chandrakant-patil-ashok-kharat-case-harshwardhan-sapkal-allegations-maharashtra-politics : अशोक खरात प्रकरणात हर्षवर्धन सपकाळांचा मोठा गौप्यस्फोट
Mumbai : नाशिकमधील भोंदूबाबा अशोक खरात प्रकरणामुळे राज्याच्या राजकारणात खळबळ उडाली असून काँग्रेसचे प्रदेशाध्यक्ष हर्षवर्धन सपकाळ यांनी सत्ताधाऱ्यांवर गंभीर आरोप करत मोठा गौप्यस्फोट केला आहे. सरकारने या प्रकरणात प्रामाणिकपणे कारवाई केली तर मंत्रिमंडळातील एक डझन मंत्री आणि दोन डझन अधिकारी तुरुंगात जाऊ शकतात, असा दावा त्यांनी केला आहे.
सपकाळ यांनी आपल्या वक्तव्यात म्हटले की, मंत्री चंद्रकांत पाटील यांचे अशोक खरातशी निकटचे संबंध होते आणि मुख्यमंत्री होण्याच्या इच्छेसाठी त्यांनी या भोंदूबाबाकडून अघोरी पूजा करून घेतल्याची माहिती समोर येत आहे. या आरोपामुळे राजकीय वर्तुळात मोठी खळबळ उडाली आहे.
याचबरोबर त्यांनी मुख्यमंत्री देवेंद्र फडणवीस यांच्यावरही निशाणा साधला. अशोक खरातच्या अघोरी कारवायांची माहिती फडणवीस यांना सहा महिन्यांपासून होती, मात्र त्यांच्या आसपासच्या लोकांचे आणि मंत्रिमंडळातील सहकाऱ्यांचे खरातशी संबंध असल्याने कोणतीही ठोस कारवाई करण्यात आली नाही, असा आरोप सपकाळ यांनी केला.
सपकाळ यांनी पुढे दावा केला की, २०१८ साली फडणवीस सरकारने अशोक खरातच्या ईशानेश्वर मंदिराला सुमारे दीड कोटी रुपयांचा निधी दिला होता. तसेच त्या काळात मुख्यमंत्री कार्यालयात कार्यरत असलेले आणि सध्या म्हाडामध्ये कार्यरत असलेले मिलिंद बोरीकर यांचेही खरातशी जवळचे संबंध असल्याचे त्यांनी नमूद केले.
Sudhir Mungantiwar: चंद्रपूरच्या विकासाचा बुलंद आवाज: विधानसभेत मुनगंटीवारांचा ‘परिणामकारक’ लढा
केंद्रीय गृहमंत्री अमित शाह यांचेही अशोक खरातसोबतचे फोटो समोर आल्याचा दावा सपकाळ यांनी केला. त्यामुळे या प्रकरणाची व्याप्ती केवळ राज्यापुरती मर्यादित नसून राष्ट्रीय पातळीवरही परिणाम होऊ शकतो, असे संकेत त्यांनी दिले.
दरम्यान, अशोक खरातला अलीकडेच नाशिक सत्र न्यायालयात हजर करण्यात आले होते. सरकारी वकिलांनी सुनावणीदरम्यान त्याच्याकडून नरबळी दिल्याचा संशय व्यक्त केला असून पुढील तपासासाठी त्याला पोलीस कोठडी सुनावण्यात आली आहे.
सपकाळ यांनी आणखी एक गंभीर आरोप करत म्हटले की, सत्ताधारी गटातील काही सहकाऱ्यांनीच देवेंद्र फडणवीस यांचे मुख्यमंत्रीपद घालवण्यासाठी अशोक खरातकडून तंत्र-मंत्र आणि अघोरी पूजांचा वापर केला. याच पार्श्वभूमीवर उशिरा का होईना, फडणवीस यांनी खरातविरोधात कारवाई सुरू केली, असा दावा त्यांनी केला.
या सर्व आरोपांमुळे महाराष्ट्राच्या राजकारणात नवे वादळ निर्माण झाले असून अशोक खरात प्रकरणाचा तपास जसजसा पुढे जात आहे, तसतसे नवे दावे, आरोप आणि धक्कादायक माहिती समोर येत आहे. या प्रकरणात सत्य काय आहे, हे तपासाअंती स्पष्ट होणार असले तरी सध्या तरी राजकीय वातावरण तापलेले दिसत आहे.
_
