iran-israel-war-impact-india-commercial-gas-supply-stopped-maharashtra : गॅस पुरवठ्यावर परिणाम, व्यावसायिक सिलेंडर वितरण तात्पुरते थांबवण्याचे आदेश
Pune : पश्चिम आशियात सुरू असलेल्या युद्धजन्य परिस्थितीचे परिणाम आता भारतातही जाणवू लागले असून इराण, अमेरिका आणि इस्रायल यांच्यात सुरू असलेल्या संघर्षाचा थेट परिणाम ऊर्जा पुरवठ्यावर होत असल्याचे चित्र समोर आले आहे. युद्धाला सात दिवस पूर्ण झाले असून दोन्ही बाजूंनी हल्ले सुरू असल्याने मध्यपूर्वेतील परिस्थिती अत्यंत तणावपूर्ण बनली आहे. या संघर्षात इराणमध्ये मोठ्या प्रमाणावर जीवितहानी झाली असून आतापर्यंत १४०० हून अधिक लोकांचा मृत्यू झाल्याची माहिती आंतरराष्ट्रीय माध्यमांमधून समोर आली आहे.
जगातील प्रमुख तेल उत्पादक देशांपैकी एक असलेल्या इराण मधील परिस्थिती गंभीर बनल्यास जागतिक पुरवठा साखळी विस्कळीत होण्याची भीती व्यक्त केली जात आहे. त्यामुळे कच्च्या तेलाच्या किमतीत वाढ होण्याची शक्यता असून त्याचा परिणाम विविध देशांच्या ऊर्जा व्यवस्थेवर होऊ लागला आहे. याच पार्श्वभूमीवर भारतातही काही ठिकाणी गॅस पुरवठ्यावर परिणाम झाल्याचे दिसून येत आहे.
महाराष्ट्रात व्यावसायिक वापरासाठी दिल्या जाणाऱ्या गॅस सिलेंडरच्या पुरवठ्यावर तात्पुरता परिणाम झाल्याचे समोर आले आहे. पुणे जिल्ह्यातील काही औद्योगिक केंद्रांमध्ये व्यावसायिक गॅस सिलेंडरचे वितरण थांबवण्याचा निर्णय तेल कंपन्यांनी घेतला आहे. घरगुती वापरासाठीचा गॅस पुरवठा सुरळीत राहावा यासाठी हा निर्णय घेण्यात आल्याची माहिती संबंधित सूत्रांकडून देण्यात आली आहे.
पुणे जिल्ह्यातील शिक्रापूर येथील भारत पेट्रोलियमच्या प्लांटमधून तसेच चाकणमधील हिंदुस्तान पेट्रोलियमच्या केंद्रातून व्यावसायिक गॅस सिलेंडरचे वितरण सध्या थांबवण्यात आले आहे. या संदर्भात डीलर्सना संदेश पाठवून पुढील सूचना मिळेपर्यंत व्यावसायिक सिलेंडर उचलण्यासाठी वाहने पाठवू नयेत, असे स्पष्ट निर्देश देण्यात आले आहेत. परिस्थिती स्थिर झाल्यानंतरच पुन्हा पुरवठा सुरू केला जाईल, असेही या संदेशात नमूद करण्यात आले आहे.
व्यावसायिक वापराचे गॅस सिलेंडर प्रामुख्याने हॉटेल्स, कॅफे, धाबे, केटरिंग सेवा, रेस्टॉरंट्स तसेच बेकरी आणि मिठाईच्या दुकानांमध्ये वापरले जातात. याशिवाय रुग्णालये, कार्यालयीन कँटीन तसेच काही लघुउद्योगांमध्येही या सिलेंडरचा मोठ्या प्रमाणावर वापर केला जातो. त्यामुळे पुरवठा तात्पुरता बंद झाल्यास काही व्यावसायिक क्षेत्रांवर त्याचा परिणाम होण्याची शक्यता व्यक्त केली जात आहे.
दरम्यान मध्यपूर्वेतील संघर्षाची पार्श्वभूमीही गंभीर मानली जात आहे. इस्रायल आणि इराण यांच्यातील तणाव मागील काही महिन्यांपासून वाढत होता. इराणच्या अण्वस्त्र कार्यक्रम आणि क्षेपणास्त्र क्षमतेच्या विस्ताराबाबत इस्रायलने अनेकदा इशारे दिले होते. मात्र इराणने आपला अणुकार्यक्रम आणि लष्करी क्षमता वाढवण्याची प्रक्रिया सुरूच ठेवल्याचा आरोप करण्यात आला. परिस्थिती नियंत्रणाबाहेर जात असल्याचे लक्षात आल्यानंतर इस्रायल आणि United States यांनी इराणची राजधानी तेहरानवर हल्ले केल्याची माहिती समोर आली असून त्यामुळे संपूर्ण मध्यपूर्वेत पुन्हा एकदा तणाव वाढला आहे.
Sudhir Mungantiwar : स्वातंत्र्यवीर विनायक दामोदर सावरकरांना ‘भारतरत्न’ द्या !
या पार्श्वभूमीवर जागतिक ऊर्जा बाजारात अस्थिरता निर्माण होण्याची शक्यता व्यक्त केली जात असून भारतासह अनेक देश परिस्थितीवर बारकाईने लक्ष ठेवून आहेत. महाराष्ट्रात व्यावसायिक गॅस पुरवठ्यावर घेतलेला निर्णय हा तात्पुरता असल्याचे सांगितले जात असले तरी युद्ध दीर्घकाळ चालल्यास त्याचे व्यापक आर्थिक परिणाम दिसू शकतात, अशीही शक्यता तज्ज्ञांकडून व्यक्त करण्यात येत आहे.
