्धा महिला नगरसेविकांची नियुक्ती केली जाणार आहे. भाजपचे शहर अध्यक्ष दयाशंकर तिवारी यांनी भाजपच्या ‘महिला धोरणाची‘ माहिती आज प्रसार माध्यमांना दिली. यामुळे अनेक प्रस्थापित नगरसेवकांना धक्का बसला आहे. नागपूर महापालिकेच्या एकूण १० विशेष समित्या आहेत. त्यात जलप्रदाय, महिला व बाल कल्याण, अग्निशमन, आरोग्य, मालमत्ता कर, शिक्षण, सामाजिक न्याय आदी समित्यांचा समावेश आहे.
Ayush meeting : शेगावात आयुष विभागाच्या बैठकीत महायुतीची ‘एकजूट’
परिवहन समिती स्वतंत्र आहे. ही समिती शहर बसचे संचालन, नियोजन करते. या समितीचे स्वतंत्र बजेट असते. कर्मचाऱ्यांच्या नियुक्त्या आणि बस खरेदी संदर्भातही समितीच्या सभापतींची महत्त्वाची भूमिका असते. आजवर या समितीवर पुरुष नगरसेवकांचे वर्चस्व होते. मागच्या कार्यकाळात विद्यमान सत्तापक्ष नेते बाल्या बोरकर आणि भाजपचे माजी शहराध्यक्ष बंटी कुकडे यांची आलटून पालटून नियुक्ती करण्यात आली होती.
परिवहन समितीवरून या दोन पदाधिकाऱ्यांमध्ये मोठे वादही उफाळून आले होते. मात्र भाजपच्या महिला धोरणामुळे वादाचे मूळच सरसकट उपटून टाकण्यात आले असल्याचे दिसून येते. महापालिकेची विशेष सभा उद्या मंगळवारी आयोजित करण्यात आली आहे. यात स्थायी समितीच्या १६ सदस्यांची नियुक्ती केली जाणार आहे.
Harshwardhan Sapkal : ‘फडणवीस औरंगजेबाप्रमाणे क्रूर, नथूराम गोडसेप्रमाणे थंड रक्ताचे’
सोबतच विशेष समित्यांचे सदस्यसुद्धा नियुक्त केले जाणार आहे. या नियुक्तीनंतर तत्काळ समिती सभापतींची नावे जाहीर केली जाणार असल्याचे दयाशंकर तिवारी सांगितले.
स्थायी समितीच्या सभापतिपदी शिवानी दाणी यांचे नाव भाजपने निश्चित केले आहे. ही सांविधानिक समिती आहे. १६ सदस्यांची नियुक्ती झाल्यानंतर गॅझेटमध्ये नावे प्रकाशित केले जातात. त्यानंतर १६ सदस्यांमधून निवडणुकीने सभापतींची निवड केली जाते. महिला दिनाच्या दिवशी (ता.८मार्च) शिवानी दाणी यांचे नाव जाहीर केले जाणार असल्याचे कळते.
