Questions raised over the contradictory stances of MLAs : आमदारांच्या परस्परविरोधी भूमिकांवर प्रश्न; वर्चस्वाच्या लढाईची चर्चा
Amravati शहराच्या राजकीय वर्तुळात एका सोशल मीडिया पोस्टमुळे सध्या चर्चेला उधाण आले आहे. माजी राज्यमंत्री डॉ. सुनील देशमुख यांनी फेसबुकवर शेअर केलेली पोस्ट व्हायरल होत असून, त्यातील मांडणीमुळे नागरिकांमध्ये विविध चर्चांना सुरुवात झाली आहे.
या पोस्टमध्ये अमरावतीतील दोन विद्यमान आमदारांच्या परस्परविरोधी भूमिकांकडे लक्ष वेधण्यात आले आहे. विधानमंडळात एका आमदाराने पोलिस विभागाच्या कामाचे कौतुक करत अभिनंदन केले, तर दुसऱ्या आमदाराने त्याच विभागावर तीव्र टीका केली. एकाच शहरातील दोन लोकप्रतिनिधींच्या या भिन्न भूमिकांमुळे नागरिकांमध्ये संभ्रमाचे वातावरण निर्माण झाल्याचे पोस्टमध्ये नमूद आहे.
डॉ. देशमुख यांनी या पार्श्वभूमीवर प्रशासनावर नेमका कोणाचा प्रभाव आहे, याबाबत प्रश्न उपस्थित केला आहे. तसेच, या घडामोडी वर्चस्वाच्या राजकारणाचा भाग तर नाहीत ना, अशी शक्यताही व्यक्त केली आहे. नेत्यांमधील श्रेयवाद आणि परस्परविरोधी भूमिका यामुळे सर्वसामान्य नागरिकांवर परिणाम होत असल्याची भावना व्यक्त करत, सध्याच्या राजकीय परिस्थितीवर त्यांनी भाष्य केले आहे.
दरम्यान, ही पोस्ट सोशल मीडियावर मोठ्या प्रमाणात व्हायरल होत असून, अमरावतीच्या राजकीय वर्तुळात विविध तर्क-वितर्कांना उधाण आले आहे.
