sushma-andhare-allegations-rupali-chakankar-anun-malik-me-too-soham-chakankar-marathi-news : सोहम चाकणकरला चित्रपटात संधी, आर्थिक व्यवहारांची चौकशीची मागणी
Mumbai: भोंदूबाबा अशोक खरात प्रकरणाच्या तपासादरम्यान राजकीय वर्तुळात नवे वाद निर्माण झाले असून ठाकरे गटाच्या नेत्या सुषमा अंधारे यांनी पत्रकार परिषदेत गंभीर आरोपांची मालिका केली आहे. एसआयटी प्रमुख तेजस्वी सातपुते यांची भेट घेतल्यानंतर अंधारे यांनी माध्यमांसमोर येत विविध राजकीय नेते आणि अधिकाऱ्यांचे अशोक खरातसोबतचे फोटो सादर केले, तसेच रुपाली चाकणकर यांच्यावर थेट आरोप केले.
सुषमा अंधारे यांनी सांगितले की, ‘मी टू’ चळवळीच्या काळात गायक आणि दिग्दर्शक अनु मलिक यांच्याविरोधात महिलांनी तक्रारी केल्या होत्या. त्या वेळी रुपाली चाकणकर यांनी अनु मलिक यांना क्लीन चिट दिली होती. याच पार्श्वभूमीवर सोहम चाकणकर याला अनु मलिक यांच्या चित्रपटात काम मिळाले, असा आरोप अंधारे यांनी केला. सोहम चाकणकर हा रुपाली चाकणकर यांचा मुलगा असल्याचेही त्यांनी नमूद केले.
CM on zirwal viral video : “सत्यता तपासूनच निर्णय” देवेंद्र फडणवीसांची भूमिका
यावेळी अंधारे यांनी अशोक खरातसोबत विविध राजकीय नेत्यांचे फोटोही दाखवले. त्यामध्ये दीपक केसरकर, रुपाली चाकणकर, अमित शाह, अतुल सावे आणि हेमंत गोडसे यांचा समावेश असल्याचे त्यांनी सांगितले. या सर्व संबंधांमुळे प्रकरण अधिक गंभीर असल्याचा दावा त्यांनी केला.
तसेच, अंधारे यांनी दीपक केसरकर आणि रुपाली चाकणकर यांच्या आर्थिक व्यवहारांबाबतही शंका उपस्थित केली आहे. “मी मुख्यमंत्री महोदयांना भेटणार असून संबंधितांचे फोन रेकॉर्ड आणि आर्थिक खाते तपासावे,” अशी मागणी त्यांनी केली. यासंदर्भात आर्थिक गुन्हे शाखेकडेही जाणार असल्याचे त्यांनी स्पष्ट केले.
कोकणातील मोठ्या प्रकल्पांबाबतही त्यांनी प्रश्न उपस्थित करत साडेचारशे ते पाचशे कोटींच्या प्रकल्पांसाठी एवढी आर्थिक ताकद कुठून येते, असा सवाल त्यांनी केला. या सर्व घडामोडींमुळे अशोक खरात प्रकरणाला राजकीय रंग चढला असून पुढील काही दिवसांत या प्रकरणात आणखी आरोप-प्रत्यारोप वाढण्याची शक्यता व्यक्त केली जात आहे.
दरम्यान, या आरोपांवर संबंधितांकडून अधिकृत प्रतिक्रिया अद्याप समोर आलेली नाही. तपास यंत्रणा या प्रकरणातील सर्व पैलूंची चौकशी करत असून पुढील तपासात अधिक माहिती समोर येण्याची शक्यता आहे.
__
