BJP Conducts Survey in Khamgaon for Municipal Council Chief Post : सर्वेक्षणानंतरच उमेदवारांची घोषणा; मतदार व कार्यकर्त्यांच्या प्रतिक्रियांचा सखोल अभ्यास सुरू
Khamgao आगामी नगराध्यक्ष निवडणुकीसाठी भारतीय जनता पक्षाने (भाजप) खामगाव शहरात उमेदवार निवडीची प्रक्रिया सुरू केली आहे. पक्षाने एका स्वतंत्र एजन्सीकडून सर्वेक्षणाची जबाबदारी सोपवली असून हे सर्वेक्षण वरिष्ठ नेतृत्वाच्या निर्देशानुसार अत्यंत गोपनीयपणे पार पडत आहे.
या सर्वेक्षणाद्वारे पक्ष कार्यकर्त्यांच्या आणि सर्वसामान्य मतदारांच्या प्रतिक्रिया, अपेक्षा आणि प्राधान्यांचा सखोल अभ्यास केला जात आहे. या अहवालाच्या आधारेच नगराध्यक्षपदाचा अधिकृत उमेदवार निश्चित करण्यात येणार असल्याची माहिती सूत्रांकडून मिळाली आहे.
भाजपकडून नगरसेवक पदांसाठीही निवडीची प्रक्रिया सुरू असून, सोमवारी झालेल्या मुलाखतींनंतर अनेक इच्छुकांमध्ये संभ्रमाची स्थिती निर्माण झाली आहे. विविध विभागांतील उमेदवारांच्या मुलाखती घेतल्या गेल्या; मात्र त्यानंतर कोणतीही स्पष्ट माहिती न दिल्याने उमेदवारांत अनिश्चितता निर्माण झाली आहे.
Local Body Elections : चिखलीत पुन्हा ‘महाले विरुद्ध बोंद्रे’ सामना!
महायुतीतील घटक पक्ष असलेल्या शिंदे सेनेची भूमिका खामगावात संदिग्ध दिसून येत आहे. एका गटाने भाजपशी युती कायम ठेवली असताना, दुसऱ्या गटाने राष्ट्रवादी काँग्रेस (अजित पवार गट) यांच्याशी संपर्क साधला आहे. दरम्यान, अजित पवार गटाने भाजपपासून दुरावा ठेवला असून या राजकीय हालचालींमुळे खामगावमधील निवडणूक समीकरणे अधिकच गुंतागुंतीची बनली आहेत.
खामगाव नगराध्यक्षपदाच्या निवडणुकीला भाजपकडून दिलेले सर्वेक्षण विशेष महत्त्वाचे ठरणार आहे. उमेदवार निवडताना पक्षाला राजकीय संतुलन राखत कठीण निर्णय घ्यावा लागण्याची शक्यता आहे. या प्रक्रियेच्या पार्श्वभूमीवर पक्षातील गटबाजी, स्थानिक समीकरणे आणि मतदारांचा कल यांचाही बारकाईने विचार होईल.
मुलाखतीदरम्यान इच्छुक उमेदवारांना त्यांच्या कार्याचा आढावा सादर करण्याची संधी मिळाली. मात्र कोणता उमेदवार अंतिम टप्प्यात पोहोचेल, याबाबत अद्याप स्पष्टता नसल्याने उमेदवारांमध्ये शंका आणि ताणाचे वातावरण निर्माण झाले आहे.
दरम्यान, महाआघाडी खामगाव निवडणूक एकत्र लढवण्याच्या तयारीत असल्याचे चित्र दिसत आहे. त्यामुळे भाजप-महायुतीतील गोंधळाच्या पार्श्वभूमीवर राष्ट्रवादी काँग्रेस (अजित पवार गट) कडून कोण उमेदवार मैदानात उतरेल, याकडे सर्वांचे लक्ष केंद्रीत झाले आहे.
