After a long wait, the Co-Guardian Minister visits Buldhana; speculation over the prolonged absence resurfaces : दीर्घ प्रतीक्षेनंतर सहपालकमंत्र्यांचा जिल्हा दौरा; अनुपस्थितीच्या चर्चांना पुन्हा उधाण
Buldhana राज्याचे वस्त्रोद्योग मंत्री तथा बुलढाणा जिल्ह्याचे सहपालकमंत्री संजय सावकारे यांनी जिगाव धरण प्रकल्पाच्या पाहणीच्या निमित्ताने शुक्रवारी बुलढाणा जिल्ह्याचा दौरा केला. मात्र या दौऱ्यापेक्षा त्यांच्या दीर्घ अनुपस्थितीचीच राजकीय आणि सामाजिक वर्तुळात अधिक चर्चा रंगताना दिसत आहे. अनेक महिन्यांनंतर झालेल्या या भेटीनंतर आता सहपालकमंत्री म्हणून त्यांचा जिल्ह्यातील सहभाग नियमित होणार का, असा प्रश्न उपस्थित केला जात आहे.
जिल्ह्यात नैसर्गिक आपत्ती, अतिवृष्टी, पाणीटंचाई, शेतीचे प्रश्न, विकासकामांचा आढावा, कायदा-सुव्यवस्था तसेच विविध शासकीय योजनांच्या अंमलबजावणीसंदर्भातील महत्त्वाच्या बैठका सातत्याने होत असतात. अशा प्रसंगी सहपालकमंत्र्यांची उपस्थिती अपेक्षित असते. मात्र अनेक महत्त्वाच्या घटनांमध्ये त्यांची अनुपस्थिती जाणवल्याची चर्चा राजकीय वर्तुळात सातत्याने होत आहे. त्यामुळे सहपालकमंत्री पदाच्या कार्यक्षमतेवरही प्रश्न उपस्थित केले जात आहेत.
जिगाव प्रकल्पाच्या पाहणीदरम्यान संजय सावकारे यांनी अधिकाऱ्यांकडून प्रकल्पाचा आढावा घेत कामे गुणवत्तापूर्ण व मुदतीत पूर्ण करण्याच्या सूचना दिल्या. भूसंपादन, पुनर्वसन, कालव्यांची उभारणी आणि सिंचन क्षमतेत वाढ याबाबतही त्यांनी प्रशासनाला आवश्यक निर्देश दिले. मात्र या दौऱ्यानंतर राजकीय चर्चेचा केंद्रबिंदू प्रकल्पापेक्षा त्यांच्या दीर्घ अनुपस्थितीचाच ठरला.
Vanchit Bahujan Aghadi : वंचितच्या नगरसेवकाचे मनपासमोर बेमुदत उपोषण; दहा मागण्यांवर ठाम भूमिका
राजकीय निरीक्षकांच्या मते, जिल्ह्यात पालकमंत्री असतानाच सहपालकमंत्री हे पद समन्वय, पाठपुरावा आणि विकासकामांना गती देण्यासाठी महत्त्वाचे मानले जाते. त्यामुळे जिल्ह्याशी सातत्याने संपर्क ठेवणे, विविध प्रशासकीय बैठकींना उपस्थित राहणे आणि स्थानिक प्रश्नांवर सक्रिय भूमिका घेणे, ही सहपालकमंत्र्यांकडून अपेक्षा असते. याच पार्श्वभूमीवर गेल्या काही महिन्यांत त्यांची उपस्थिती कमी राहिल्याची चर्चा विविध स्तरांतून होत आहे.
दुसरीकडे, त्यांच्या समर्थकांकडून मात्र जिगावसारख्या महत्त्वाच्या सिंचन प्रकल्पाच्या पाहणीसाठी त्यांनी स्वतः उपस्थित राहून प्रशासनाला स्पष्ट सूचना दिल्याचे सकारात्मक पाऊल असल्याचे सांगितले जात आहे. विकासकामांच्या गतीसाठी सहपालकमंत्र्यांनी आता जिल्हा पातळीवरील बैठका आणि दौरे नियमित ठेवावेत, अशी अपेक्षाही व्यक्त होत आहे.
Vanchit Bahujan Aghadi : प्रचार साहित्य हटवा, निवडणूक समितीचे वंचित आघाडीला निर्देश
एकूणच, दीर्घ कालावधीनंतर झालेल्या या दौऱ्यामुळे जिल्ह्याच्या राजकारणात नव्या चर्चांना उधाण आले आहे. सहपालकमंत्री संजय सावकारे यांची ही भेट केवळ औपचारिक दौऱ्यापुरती मर्यादित राहते की, यानंतर जिल्ह्याच्या प्रशासकीय आणि विकासकामांच्या प्रक्रियेत त्यांचा नियमित व सक्रिय सहभाग वाढतो, याकडे आता सर्वांचे लक्ष लागले आहे.
