satara-akola-shikshan-ghotala-6th-students-check-10th-papers-268-teachers-fake-transfer-scam : सहावीच्या विद्यार्थ्याकडून दहावीचे पेपर तपासले तर २६८ शिक्षकांनी खोट्या कागदपत्रांवर बदली मिळवली
Mumbai : राज्यातील शिक्षण व्यवस्थेची गुणवत्ता आणि पारदर्शकता यावर गंभीर प्रश्नचिन्ह निर्माण करणारे दोन धक्कादायक प्रकार सातारा आणि अकोला जिल्ह्यांत समोर आले आहेत. विद्यार्थ्यांच्या भविष्याशी थेट संबंधित असलेल्या परीक्षापद्धतीत मोठी निष्काळजीपणा दिसून आला असून, दुसरीकडे शिक्षक बदली प्रक्रियेतही मोठ्या प्रमाणात गैरप्रकार झाल्याचे उघड झाले आहे. या घटनांमुळे शिक्षण क्षेत्रातील शिस्त, जबाबदारी आणि विश्वासार्हता यावर प्रश्न उपस्थित होत आहेत.
सातारा जिल्ह्यातील फलटण तालुक्यातील विडणी येथील उत्तरेश्वर हायस्कूल आणि ज्युनिअर कॉलेजमध्ये दहावीच्या विद्यार्थ्यांचे उत्तरपत्रिका सहावीच्या विद्यार्थ्यांकडून तपासून घेतल्याचा धक्कादायक प्रकार समोर आला आहे. या प्रकरणामुळे शिक्षण व्यवस्थेतील शिस्त आणि गुणवत्ता किती खालावली आहे, याचा प्रत्यय आला आहे.
संबंधित शिक्षक वैभव शेंडे यांचे नाव या प्रकरणात पुढे आले असून, शाळा प्रशासनाने मात्र असा कोणताही प्रकार घडला नसल्याचा दावा केला आहे. विशेष म्हणजे, हा प्रकार उघड करणाऱ्या तक्रारदारालाच संस्थेकडून कारणे दाखवा नोटीस बजावण्यात आल्याने वाद अधिकच चिघळला आहे. पेपर तपासणारा शिक्षक आणि तक्रारदार या दोघांनाही समान प्रकारची नोटीस देण्यात आल्याने प्रशासनाच्या भूमिकेवरही प्रश्न उपस्थित होत आहेत.
दरम्यान, अकोला जिल्ह्यातील जिल्हा परिषद शिक्षण विभागात आंतरजिल्हा शिक्षक बदली प्रक्रियेत मोठा घोटाळा उघडकीस आला आहे. बदलीमध्ये प्राधान्य मिळवण्यासाठी तब्बल २६८ शिक्षकांनी दिव्यांग, परित्यक्त किंवा अंतराच्या कारणाखाली खोटी कागदपत्रे सादर केल्याचे चौकशीत स्पष्ट झाले आहे. काही शिक्षकांनी स्वतःला दिव्यांग असल्याचे भासवले, तर काहींनी खोट्या घटस्फोटाच्या आधारावर बदली मिळवण्याचा प्रयत्न केला. या प्रकारामुळे शिक्षण विभागाच्या कार्यपद्धतीवर गंभीर प्रश्नचिन्ह निर्माण झाले आहे.
या प्रकरणात प्रभारी गट शिक्षणाधिकारी दिनेश दुतोंडे यांच्यासह चार अधिकाऱ्यांवर निलंबनाची कारवाई करण्यात आली असून, सुमारे ३०० जणांवर कारवाईची शक्यता व्यक्त केली जात आहे. तक्रारीनंतर झालेल्या त्रिस्तरीय चौकशीत अनेक अहवाल त्रुटीपूर्ण असल्याचे समोर आले असून, अपात्र शिक्षकांनाही बदलीचा लाभ मिळाल्याचे स्पष्ट झाले आहे.
Pravin datke : हलबा-कोष्टी आरक्षणाचा तिढा सुटणार? विधिमंडळात पोहोचला ‘तो’ ऐतिहासिक पुरावा!
सातारा आणि अकोल्यातील या दोन्ही घटनांमुळे शिक्षण व्यवस्थेतील ढिसाळपणा आणि नियमांचा होत असलेला गैरवापर उघड झाला आहे. एकीकडे विद्यार्थ्यांच्या शैक्षणिक गुणवत्तेशी तडजोड केली जात असल्याचे दिसत आहे, तर दुसरीकडे शिक्षकांकडूनच नियमांचे उल्लंघन होत असल्याने संपूर्ण व्यवस्थेवरील विश्वास ढासळत असल्याची भावना सर्वसामान्यांत व्यक्त होत आहे. या प्रकरणांची सखोल चौकशी करून दोषींवर कठोर कारवाई करण्याची मागणी जोर धरत आहे.
