Agitation by Uddhav Thackeray Party workers : उद्धव ठाकरे गटाच्या कार्यकर्त्यांचे तीव्र आंदोलन
Amravati राज्याचे शिक्षणमंत्री दादा भुसे यांच्या अमरावती दौऱ्यावेळी शिवसेना (उद्धव बाळासाहेब ठाकरे) गटाच्या कार्यकर्त्यांनी कडाडून निषेध नोंदवत आंदोलन छेडले. जिल्हाधिकारी कार्यालयासमोर सोयाबीन आणि कापसाच्या हमीभावासाठी शेतकऱ्यांनी मोठ्या संख्येने एकत्र येत निदर्शने केली. संतप्त शेतकऱ्यांनी व कार्यकर्त्यांनी दादा भुसे यांच्या गाडीवर सोयाबीन व कापूस फेकून निषेध व्यक्त केला. या आंदोलनामुळे जिल्हाधिकारी कार्यालय परिसरात मोठ्या प्रमाणात तणाव निर्माण झाला होता.
शेतकऱ्यांचे म्हणणे आहे की, राज्य सरकारने हमीभाव जाहीर केला असला तरी प्रत्यक्षात त्याची अंमलबजावणी अत्यंत धीम्या गतीने होत आहे. सोयाबीन आणि कापसाच्या खरेदीचा वेग कमी असून, खरेदी केंद्रांवर शेतकऱ्यांची मोठी गर्दी होत आहे. मात्र, बहुतांश शेतकऱ्यांचे सोयाबीन अद्यापही खरेदी झालेले नाही. आज सोयाबीन खरेदीचा शेवटचा दिवस असूनही अनेक शेतकरी आपल्या मालास विक्रीसाठी वणवण फिरत आहेत.
Kirit Somaiya : अकोल्यात मोठा घोटाळा; बांग्लादेशी-रोहिंग्यांना असे दिले नागरिकत्व !
कापसाच्या बाबतीतही अशीच स्थिती असून शेतकऱ्यांना उत्पादन खर्चही मिळत नाही. बाजारात दर पडल्याने शेतकरी आर्थिक संकटात सापडले आहेत. सरकारकडून जाहीर करण्यात आलेला हमीभाव अनेक ठिकाणी मिळत नसल्याचे आरोप शेतकरी करत आहेत. यामुळे संतप्त झालेल्या शिवसेना (उद्धव बाळासाहेब ठाकरे) गटाच्या कार्यकर्त्यांनी सरकारच्या धोरणांचा निषेध करत आंदोलन उभारले.
शिवसेना (उद्धव बाळासाहेब ठाकरे) गटाच्या पदाधिकाऱ्यांनी राज्य सरकारवर टीका करत ठोस निर्णय न घेतल्यास आंदोलन अधिक तीव्र करण्याचा इशारा दिला आहे. सोयाबीन आणि कापूस उत्पादक शेतकरी सध्या अडचणीत आहेत, मात्र सरकार त्यांच्या समस्या सोडवण्याऐवजी त्याकडे दुर्लक्ष करत आहे, असा आरोप शिवसेना कार्यकर्त्यांनी केला.
“जोपर्यंत शासनाकडून हमीभावावर ठोस निर्णय घेतला जात नाही, तोपर्यंत जिल्हाधिकारी कार्यालयासमोर ठिय्या आंदोलन सुरूच राहील,” असे शिवसेना (उद्धव बाळासाहेब ठाकरे) गटाच्या नेत्यांनी जाहीर केले.
Union Budget : अर्थसंकल्पाच्या प्रती जाळून किसान सभेचा निषेध !
या आंदोलनामुळे पोलीस यंत्रणेला मोठ्या आव्हानाचा सामना करावा लागला. मोठ्या संख्येने शेतकरी आणि कार्यकर्ते एकत्र आल्याने परिसरात गोंधळाचे वातावरण निर्माण झाले. पोलिसांनी बंदोबस्त ठेवत परिस्थिती नियंत्रणात आणण्याचा प्रयत्न केला, मात्र त्यानंतरही शेतकरी आणि कार्यकर्त्यांनी शिक्षणमंत्री दादा भुसे यांच्या वाहनावर सोयाबीन व कापूस फेकत तीव्र संताप व्यक्त केला.
शिवसेनेच्या पदाधिकाऱ्यांनी आंदोलन अधिक तीव्र करण्याचा निर्धार व्यक्त करत, शेतकऱ्यांच्या मागण्या मान्य होईपर्यंत माघार घेणार नसल्याचे स्पष्ट केले आहे. सरकारने लवकर निर्णय न घेतल्यास राज्यभरात मोठे आंदोलन उभारले जाईल, असा इशारा देण्यात आला आहे.
Sudhir Mungantiwar : आमदार सुधीर मुनगंटीवार यांच्या ऐतिहासिक कार्याची पुन्हा होतेय आठवण !
या आंदोलनामुळे जिल्हाधिकारी कार्यालय परिसरात प्रचंड तणाव निर्माण झाला. अनेक कार्यकर्ते आणि शेतकरी कार्यालयाच्या परिसरात बसून सरकारविरोधात घोषणा देत होते. पोलिसांनी परिस्थिती हाताळण्यासाठी कडक बंदोबस्त ठेवला असला तरी आंदोलनकर्त्यांच्या संतापामुळे त्यांची मोठी तारांबळ उडाली.
या आंदोलनामुळे अमरावती जिल्ह्यातील शेतकऱ्यांच्या समस्येला पुन्हा एकदा वाचा फुटली असून, सरकारच्या धोरणांवर प्रश्नचिन्ह उपस्थित झाले आहे. आता सरकार यावर कोणता ठोस निर्णय घेते, याकडे संपूर्ण शेतकरी वर्गाचे लक्ष लागले आहे.
