tukaram-mundhe-sameer-wankhede-statement-social-media-reaction : समीर वानखेडेंच्या विधानाची जोरदार चर्चा, नेटकऱ्यांकडून मुंढेंना पाठिंबा
Mumbai : महाराष्ट्रातील कडक आणि सडेतोड अधिकारी म्हणून ओळखले जाणारे तुकाराम मुंढे सध्या चर्चेत आले आहेत. मात्र यावेळी त्यांच्या कारवाईमुळे नव्हे, तर माजी नार्कोटिक्स कंट्रोल ब्युरोचे मुंबई विभागीय संचालक समीर वानखेडे यांच्या एका विधानामुळे तुकाराम मुंढे चर्चेत आले आहेत. समीर वानखेडे यांचा एक व्हिडीओ सध्या सोशल मीडियावर मोठ्या प्रमाणात व्हायरल होत असून, त्यामध्ये तुकाराम मुंढे यांच्याबाबत विचारलेल्या प्रश्नाला त्यांनी दिलेल्या उत्तराची चर्चा सुरू आहे.
तुकाराम मुंढे हे आपल्या धडाकेबाज कार्यपद्धतीसाठी ओळखले जातात. विविध शासकीय विभागांमध्ये काम करताना त्यांनी नियमांची काटेकोर अंमलबजावणी आणि बेकायदेशीर प्रकारांविरोधातील कारवाईवर भर दिला आहे. सध्या अन्न आणि औषध प्रशासन विभागाची जबाबदारी सांभाळताना भेसळ, प्रतिबंधित पदार्थ आणि नियमांचे उल्लंघन करणाऱ्यांविरोधात कारवाई सुरू असल्याने त्यांचे नाव पुन्हा चर्चेत आले आहे.
याच पार्श्वभूमीवर समीर वानखेडे यांना तुकाराम मुंढे यांच्याबाबत प्रश्न विचारण्यात आला. त्यावर त्यांनी केलेल्या वक्तव्याने सोशल मीडियावर चर्चेला सुरुवात झाली आहे. तुकाराम मुंढे यांच्याबाबत बोलताना समीर वानखेडे यांनी कोणत्याही अधिकाऱ्याविषयी वैयक्तिक टिप्पणी करण्यास नकार दिला. मात्र त्यांनी प्रशासनातील अधिकाऱ्यांच्या कामाची भूमिका स्पष्ट केली.
आपण काही अधिकाऱ्यांविषयी खासगी बोलणार नाही. आपण जे काम करतो किंवा संबंधित अधिकारी जे काम करतात, ते त्यांच्या कर्तव्याचा भाग आहे. कोणीही आपल्या चौकटीबाहेर जाऊन काम करत नाही, अशी भूमिका समीर वानखेडे यांनी मांडली. अधिकाऱ्यांवर राष्ट्राप्रती जबाबदारी असते आणि त्यासाठीच त्यांना पगार दिला जातो. त्यामुळे प्रत्येक अधिकाऱ्याला आपापली जबाबदारी पार पाडावी लागते, असेही त्यांनी सांगितले.
समीर वानखेडे यांच्या वक्तव्याचा सर्वाधिक चर्चेत आलेला भाग म्हणजे अधिकाऱ्यांच्या कामाबाबत त्यांनी केलेले भाष्य. प्रत्येक अधिकारी आपल्या कर्तव्याच्या चौकटीत काम करत असतो. त्यामुळे कोणी काही असाधारण किंवा ग्रेट काम करत नाही, असे मत त्यांनी व्यक्त केले. विशेषतः अंमली पदार्थांच्या मुद्द्यावर अधिकाऱ्यांनी गांभीर्याने काम करण्याची गरज असल्याचे वानखेडे यांनी सांगितले. ड्रग्जच्या समस्येला सामोरे जाणे आणि त्याला आळा घालणे आवश्यक आहे. अन्यथा त्याचा परिणाम देशातील नव्या पिढीवर आणि तरुणांवर होऊ शकतो, असा इशाराही त्यांनी दिला.
तुकाराम मुंढे यांची ओळख नियमांची कठोर अंमलबजावणी करणारे अधिकारी अशी आहे. त्यांच्या कारवाईची शैली अनेकदा चर्चेचा विषय ठरते. सध्या अन्न आणि औषध प्रशासन विभागात कार्यरत असताना त्यांनी विविध ठिकाणी कारवाईला वेग दिल्याने भेसळखोर आणि नियमांचे उल्लंघन करणाऱ्यांविरोधात प्रशासनाची धडक मोहीम सुरू असल्याचे चित्र आहे. यामुळेच तुकाराम मुंढे यांच्या कामाची सोशल मीडियावरही चर्चा होत असते. अशा परिस्थितीत समीर वानखेडे यांच्या विधानामुळे या चर्चेला नवे वळण मिळाले आहे.
Fda Notice : शाहरुख खान, अजय देवगण आणि टायगर श्रॉफ एफडीएच्या रडारवर!
समीर वानखेडे यांचा व्हिडीओ सोशल मीडियावर व्हायरल झाल्यानंतर नेटकऱ्यांनी त्यावर विविध प्रतिक्रिया दिल्या आहेत. विशेष म्हणजे अनेकांनी तुकाराम मुंढे यांच्या कार्यपद्धतीचे समर्थन केले आहे. ‘ते ज्या प्रकारे काम करत आहेत, त्याच प्रकारे काम झाले पाहिजे,’ अशी प्रतिक्रिया एका नेटकऱ्याने दिली आहे. तर दुसऱ्या एका वापरकर्त्याने तुकाराम मुंढे हे अत्यंत प्रामाणिक अधिकारी असल्याचे म्हटले आहे.
आणखी एका नेटकऱ्याने, ‘ते बरोबर आहेत. ते भ्रष्टाचारी अधिकारी नाहीत. त्यांना आमचा सलाम. असेच प्रामाणिक अधिकारी नेहमीच इतरांपेक्षा वेगळे असतात,’ अशी प्रतिक्रिया व्यक्त केली आहे. समीर वानखेडेंच्या विधानावरून आता सोशल मीडियावर दोन वेगवेगळ्या भूमिका पाहायला मिळत आहेत. मात्र तुकाराम मुंढे यांच्या कामाबाबत नेटकऱ्यांकडून व्यक्त होणारा पाठिंबा आणि त्यांच्या धडक कार्यपद्धतीची सुरू असलेली चर्चा यामुळे हे प्रकरण सध्या सोशल मीडियावर चर्चेचा विषय ठरले आहे.
