thackeray-brothers-dispute-over-nominated-corporator-post-bmc-election-raj-uddhav : मुंबई महापालिका निवडणुकीनंतर ठाकरे बंधूंमध्ये मतभेदांच्या चर्चा
Mumbai: मुंबई महानगरपालिका निवडणुकीच्या पार्श्वभूमीवर एकत्र आलेल्या ठाकरे बंधूंमध्ये पुन्हा मतभेद निर्माण झाल्याच्या चर्चा राजकीय वर्तुळात रंगू लागल्या आहेत. महाराष्ट्र नवनिर्माण सेनेचे अध्यक्ष राज ठाकरे यांनी उपमुख्यमंत्री एकनाथ शिंदे यांची घेतलेली भेट आणि त्यानंतर स्वीकृत नगरसेवक पदावरून झालेल्या घडामोडींमुळे या चर्चांना अधिकच उधाण आले आहे.
निवडणुकीआधी एकनाथ शिंदेंवर टीका करणारे राज ठाकरे यांनीच आता शहरातील विविध प्रश्नांबाबत चर्चा करण्यासाठी त्यांची भेट घेतल्याचा दावा केला आहे. या भेटीनंतर शिवसेना उद्धव बाळासाहेब ठाकरे पक्षाकडून स्वीकृत नगरसेवक पदाबाबत सुरू असलेली टाळाटाळ अचानक निर्णायक टप्प्यावर पोहोचल्याचे दिसून येते. पक्षप्रमुख उद्धव ठाकरे यांनी आपल्या कोट्यातील तीन नावांवर शिक्कामोर्तब केल्याची माहिती सूत्रांनी दिली आहे. साईनाथ दुर्गे, माधुरी मांजरेकर आणि कैलास पाठक यांची स्वीकृत नगरसेवक म्हणून निवड निश्चित झाल्याची चर्चा आहे.
महाराष्ट्र नवनिर्माण सेनेचे गटनेते यशवंत किल्लेदार यांनी शिवसेना उद्धव बाळासाहेब ठाकरे पक्षाने त्यांच्या कोट्यातून एक स्वीकृत नगरसेवक पद मनसेला द्यावे, अशी मागणी केली होती. मात्र उद्धव ठाकरे यांनी तीन नावांची अंतिम यादी निश्चित केल्याने मनसेला स्वीकृत पद मिळणार नसल्याच्या चर्चा सुरू झाल्या आहेत. २८ फेब्रुवारी रोजी या नावांची अधिकृत घोषणा होण्याची शक्यता व्यक्त केली जात आहे.
Donald trump : इतर देशांवर १० टक्के, भारतावर १८ टक्के टॅरिफ कायम
दरम्यान, ठाकरे बंधूंमधील विसंवादाच्या चर्चांवर दोन्ही पक्षांच्या नेत्यांनी सावध भूमिका घेतली आहे. मनसेचे नेते संदीप देशपांडे यांनी सामाजिक माध्यमावर केलेल्या पोस्टमध्ये “कोत्या मनाच्या प्रवृत्तींकडून स्वीकृतीची अपेक्षा बाळगू नये,” असे म्हटले होते. त्यावर प्रतिक्रिया देताना शिवसेना उद्धव बाळासाहेब ठाकरे गटाच्या नेत्या किशोरी पेडणेकर यांनी उद्धव ठाकरे आणि राज ठाकरे हे दोघेही स्वतंत्र पक्षप्रमुख असून कोणत्याही चर्चेवर उतावळेपणाने भाष्य करणे योग्य नसल्याचे सांगितले. “काल आदित्य ठाकरे यांच्यासोबत राज ठाकरे होते. त्या बैठकीत काय चर्चा झाली, हे मला किंवा इतरांना माहिती नाही. त्यामुळे अंदाजांवर बोलणे योग्य नाही,” असे त्या म्हणाल्या.
महापालिका निवडणुकीनंतर १८ फेब्रुवारी रोजी राज ठाकरे यांनी मुंबईतील ‘नंदनवन’ या शासकीय निवासस्थानी एकनाथ शिंदे यांची भेट घेतली होती. या भेटीत शहरातील विविध प्रश्नांवर चर्चा झाल्याचे सांगितले जात आहे. निवडणुकीनंतर शिंदे आणि राज ठाकरे यांची ही पहिलीच औपचारिक भेट होती. या भेटीनंतर उद्धव ठाकरे यांनी स्वीकृत नगरसेवकांच्या नावांबाबत घेतलेला निर्णय राजकीय दृष्ट्या महत्त्वाचा मानला जात आहे.
महानगरपालिका निवडणुकीपूर्वी झालेली ठाकरे बंधूंची हातमिळवणी कार्यकर्त्यांमध्ये उत्साह निर्माण करणारी ठरली होती. मात्र स्वीकृत नगरसेवक पदाच्या मुद्द्यावरून दोन्ही पक्षांत सूक्ष्म तणाव निर्माण झाल्याच्या चर्चांनी आता जोर धरला आहे. या वादाचा पुढील राजकीय परिणाम काय होतो आणि ठाकरे बंधूंमधील संबंध कोणत्या टप्प्यावर पोहोचतात, याकडे राज्याच्या राजकारणाचे लक्ष लागले आहे.
