cm-devendra-fadnavis-announces-night-landing-possible-at-baramati-airport-ajit-pawar-plane-crash : अजित पवारांच्या अपघातानंतर मोठा निर्णय; अत्याधुनिक तंत्रज्ञान आणि सुरक्षा यंत्रणेचा वापर
Mumbai राज्याच्या अर्थसंकल्पात बारामतीसाठी महत्त्वाची घोषणा करण्यात आली आहे. मुख्यमंत्री देवेंद्र फडणवीस यांनी बारामती विमानतळावर रात्रीच्या वेळेसही विमानांचे उड्डाण आणि लँडिंग शक्य होण्यासाठी अत्याधुनिक फ्लाइट टेक-ऑफ व नेव्हिगेशन प्रणाली उभारण्यात येणार असल्याची घोषणा केली. या निर्णयामुळे बारामती विमानतळाच्या विकासाला नवी चालना मिळणार असल्याचे मानले जात आहे.
बारामती विमानतळाचा विकास हा गेल्या काही काळापासून चर्चेचा विषय ठरला होता. विशेषतः नुकत्याच झालेल्या दुर्दैवी विमान अपघातानंतर या विमानतळाच्या सुरक्षिततेबाबत आणि सुविधांबाबत अनेक प्रश्न उपस्थित झाले होते. त्या घटनेनंतर विमानतळावर अत्याधुनिक तंत्रज्ञान आणि सुरक्षा यंत्रणा उभारण्याची गरज अधोरेखित झाली होती. अजित पवार यांच्या विमान अपघातानंतर विमानतळाच्या सुविधा अधिक सक्षम करण्याबाबत राज्य सरकारने गंभीरपणे विचार सुरू केला होता.
Sudhir Mungantiwar : राज्याच्या सर्वांगीण विकासाचा दूरदृष्टीपूर्ण संकल्प – आ. सुधीर मुनगंटीवार
याच पार्श्वभूमीवर राज्य सरकारने बारामती विमानतळाच्या सर्वांगीण विकासाचा निर्णय घेतला आहे. रात्रीच्या वेळी विमानांची सुरक्षित उड्डाणे आणि लँडिंग होण्यासाठी आवश्यक असलेली आधुनिक उपकरणे, रनवे लायटिंग, तसेच नेव्हिगेशन सिस्टीम बसवली जाणार आहे. या सुविधांमुळे हवामान खराब असताना किंवा रात्रीच्या वेळेसही विमान संचालन अधिक सुरक्षित होईल.
मुख्यमंत्री फडणवीस यांनी अर्थसंकल्पीय भाषणात सांगितले की, राज्यातील प्रादेशिक विमानतळांचे जाळे मजबूत करण्यासाठी सरकार कटिबद्ध आहे. बारामती विमानतळाचा विकास हा केवळ स्थानिक गरजांसाठी नसून संपूर्ण पुणे जिल्ह्याच्या औद्योगिक आणि आर्थिक विकासासाठी महत्त्वाचा ठरणार आहे. बारामती परिसरात औद्योगिक गुंतवणूक वाढत असून, विमानतळाच्या सुविधांमध्ये सुधारणा झाल्यास उद्योग क्षेत्राला मोठा फायदा होईल.
Maharashtra budget 2026 : महिला दिनापूर्वीच महिलांसाठी मोठ्या घोषणा
बारामती आणि आसपासच्या भागात कृषी, उद्योग आणि शिक्षण क्षेत्राचा वेगाने विकास होत आहे. त्यामुळे या भागासाठी आधुनिक विमानतळ सुविधा आवश्यक असल्याचेही मुख्यमंत्री यांनी नमूद केले. रात्री उड्डाणाची सुविधा उपलब्ध झाल्यानंतर व्यापारी आणि औद्योगिक प्रवास सुलभ होणार आहे.
याशिवाय राज्य सरकार बारामती विमानतळावर इतरही पायाभूत सुविधा विकसित करण्याचा विचार करत आहे. यात रनवेची सुधारणा, एअर ट्रॅफिक कंट्रोल प्रणाली अधिक सक्षम करणे, तसेच विमान प्रशिक्षण संस्थांसाठी आवश्यक सुविधा उपलब्ध करून देणे यांचा समावेश असू शकतो.
