Major disciplinary action in Congress; Decision taken as per instructions of state president : शिस्तभंगाबाबत काँग्रेसची कठोर भूमिका स्पष्ट
Mumbai : काँग्रेस पक्षात शिस्तभंगाच्या मुद्द्यावर मोठी कारवाई करत पार्टीने दोन वरिष्ठ पदाधिकाऱ्यांना सहा वर्षांसाठी निलंबित केले आहे. गडचिरोली जिल्ह्यातील काँग्रेस नेते जेसाभाई मोटवानी आणि चंद्रपूर जिल्ह्यातील बल्लारपूर येथील घनशाम मूलचंदानी यांना पक्षाकडून तात्काळ प्रभावाने निलंबित करण्यात आले आहे. या निर्णयाची अधिकृत माहिती महाराष्ट्र प्रदेश काँग्रेस कमिटीचे उपाध्यक्ष (संघटन व प्रशासन) ॲड. गणेश पाटील यांनी प्रसिद्धीपत्रकाद्वारे दिली.
प्रदेशाध्यक्ष हर्षवर्धन सपकाळ यांच्या निर्देशानुसार ही कठोर कारवाई करण्यात आली आहे. दोन्ही नेत्यांविरुद्ध पक्षविरोधी कृती तसेच शिस्तभंगाच्या विविध तक्रारी प्राप्त झाल्या होत्या. त्याची गंभीर दखल घेऊन पक्षाने चौकशी केल्यानंतर निलंबनाचा निर्णय घेतल्याचे सांगण्यात येत आहे. सपकाळ यांनी नुकतेच सर्व जिल्हाध्यक्ष आणि पदाधिकाऱ्यांना शिस्तपालनाबाबत कडक संदेश देत पक्षाच्या मूलभूत तत्त्वांपासून विचलित होणाऱ्यांवर कठोर कारवाई केली जाईल, असा इशारा दिला होता. आजचा निर्णय त्या भूमिकेचे स्पष्ट प्रतिबिंब म्हणून पाहिला जात आहे.
Local Body Elections : पालिका रणधुमाळीत माजी आमदार पुन्हा सक्रिय
जेसाभाई मोटवानी हे गडचिरोलीतील महत्त्वाचे काँग्रेस नेते म्हणून परिचित होते, तर घनशाम मूलचंदानी यांनी बल्लारपूर परिसरात संघटन बळकटीसाठी काम केले होते. दोघांच्या निलंबनामुळे स्थानिक पातळीवर चर्चांना उधाण आले आहे. पक्षातील काही कार्यकर्त्यांनी या निर्णयाचे स्वागत करत काँग्रेसची शिस्त सर्वांसाठी समान असल्याचे मत व्यक्त केले, तर काहींनी या कारवाईमागील कारणांबाबत अधिक स्पष्टता देण्याची मागणी केली.
Local Body Elections : महापालिका निवडणुकीसाठी तिसऱ्या आघाडीचा पर्याय, बैठकांना वेग
या निर्णयानंतर दोन्ही नेत्यांना कोणतेही पक्षपद, जबाबदारी किंवा पक्षाच्या कार्यक्रमांमध्ये सहभागी होता येणार नाही. सहा वर्षांचा कालावधी संपेपर्यंत निलंबन उठवण्यासाठी त्यांना विशेष परवानगीची गरज भासणार आहे. दरम्यान, या कारवाईमुळे बल्लारपूर आणि गडचिरोली जिल्हा काँग्रेसच्या अंतर्गत घडामोडींवर पुढील काही दिवसांत परिणाम होण्याची शक्यता वर्तवली जात आहे. काँग्रेस पक्ष सध्या आगामी निवडणुकांसाठी संघटना शिस्तबद्ध करण्याच्या तयारीत असताना, अशा कडक निर्णयांमुळे पक्षाच्या अंतर्गत शिस्तबद्धतेच्या प्रक्रियेला गती मिळेल, असे राजकीय निरीक्षकांचे मत आहे.
