Deposits forfeited for five candidates in the mayoral election : नगरसेवकपदासाठी उभ्या असलेल्या १२४ पैकी ८० उमेदवारांचे डिपॉझिटही गेले
Buldhana डिसेंबर २०२५ मध्ये झालेल्या बुलढाणा नगरपालिकेच्या निवडणुकीनंतर मतमोजणीचे अधिकृत निकाल जाहीर होताच स्थानिक राजकारणातील वास्तव समोर आले आहे. नगराध्यक्षपदासाठी निवडणूक रिंगणात उतरलेल्या सात उमेदवारांपैकी पाच जणांची, तर नगरसेवकपदासाठी उभ्या असलेल्या १२४ उमेदवारांपैकी तब्बल ८० जणांची अनामत रक्कम जप्त झाली आहे.
बुलढाणा ही ‘ब’ वर्ग नगरपालिका असल्याने उमेदवारांना किमान एकूण वैध मतांच्या १/८ (अष्टमांश) मते मिळणे अनिवार्य होते. मात्र, बहुतांश उमेदवार ही अट पूर्ण करण्यात अपयशी ठरले. त्यामुळे अनेक पक्षीय तसेच अपक्ष उमेदवारांचा जनाधार अत्यल्प असल्याचे या निकालातून स्पष्ट झाले आहे.
SIR in Buldhana : ‘एसआयआर’ लागू करण्याच्या हालचाली; बुलढाणा जिल्ह्यात पूर्वतयारी सुरू
नगराध्यक्षपदाची लढत : आकडे काय सांगतात?
नगराध्यक्षपदासाठी एकूण ३७ हजार ३९६ वैध मते पडली होती. विजयी ठरलेल्या पूजा गायकवाड यांना १८ हजार ५२५ मते, तर दुसऱ्या क्रमांकावरील लक्ष्मी काकस यांना १३ हजार ७४५ मते मिळाली.
तिसऱ्या क्रमांकावरील भाजपच्या उमेदवाराला अनामत रक्कम वाचविण्यासाठी आवश्यक ४ हजार ६७५ मते मिळणे अपेक्षित होते. मात्र त्यांना ५२६ मते कमी पडल्याने त्यांचीही अनामत जप्त झाली. उर्वरित चार उमेदवारांना तर अष्टमांश मतेही मिळू शकली नाहीत.
नगरसेवकपदातही मोठा फटका
नगरसेवकपदासाठी निवडणूक लढविणाऱ्या १२४ उमेदवारांपैकी ८० जणांना डिपॉझिट गमवावे लागले. प्रत्येक प्रभागातील वैध मतांच्या तुलनेत अनेक उमेदवारांना आवश्यक किमान मते मिळू न शकल्याने ही परिस्थिती उद्भवली.
पक्षीय गणिते कोलमडली
या निवडणुकीत उद्धवसेना, काँग्रेस, राष्ट्रवादी काँग्रेस (अजित पवार गट), राष्ट्रवादी काँग्रेस (शरद पवार गट) तसेच अपक्ष उमेदवारांनाही मोठा फटका बसला. काँग्रेसचे दोन, तर राष्ट्रवादी (शरद पवार) गटाचे दोन नगरसेवक निवडून आले. मात्र, इतर अनेक पक्षीय व अपक्ष उमेदवारांना अनामत रक्कम वाचविता आली नाही.
Zilla Parishad elections : आधीच खर्चाचा धडाका; प्रत्यक्ष निवडणुकीत काय होणार?
पालिकेला आर्थिक फायदा
दरम्यान, मोठ्या संख्येने उमेदवार निवडणूक रिंगणात उतरल्यामुळे अनामत रक्कम व नामनिर्देशन शुल्काच्या माध्यमातून बुलढाणा नगरपालिकेच्या तिजोरीत सुमारे ५० लाख रुपयांची कमाई झाली आहे.
एकूणच, या निकालातून बुलढाणा शहरातील स्थानिक राजकारणातील वास्तव, मतविभाजन आणि अनेक तथाकथित उमेदवारांचा मर्यादित जनाधार ठळकपणे समोर आला आहे.
