khamgaon-bjp-bastion-shivsena-shinde-group-growing-influence : आकाश फुंडकरांच्या बालेकिल्ल्यात प्रतापराव जाधव सक्रीय; ‘महायुती’त असतानाही अंतर्गत वर्चस्वासाठी चढाओढ
Khamgao बुलढाणा जिल्ह्यातील खामगाव विधानसभा मतदारसंघ म्हणजे भारतीय जनता पक्षाचा अभेद्य गड. दिवंगत भाऊसाहेब फुंडकर यांच्यानंतर आमदार आकाश फुंडकर यांनी सलग तिसऱ्यांदा (२०१४, २०१९, २०२४) विजय मिळवत या मतदारसंघावर भाजपची पकड घट्ट केली आहे. मात्र, राज्याच्या सत्तेत भागीदार असलेली शिवसेना (एकनाथ शिंदे गट) आता खामगावमध्ये हळूहळू आपले पाय रोवताना दिसत आहे. मित्रपक्षाच्या या ‘गुपचूप’ हालचालींमुळे आगामी स्थानिक स्वराज्य संस्थांच्या निवडणुकांपूर्वी भाजपच्या गोटात अस्वस्थता पसरली असून, नव्या राजकीय समीकरणांची चर्चा रंगली आहे.
खामगावच्या राजकारणात गेल्या काही महिन्यांत केंद्रीय राज्यमंत्री प्रतापराव जाधव यांच्या दौऱ्यांचे प्रमाण वाढले आहे. जाधवांच्या उपस्थितीत होणारे कार्यक्रम आणि त्यात होणारी कार्यकर्त्यांची मोठी गर्दी हे शिंदेसेनेच्या वाढत्या प्रभावाचे निदर्शक मानले जात आहे. भाजपमध्ये संधी न मिळणाऱ्या किंवा नाराज असलेल्या कार्यकर्त्यांना शिंदेसेना आपलेसे करत असल्याचे चित्र आहे. यामुळे ‘मैत्री’च्या नात्यात संघटन विस्ताराचा ‘हातोडा’ चालवला जात असल्याची चर्चा आहे.
खामगावमध्ये गेल्या १२ वर्षांपासून भाजपचे एकहाती वर्चस्व आहे. मात्र, आता चित्र बदलताना दिसत आहे. शिंदेसेना एका बाजूला ‘महायुती’चा धर्म पाळत असल्याची ग्वाही देते, तर दुसरीकडे खामगावमध्ये स्वतःचे स्वतंत्र अस्तित्व निर्माण करण्यासाठी आक्रमकपणे शाखा विस्तार करत आहे. आकाश फुंडकर यांचा जनसंपर्क दांडगा असला तरी, मित्रपक्षाकडून होणारी ‘फोडाफोडी’ किंवा समांतर संघटन भाजपसाठी डोकेदुखी ठरू शकते.
२०२६ च्या सुरुवातीलाच झालेल्या जिल्हा परिषद आणि पंचायत समिती निवडणुकांच्या निकालात भाजपला अनेक ठिकाणी यश मिळाले असले, तरी खामगाव पट्ट्यात शिंदेसेनेने आपली ताकद वाढवल्याचे दिसून आले आहे. या पार्श्वभूमीवर, आगामी काळात होणाऱ्या नगरपालिका निवडणुकीत भाजप आणि शिंदेसेना समोरासमोर येणार की जागावाटपाचा नवा फॉर्म्युला ठरणार, याकडे सर्वांचे लक्ष लागले आहे.
