ashok-kharat-nashik-court-hearing-police-custody-reasons-sit-probe : डिजिटल पुरावे आणि आर्थिक व्यवहार तपासासाठी कोर्टाचा कठोर निर्णय
Nashik : राज्याला हादरवून सोडणाऱ्या भोंदूबाबा अशोक खरात प्रकरणात आज नाशिक जिल्हा न्यायालयात झालेल्या सुनावणीत आरोपीला दिलासा मिळाला नाही. जामीनासाठी आणि पोलीस कोठडी टाळण्यासाठी बचाव पक्षाकडून जोरदार युक्तिवाद करण्यात आला, मात्र गुन्ह्याचे गांभीर्य आणि तपासातील महत्त्वाचे मुद्दे लक्षात घेत न्यायालयाने खरातला १ एप्रिलपर्यंत म्हणजेच पुढील तीन दिवसांसाठी पोलीस कोठडी सुनावली.
सुनावणीदरम्यान सरकारी पक्षाने आरोपी अशोक खरात हा संपूर्ण प्रकरणाचा सूत्रधार असून तो तपासात सहकार्य करत नसल्याचा ठाम आरोप केला. चौकशीदरम्यान तो उडवाउडवीची उत्तरे देत असल्यामुळे तपासात अडथळे येत असल्याचे न्यायालयासमोर मांडण्यात आले. विशेष तपास पथकाने सादर केलेल्या मुद्द्यांनुसार, या प्रकरणात अजूनही अनेक महत्त्वाचे पुरावे आणि माहिती समोर येणे बाकी असल्याचे स्पष्ट करण्यात आले.
Maharashtra politics : राज्याच्या राजकारणात पुन्हा ‘महाभूकंपा’ची चाहूल !
तपास अधिकाऱ्यांनी सांगितले की, आरोपीचा मोबाईल जप्त करण्यात आला असून त्यातील डेटा फॉरेन्सिक पद्धतीने पुनर्प्राप्त करण्यात येत आहे. या डेटामधून अनेक धागेदोरे समोर येण्याची शक्यता असून त्यासाठी आरोपीची समक्ष उपस्थिती आवश्यक आहे. काही व्यवहारांमध्ये ‘डमी’ नावे वापरण्यात आल्याचा संशय व्यक्त करण्यात आला असून, त्यामागील खरे व्यक्ती शोधण्यासाठी आरोपीची चौकशी महत्त्वाची असल्याचे सांगण्यात आले.
तसेच, महिलांवर अत्याचार करताना आरोपी त्यांना काही खाद्यपदार्थ आणि पेय देत होता, ज्यामुळे त्यांची शारीरिक आणि मानसिक स्थिती बिघडत होती, असा गंभीर मुद्दाही न्यायालयात मांडण्यात आला. या प्रकारामागील नेमके कारण आणि वापरलेले पदार्थ याचा तपास करणे आवश्यक असल्याचे स्पष्ट करण्यात आले. आरोपी याबाबत कोणतीही ठोस माहिती देत नसल्याचेही नमूद करण्यात आले.
Bhujbal on Munde : “मी काही अशोक खरात नाही!” छगन भुजबळांचं मिश्कील उत्तर!
याशिवाय, अशोक खरातने भोंदूगिरीच्या माध्यमातून मोठ्या प्रमाणात मालमत्ता जमा केल्याचा संशय असून ती मालमत्ता कोणाच्या नावावर आहे, तिचा स्रोत काय आहे, तसेच या सर्व प्रकरणात त्याला कोणाची मदत मिळाली का, याचा तपास सुरू असल्याचे सांगण्यात आले. या सर्व बाबींचा सखोल तपास करण्यासाठी अतिरिक्त वेळ आवश्यक असल्यामुळे पोलीस कोठडीची मागणी करण्यात आली.
पीडित महिलेच्या वकिलांनीही आरोपी तपासात सहकार्य करत नसल्याचा मुद्दा उपस्थित करत समाजाच्या दृष्टीने हा गंभीर गुन्हा असल्याचे नमूद केले. अनेक कुटुंबे उद्ध्वस्त झाली असून पीडितांना न्याय मिळण्यासाठी सखोल तपास आवश्यक असल्याचे त्यांनी न्यायालयात सांगितले.
दुसरीकडे, आरोपीच्या वकिलांनी पोलीस कोठडीची गरज नसल्याचा युक्तिवाद करत तपास यंत्रणांकडे आधीपासूनच पुरेसा वेळ असल्याचे सांगितले. मोबाईल डेटा, मालमत्ता आणि इतर मुद्द्यांवर आधीच तपास सुरू असल्याने वाढीव कोठडी देण्याची आवश्यकता नाही, असा दावा करण्यात आला. मात्र न्यायालयाने हा युक्तिवाद फेटाळून लावत तपासाच्या दृष्टीने पोलीस कोठडी आवश्यक असल्याचे नमूद केले.
Unseasonal rain : उद्यापासून राज्यात पुन्हा अवकाळी पावसाचा इशारा
दरम्यान, या प्रकरणात राजकीय पडसाद उमटण्यास सुरुवात झाली असून रुपाली चाकणकर यांना विशेष तपास पथकाकडून समन्स बजावण्यात आल्याची माहिती समोर आली आहे. त्यामुळे या प्रकरणाची व्याप्ती वाढत असून केवळ एका आरोपीपुरते मर्यादित न राहता इतर संबंधित व्यक्तींवरही चौकशीची शक्यता निर्माण झाली आहे.
एकूणच, अशोक खरात प्रकरणात दररोज नवे धागेदोरे समोर येत असून पुढील तीन दिवसांच्या पोलीस कोठडीत आणखी मोठे खुलासे होण्याची शक्यता वर्तवली जात आहे. त्यामुळे या प्रकरणाकडे संपूर्ण राज्याचे लक्ष लागले आहे.
___
