mehkar-congress-vs-shivsena-ubt-tensions : ‘चंद्रपूर पॅटर्न’चे बुलढाण्यात पडसाद; अतिक्रमणधारकांच्या घरांवरून सत्तेच्या सोबत्यांमध्येच जुंपली
Mehkar चंद्रपूर महानगरपालिकेत उद्धवसेनेने भाजपशी हातमिळवणी केल्यानंतर आता त्याचे तीव्र पडसाद बुलढाणा जिल्ह्यातील मेहकरमध्ये उमटू लागले आहेत. काँग्रेस प्रदेशाध्यक्ष हर्षवर्धन सपकाळ यांनी सोशल मीडियावर केलेल्या “आम्ही आता वेगळा विचार करायचा का?” या सूचक विधानाने महाविकास आघाडीत तणाव निर्माण केला असून, मेहकर नगरपालिकेत काँग्रेस आणि उद्धवसेनेचे संबंध टोकाला पोहोचले आहेत.
चंद्रपूरमध्ये उद्धवसेनेने काँग्रेसला डावलून भाजपला साथ दिल्यामुळे काँग्रेसमध्ये प्रचंड असंतोष आहे. याच पार्श्वभूमीवर प्रदेशाध्यक्ष सपकाळ यांनी समाजमाध्यमांवर टाकलेली पोस्ट म्हणजे उद्धवसेनेला दिलेला थेट इशारा मानला जात आहे. बुलढाणा हा सपकाळांचा बालेकिल्ला असल्याने, मेहकरमधील काँग्रेस नेते आता आक्रमक झाले असून त्यांनी स्थानिक पातळीवर उद्धवसेनेची कोंडी करण्यास सुरुवात केली आहे.
Rohit pawar : अजितदादांचा घातपात की अपघात? पायलट बदल, मेंटेनन्स अहवालावर संशय
मेहकर नगरपालिकेत उद्धवसेनेचे किशोर गारोळे नगराध्यक्ष आहेत, तर काँग्रेसचे ११ नगरसेवक सत्तेत भागीदार आहेत. मात्र, आता शहरातील अतिक्रमणधारकांच्या हक्काच्या घरांच्या मुद्द्यावरून दोन्ही पक्षांत श्रेयवादाची लढाई पेटली आहे. काँग्रेसचे गटनेते आणि माजी नगराध्यक्ष कासम गवळी यांनी आक्रमक पवित्रा घेत, अतिक्रमणधारकांना घरे देण्याचा पाठपुरावा आपण नगराध्यक्ष असतानाच सुरू केला होता, असे ठणकावून सांगितले आहे. नगराध्यक्ष किशोर गारोळे यांनी हा विषय लावून धरला असला तरी, कासम गवळी यांनी अचानक या विषयावर जोर दिल्याने उद्धवसेनेवर राजकीय दबाव वाढला आहे.
वरकरणी स्थानिक वाटणारा हा प्रश्न आता थेट प्रदेशाध्यक्षांच्या भूमिकेशी जोडला जात आहे. चंद्रपूरमध्ये जो ‘धोका’ काँग्रेसला मिळाला, तसाच काहीसा प्रकार मेहकरमध्ये घडू नये म्हणून काँग्रेसने आतापासूनच आक्रमक रणनीती अवलंबली आहे. सपकाळांच्या सूचनेनुसार मेहकरमधील काँग्रेस नगरसेवक आता उद्धवसेनेला धारेवर धरत असल्याने महाविकास आघाडीतील दरी वाढताना दिसत आहे.
