congress-worker-training-camp-buldhana-harshwardhan-sapkal : प्रदेशाध्यक्षांचा संघटन बांधणीचा उपक्रम; स्थानिक कार्यकर्त्यांकडून प्रशिक्षणाची मागणी
Buldhana राज्यातील पक्ष संघटना मजबूत करण्यासाठी आणि कार्यकर्त्यांमध्ये नवचैतन्य फुंकण्यासाठी काँग्रेसने आता ‘कार्यकर्ता प्रशिक्षण’ शिबिरांचा नवा प्रयोग हाती घेतला आहे. प्रदेशाध्यक्ष हर्षवर्धन सपकाळ यांनी दोन दिवसांपूर्वी चिपळूण येथे अशाच प्रकारचे एक भव्य प्रशिक्षण शिबिर घेऊन संघटनेला नवसंजीवनी देण्याचा प्रयत्न केला. या शिबिरात राज्यातील वरिष्ठ नेत्यांनी उपस्थित राहून कार्यकर्त्यांना काँग्रेसची विचारधारा, पक्षाचा इतिहास आणि आगामी आव्हाने यावर सखोल मार्गदर्शन केले. मात्र, या प्रयोगाची चर्चा आता बुलढाणा जिल्ह्यातही रंगू लागली असून, जिल्ह्यात पक्ष टिकवण्यासाठी अशाच शिबिराची गरज कार्यकर्त्यांकडून व्यक्त केली जात आहे.
सध्या राज्यातील अनेक जिल्ह्यांत काँग्रेससमोर मोठे संघटनात्मक आव्हान उभे राहिले असून कार्यकर्त्यांची गळती थांबवणे हे नेतृत्वासमोरचे मुख्य काम आहे. विशेष म्हणजे, खुद्द प्रदेशाध्यक्षांच्या मूळ जिल्ह्यातच गेल्या वर्षभरात राजकीय समीकरणे वेगाने बदलली आहेत. मुख्यमंत्री एकनाथ शिंदे यांच्या नेतृत्वाखालील शिवसेनेकडून काँग्रेसला सातत्याने राजकीय धक्के मिळत असल्याची चर्चा राजकीय वर्तुळात सुरू आहे.
Nitin gadkari : “मैं डंडा लेके बैठा हूँ, मुझे मैनेज करने वाला पैदा नहीं हुआ”
या पार्श्वभूमीवर केवळ वैचारिक शिबिरे घेऊन जमिनीवरील राजकीय परिस्थिती बदलणार का, असा प्रश्न राजकीय निरीक्षकांकडून विचारला जात आहे. तरीही, कार्यकर्त्यांना पक्षाच्या विचारधारेचे बाळकडू देऊन निष्ठावान फळी निर्माण करण्याचा हा प्रयत्न महत्त्वाचा मानला जात आहे.
बुलढाणा जिल्ह्यातही सध्या काँग्रेसच्या जिल्हा कार्यकारिणीत फेरबदल होणार असल्याची दाट शक्यता आहे. जिल्ह्याचा पुढील ‘कॅप्टन’ कोण असणार, यावरून कार्यकर्त्यांमध्ये कमालीची उत्सुकता आहे. त्यातच, स्वपक्षीय निष्ठावंतांना संधी मिळणार की दुसऱ्या पक्षातून आलेल्या नेत्यांवरच पक्ष विसंबून राहणार, असा सवालही काही जुन्या कार्यकर्त्यांकडून उपस्थित केला जात आहे.
या सर्व गोंधळाच्या वातावरणात कार्यकर्त्यांना दिशा देण्यासाठी आणि मरगळ झटकण्यासाठी बुलढाणा जिल्ह्यातही तातडीने प्रशिक्षण शिबिर आयोजित करावे, अशी मागणी जोर धरत आहे. आता प्रदेशाध्यक्ष आपल्या जिल्ह्यात हा प्रयोग कधी राबवतात, याकडे सर्वांचे लक्ष लागले आहे.
