narhari-zirwal-viral-video-devendra-fadnavis-reaction-investigation-marathi-news : नरहरी झिरवळांचा कथित व्हिडीओ, कारवाईबाबत मुख्यमंत्र्यांचे स्पष्टीकरण
Mumbai : राज्याचे मंत्री नरहरी झिरवाळ यांच्याशी संबंधित कथित व्हिडीओ व्हायरल झाल्यानंतर राज्याच्या राजकारणात खळबळ उडाली असून या प्रकरणावर मुख्यमंत्री देवेंद्र फडणवीस यांनी स्पष्ट भूमिका मांडली आहे. व्हायरल होत असलेल्या व्हिडीओची सत्यता तपासली जाईल आणि त्यानंतरच पुढील निर्णय घेतला जाईल, असे त्यांनी सांगितले आहे.
मिळालेल्या माहितीनुसार, नरहरी झिरवाळ यांनी स्वतः मुख्यमंत्र्यांशी संपर्क साधून हा व्हिडीओ दोन ते तीन वेगवेगळ्या व्हिडीओंचे संपादन करून तयार करण्यात आल्याचा दावा केला आहे. या पार्श्वभूमीवर मुख्यमंत्री देवेंद्र फडणवीस यांनी संबंधित प्रकरणाची सखोल चौकशी करण्याचे निर्देश देत तातडीने तक्रार दाखल करण्याचा सल्ला दिला आहे. तसेच या व्हिडीओची शाहनिशा करून वस्तुस्थिती समोर आणली जाईल, असेही त्यांनी स्पष्ट केले.
दरम्यान, या कथित व्हिडीओमुळे राजकीय वर्तुळात आरोप-प्रत्यारोपांना उधाण आले आहे. काही राजकीय नेत्यांनी नरहरी झिरवाळ यांच्या राजीनाम्याची मागणी केली असून यावरून वातावरण तापले आहे. शिवसेनेच्या काही नेत्यांसह इतर पक्षातील गटांनीही झिरवाळ यांनी नैतिकतेच्या आधारावर पदाचा राजीनामा द्यावा, अशी भूमिका घेतल्याची माहिती आहे.
या व्हिडीओमध्ये झिरवाळ यांच्या शासकीय निवासस्थानातील दृश्य असल्याचा आरोप केला जात आहे. त्यामध्ये एका महिलेची उपस्थिती आणि मद्याच्या बाटल्या दिसत असल्याचा दावा करण्यात येत आहे. मात्र या सर्व बाबींची अधिकृत पुष्टी अद्याप झालेली नाही.
LPG crisis : सिलींडरसाठी नव्हे, फक्त चौकशीसाठी लागताहेत रांगा
नरहरी झिरवाळ यापूर्वीही एफडीए विभागातील कथित लाचखोरी प्रकरणामुळे चर्चेत आले होते. त्या प्रकरणात त्यांच्या विरोधात ठोस पुरावे न सापडल्याने त्यांना क्लीन चिट देण्यात आली होती. आता नव्याने समोर आलेल्या या व्हिडीओमुळे ते पुन्हा एकदा अडचणीत सापडले आहेत.
मुख्यमंत्र्यांनी या प्रकरणाला गंभीर मानत, तपास पूर्ण झाल्यानंतरच पुढील कारवाईबाबत निर्णय घेतला जाईल असे स्पष्ट केले आहे. तसेच संबंधित पक्षाच्या नेत्या सुनेत्रा पवार यांच्यासोबत चर्चा करून योग्य तो निर्णय घेतला जाईल, असेही त्यांनी नमूद केले.
Israel iran us tension : पाकिस्तानकडून इस्त्रायलला थेट इशारा; जागतिक पातळीवर खळबळ !
दरम्यान, राष्ट्रवादी पक्षाकडून तातडीने राजीनामा घेण्याची शक्यता कमी असल्याची माहिती सूत्रांकडून मिळत आहे. आरोपांची सत्यता तपासल्याशिवाय कोणताही निर्णय न घेण्याची भूमिका वरिष्ठ स्तरावर असल्याचे सांगितले जात आहे. या प्रकरणाचा तपास जसजसा पुढे सरकेल, तसतसे आणखी तपशील समोर येण्याची शक्यता व्यक्त केली जात आहे.
___
