When will the petrochemical complex be built in Nagpur? : मुख्यमंत्री देवेंद्र फडणवीसांचा ड्रीम प्रोजेक्ट
Nagpur विस्तारित बुटिबोरी एमआयडीसीमध्ये पेट्रोकेमिकल कॉम्प्लेक्स होण्याबाबत केंद्र सरकारकडे उद्योग वर्तुळाचे लक्ष लागले आहे. या कामाला गती मिळण्याच्या दिशेने गुरुवारी एक पाऊल पुढे टाकण्यात आले. विधानसभा निवडणुकीच्या प्रचारासाठी दिल्लीत दाखल झालेल्या मुख्यमंत्री देवेंद्र फडणवीस यांनी केंद्रीय पेट्रोलियममंत्री हरदीप सिंह पुरी Hardeep Singh Puri यांच्याशी या प्रकल्पावर चर्चा केली. कोकण किनारपट्टी रिफायनरीवरही दोन्ही नेत्यांमध्ये चर्चा झाली.
या बैठकीनंतर, फडणवीस यांनी एक्सवर पोस्ट करीत या बैठकीत सकारात्मक चर्चा झाल्याचे सांगितले. नागपुरात प्रस्तावित या पेट्रोकेमिकल कॉम्प्लेक्समध्ये विदर्भाचा चेहरा-मोहरा बदलण्याची क्षमता आहे. ४० हजार कोटींपेक्षा जास्त रुपयांची गुंतवणूक असलेला हा प्रकल्प व्यावहारिक असल्याचे केंद्र सरकारच्या अभियंता इंडिया लि. या कंपनीने नमूद केेले आहे.
या कामासाठी राज्य सरकारने एमआयडीसीला नोडल एजन्सी म्हणून नियुक्त केले आहे. सूत्रांच्या मते, इंजिनिअर्स इंडियाने प्रकल्पाला हिरवी झेंडी दिली आहे. एमआयडीसीने यासाठी विस्तारित बुटीबोरी औद्योगिक क्षेत्रात १८०० एकर जमीन निश्चित केली आहे. समृद्धी महामार्गाजवळ गॅस पाइपलाइनचे कामदेखील पूर्ण झालेले आहे. हीच गॅस या प्रकल्पासाठी कच्चा माल म्हणून कामी येईल.
या प्रकल्पाला रस्ते व रेल्वे मार्गांची चांगली कनेक्टिव्हिटी आहे. रामा डॅममुळे पाण्याची समस्यादेखील नाही. हा प्रकल्प साकार झाल्यास सुमारे ५ हजार लघु व मध्य उद्योग सुरू होतील. आता राज्य सरकारला थेट पंतप्रधान नरेंद्र मोदी यांच्याशी चर्चा करायला हवी. खासगी क्षेत्राऐवजी कोणत्याही सार्वजनिक उपक्रमाच्या माध्यमातून हा प्रकल्प विकसित करण्यासाठी पुढाकार घेण्याची गरज आहे, असे उद्योगतज्ज्ञांचे मत आहे
