Demand for action under ‘MoCA’ against the accused in the Khamgaon youth assault case : खामगाव युवक मारहाण प्रकरणी आरोपींवर ‘मोका’अंतर्गत कारवाईची मागणी
Malkapur खामगाव येथे मागासवर्गीय युवक रोहन पैठणकर याच्यावर २३ जुलै रोजी रात्री अमानुषपणे झालेल्या मारहाणीच्या घटनेचा निषेध करत ‘समतेचे निळे वादळ’ या सामाजिक संघटनेने मलकापूर येथे जोरदार निदर्शने केली. यावेळी संघटनेच्या वतीने तहसीलदारांना निवेदन सादर करत, आरोपींवर ‘महाराष्ट्र संघटित गुन्हेगारी नियंत्रण कायदा’ (मोकाका) अंतर्गत कठोर कारवाईची मागणी करण्यात आली.
संघटनेचे संस्थापक अध्यक्ष भाई अशांत वानखेडे यांच्या उपस्थितीत, तालुकाध्यक्ष राजेंद्र पवार व शहराध्यक्ष मोहन खराटे यांच्या नेतृत्वात भीमसैनिकांनी तहसील कार्यालयावर मोर्चा काढत तीव्र संताप व्यक्त केला.
Kirit Somaiya : वर्षभरात १० लाख रोहिंग्यांना बनावट जन्म प्रमाणपत्र?
निवेदनात नमूद करण्यात आले की, पोलीस प्रशासनाने जर तांत्रिक त्रुटींच्या माध्यमातून आरोपींना जामिनासाठी मार्ग मोकळा केला, तर हा गुन्हेगारांच्या संरक्षणाचा प्रकार ठरेल. त्यामुळे समाजमन अस्वस्थ असून, कायदा रस्त्यावर उतरवू असा इशाराही यावेळी देण्यात आला.
संघटनेच्या पदाधिकाऱ्यांनी अकोला येथील रुग्णालयात पीडित युवकाची भेट घेतली असून, त्यावेळी रोहनच्या नाकाचे हाड मोडले असून डोळ्याला गंभीर इजा झाल्याचे निदर्शनास आले, अशी माहिती त्यांनी दिली. खामगावमध्ये झालेल्या बंदला ‘समतेचे निळे वादळ’ संघटनेने जाहीर पाठिंबाही दिला आहे.
