Leaders of the Shinde faction urge BJP to protect the Mahayuti alliance : जिल्हाध्यक्षांना पत्र लिहून मांडली व्यथा, भाजपच्या भूमिकेकडे लक्ष
Buldhana आगामी स्थानिक स्वराज्य संस्थांच्या निवडणुकांच्या पार्श्वभूमीवर शिवसेनेने भारतीय जनता पक्षाला महायुती कायम ठेवण्याचे आणि हिंदुत्ववादी विचारांच्या अधिष्ठानावर एकत्र लढण्याचे आवाहन केले आहे.याविषयी शिंदे सेनेचे जिल्हाप्रमुख ओमसिंग राजपूत यांनी भाजपचे जिल्हाध्यक्ष विजयराज शिंदे यांना पत्र दिले आहे.याविषयीची माहिती आमदार संजय गायकवाड यांनी पत्रकार परिषदेत दिली.
शिवसेनेतर्फे भाजपला दिलेल्या निवेदनात म्हटले आहे की, “शिवसेना आणि भारतीय जनता पक्षाची युती ही केवळ राजकीय नव्हे, तर हिंदुत्ववादी विचारसरणीवर आधारित नैसर्गिक युती आहे. ही युती श्रद्धेय अटलबिहारी वाजपेयी व हिंदूहृदयसम्राट बाळासाहेब ठाकरे यांनी दृढ केली होती. त्याच युतीचा वारसा आदरणीय लालकृष्ण अडवाणी व प्रमोद महाजन यांनी महाराष्ट्रात यशस्वीरित्या जोपासला.”
Local Body Elections : उलथापालथ झालीच, काकांचा उमेदवार पुतण्याच्या गळाला!
पुढे म्हटले आहे की, स्थानिक स्वराज्य संस्थांच्या निवडणुका जाहीर झाल्या असून या निवडणुकांमध्येही ही युती प्रामाणिकपणे कायम ठेवावी, अशी आमची नम्र विनंती आहे. शिवसेनेचा आणि भाजपचा मतदार हा समान हिंदुत्ववादी विचारांचा आहे; त्यामुळे जर मतांमध्ये फूट पडली तर त्याचा थेट फायदा महाविकास आघाडीला होईल आणि महायुतीचे नुकसान होईल, असे निवेदनात स्पष्ट करण्यात आले आहे.
शिवसेनेने पुढे नमूद केले आहे की, “महायुतीतील कार्यकर्ता हा पक्षाचा पाया आहे. मतभेदांमुळे तो पडला तर त्याला उभं राहण्यासाठी वर्षानुवर्षे लागतात. त्याचे ‘एकदा तरी नगरसेवक, पंचायत समिती सदस्य किंवा जिल्हा परिषद सदस्य व्हावे’ हे स्वप्न चुरगळले जाईल. त्यामुळे कार्यकर्ता वाचवण्यासाठी आणि महाविकास आघाडीला सडेतोड उत्तर देण्यासाठी महायुती भक्कम करणे आवश्यक आहे.”
शेवटी शिवसेनेने भाजपला चर्चेचे आमंत्रण देत, युतीसाठी संवादाचे दरवाजे खुले ठेवले असल्याचेही स्पष्ट केले आहे. भाजपचे जिल्हाध्यक्ष विजयराज शिंदे आणि शिंदे सेनेचे आमदार संजय गायकवाड यांच्यात गत काही दिवसापासून युतीविषयी वक्तव्य येत होते.त्यात शिंदे सेनेने चिखलीचे नगराध्यक्ष पद मागितले होते तर भाजपने ती मागणी नाकारली होती.त्यामुळे जिल्ह्यात महायुतीची शक्यता संपुष्टात आली होती.आता शिंदे सेनेच्या या भूमिकेवर भाजप काय प्रतिक्रिया देते यावर लक्ष लागले आहे.
