MLA Nitesh Rane’s direct warning to Manoj Jarange : आमदार नितेश राणे यांचा थेट मनोज जरांगेंना इशारा
Mumbai : मराठा आरक्षणाच्या मागणीसाठी अंतरवाली सराटीवरून मुंबईकडे मोर्चा घेऊन जाण्याच्या तयारीत असलेले मनोज जरांगे पाटील आणि भाजप नेत्यांमध्ये चांगलीच जुंपली आहे. रविवारी बीडमधील सभेत मनोज जरांगे पाटील यांनी मुख्यमंत्री देवेंद्र फडणवीस यांच्या आईविषयी अपशब्द काढल्याचा आरोप भाजपकडून करण्यात आला. या आरोपानंतर भाजप नेत्यांकडून सोशल मीडियावर टीकेची लाट उसळली आहे.
या वादात भाजपचे आमदार नितेश राणे यांनी सरळ इशाराच दिला. जे रक्ताने मराठा असतात ते कधीच कुणाच्या आईबद्दल अपशब्द वापरत नाहीत. छत्रपती शिवाजी महाराजांनीही आई-बहीणींचा नेहमी आदर केला. मात्र आमच्या देवेंद्र फडणवीस साहेबांच्या आईबद्दल अपशब्द वापरण्याची हिंमत कोणी करत असेल, तर ती वळवळणारी जीभ हातात काढून देण्याचे सामर्थ्य आमच्यासारख्या ९६ कुळी मराठ्यांमध्ये आहे, असा इशारा त्यांनी मनोज जरांगेंना दिला.
Maratha Andolan : आमची आई रक्ताच्या थारोळ्यात पडली तेव्हा तू कुठे होतीस?
दरम्यान, या आरोपांना उत्तर देताना मनोज जरांगे पाटील यांनी आपण देवेंद्र फडणवीस यांच्या आईबद्दल काहीही बोललो नाही, असे स्पष्टीकरण दिले. “मी त्यांच्या आईवर कुठे आणि केव्हा बोललो? मात्र बोलण्याच्या ओघात तसा काही शब्द गेला असेल, तर मी तो माघारी घेतो,” असे ते म्हणाले. त्याचवेळी त्यांनी फडणवीसांवर टीकास्त्र सोडत, “मराठ्यांना आरक्षण द्या. पोलिसांनी आमच्या आई-बहीणींवर लाठीमार केला, त्या रक्ताच्या थारोळ्यात पडल्या होत्या. तुझी आई तुला प्रिय आहे, तशीच आम्हालाही आमची आई प्रिय आहे. तू मराठ्यांना आरक्षण दे, मग आम्ही तुझ्या आईची पूजा करू,” असे विधान केले. या घडामोडीनंतर राज्यातील राजकारण आणखी तापण्याची चिन्हे दिसत आहेत.
