Statement by Sarsanghchalak Dr. Mohan Bhagwat at the Social Harmony Meeting in Jaipur, Rajasthan : सामाजिक सलोखा सभेत सरसंघचालकांचे वक्तव्य; करुणा व सद्भावनेची गरज अधोरेखित
Jaypur – Rajasthan : सद्भावना हा भारताचा स्वभाव आहे. जगातील अनेक समस्या फक्त नियम, तर्क किंवा शक्तीने सुटत नाहीत; त्यासाठी हृदयातील सद्भावना आणि करुणा आवश्यक आहे, असे प्रतिपादन राष्ट्रीय स्वयंसेवक संघाचे सरसंघचालक डॉ. मोहन भागवत यांनी जयपूरमध्ये केले. मालवीय नगर येथील पाथेय कान संस्थानच्या नारद सभागृहात आयोजित सामाजिक सलोखा सभेत ते प्रमुख पाहुणे म्हणून बोलत होते.
डॉ. भागवत म्हणाले की, जगाचा मूलभूत स्वभाव ‘स्वार्थ’ हा आहे. गेली दोन हजार वर्षे जगभरात स्वार्थावर आधारित व्यवस्थांद्वारे समाज आनंदी करण्याचे प्रयत्न सुरू आहेत, मात्र ते वारंवार अपयशी ठरत आहेत. कारण स्वार्थ कधीच सर्वांना समसमान लाभ देऊ शकत नाही. ज्या व्यक्ती किंवा व्यवस्थेकडे सत्ता असते, त्यांचे हित जपण्याकडे सर्व प्रयत्न वळतात आणि त्यातून करुणा, सहभाव, समजूतदारपणा नष्ट होतो. अशा स्वार्थी दृष्टीकोनातून निर्माण होणारे विरोधाभास अखेर सामाजिक तणाव वाढवतात, असे त्यांनी नमूद केले.
Energy infrastructure : संशोधित वीज वितरण क्षेत्र योजनेसाठी महाराष्ट्राला मिळणार दोन हजार ६५५ कोटी !
भारताचा दृष्टिकोन मात्र यापेक्षा भिन्न असल्याचे त्यांनी सांगितले. भारतीय संस्कृतीने नेहमीच सद्भावना, परस्पर सहकार्य, सर्वांच्या कल्याणाची भावना यावर भर दिला आहे. विविधतेतील एकता ही भारताची ओळख आहे आणि हे मूल्य पुढे नेणे आपली जबाबदारी आहे, असे डॉ. भागवत म्हणाले. समाजातील विघटनकारी प्रवृत्तींपेक्षा जोडणाऱ्या प्रवृत्ती अधिक महत्त्वाच्या असून त्या वृद्धिंगत करण्यासाठी प्रत्येकाने प्रयत्नशील राहावे, असे आवाहन त्यांनी केले.
डॉ. भागवत यांनी पुढे सांगितले की परस्परांमध्ये मतभेद असू शकतात. तर्क-वितर्क, चर्चा, वादविवादही होऊ शकतात. परंतु या सर्वांवर मात करणारी गोष्ट म्हणजे सद्भावना. केवळ नियम पाळून किंवा तर्क मांडून समाजात शांतता निर्माण होत नाही. मनाने जोडणे आवश्यक असते. भारताने हे तत्त्व हजारो वर्षे जगले आहे आणि आजही तेच आपल्या समस्यांचे उत्तर आहे, असे त्यांनी स्पष्ट केले.
सामाजिक सलोखा सभेला विविध संस्थांचे पदाधिकारी, स्वयंसेवक आणि नागरिक मोठ्या संख्येने उपस्थित होते. समाजात सकारात्मकता, समरसता आणि परस्पर आदर दृढ करण्यासाठी अशा कार्यक्रमांची आवश्यकता असल्याचेही यावेळी नमूद करण्यात आले.
