rohit-pawar-serious-allegations-on-ajit-pawar-plane-crash-pilot-vsr-company-probe : पायलटने मुद्दाम विमान आदळवून स्फोट घडवला, पुराव्यांशी छेडछाड केल्याचा दावा
Mumbai: दिवंगत उपमुख्यमंत्री अजित पवार यांच्या विमान अपघाताबाबत राष्ट्रवादी काँग्रेस शरद पवार गटाचे आमदार रोहित पवार यांनी पुन्हा खळबळजनक आरोप करत या दुर्घटनेमागे घातपाताचा संशय व्यक्त केला आहे. मुंबईत घेतलेल्या पत्रकार परिषदेत त्यांनी वैमानिकाने मुद्दाम विमान खाली आदळवून स्फोट घडवून आणल्याचा दावा केला. तसेच विमान सेवा देणाऱ्या कंपनीकडून पुराव्यांमध्ये फेरफार करण्याचा प्रयत्न होत असल्याचा आरोपही त्यांनी केला.
रोहित पवार यांनी सांगितले की, अपघाताच्या दिवशी बारामती परिसरात दृश्यमानता आवश्यक मर्यादेपेक्षा कमी असतानाही वैमानिकाने विमान परत न फिरवता खाली उतरवण्याचा प्रयत्न केला. त्यांच्या मते, विमान उतरवण्यासाठी सुमारे पाच हजार मीटर दृश्यमानता आवश्यक असताना त्या वेळी सुमारे साडेतीन हजार मीटरच दृश्यमानता होती. अशा परिस्थितीत विमान खाली आणण्याचा निर्णय संशयास्पद असल्याचे त्यांनी म्हटले.
विमानात आवश्यकतेपेक्षा जास्त इंधन भरले होते, असा आरोप करत रोहित पवार यांनी सांगितले की, मुंबईहून बारामतीला जाण्यासाठी इतक्या मोठ्या प्रमाणात इंधनाची गरज नव्हती. तरीही पंखांतील टाक्या पूर्ण भरल्या होत्या आणि अतिरिक्त इंधनाचे डबेही विमानात ठेवण्यात आले होते. अपघाताच्या वेळी तीन ते साडेतीन हजार लिटर इंधन असल्यानेच वारंवार स्फोट झाले, असा त्यांचा दावा आहे.
विमानातील संभाषण नोंद करणाऱ्या यंत्राबाबतही त्यांनी शंका उपस्थित केली. अपघातानंतर मोठी आग लागूनही काही कागदपत्रे सुरक्षित राहिल्याचा उल्लेख करत त्यांनी नोंद यंत्र जळाल्याचे सांगितले जात असले तरी त्याबाबत सखोल चौकशी व्हावी, अशी मागणी केली. त्यांच्या म्हणण्यानुसार, नियमानुसार दोन तासांचे संभाषण नोंदले जाणे अपेक्षित असताना केवळ तीस मिनिटांचा भाग उपलब्ध असल्याची माहिती समोर येत आहे.
रोहित पवार यांनी संबंधित विमान सेवा कंपनीवरही आरोप करत सांगितले की, उड्डाण आराखड्यात फेरफार झाले असावेत. तपास यंत्रणांना कागदपत्रे देण्यात विलंब होत असल्याचा दावा त्यांनी केला. या प्रकरणातील सर्व ई-मेल आणि संदेशांची तपासणी करण्यात यावी, अशी त्यांची मागणी आहे. तसेच काही वैमानिकांच्या पात्रता आणि परवान्यांबाबतही गंभीर शंका व्यक्त करण्यात आल्या.
दरम्यान, विमान अपघात तपास ब्युरोकडून पहिल्यांदाच अधिकृत निवेदन जारी करण्यात आले आहे. ब्युरोनुसार, विमानात दोन नोंद यंत्रे होती. ती आगीत नुकसानग्रस्त झाली असली तरी त्यापैकी एका यंत्रातील संभाषणाचा काही भाग मिळवण्यात यश आले आहे. कॉकपीटमधील संभाषणाची सखोल तांत्रिक तपासणी सुरू असून संबंधित तज्ज्ञांची मदत घेण्यात येत आहे. कोणतेही तर्क वितर्क न लावता अधिकृत तपास प्रक्रियेवर विश्वास ठेवण्याचे आवाहन ब्युरोकडून करण्यात आले आहे.
अजित पवार यांचा अपघात की घातपात, याबाबत राज्यात राजकीय वातावरण तापले असून या आरोपांनंतर तपास प्रक्रियेची दिशा आणि निष्कर्ष याकडे सर्वांचे लक्ष लागले आहे.
