buldhana-shinde-sena-entry-wave-mla-sanjay-gaikwad-loyalists-concerns : निवडणुकीच्या तोंडावर संजय गायकवाडांकडून ‘मेगा भरती’; नव्यांना पदांची खिरापत मिळाल्याने जुने कार्यकर्ते अस्वस्थ
Buldhana जिल्ह्याच्या राजकीय पटलावर सध्या पक्षप्रवेशांचे मोठे वारे वाहत असून, प्रामुख्याने शिंदेसेनेमध्ये होत असलेल्या ‘इनकमिंग’ने सर्वांचे लक्ष वेधले आहे. आमदार संजय गायकवाड यांच्या नेतृत्वाखाली दररोज शेकडो कार्यकर्ते पक्षात प्रवेश करत आहेत. आगामी निवडणुका डोळ्यासमोर ठेवून सुरू असलेली ही मोहीम पक्षाची ताकद वाढवणारी असली, तरी यामुळे वर्षानुवर्षे पक्षाचा झेंडा खांद्यावर घेणाऱ्या निष्ठावंतांमध्ये मात्र अस्वस्थता पसरली आहे.
राजकीय जाणकारांच्या मते, आमदार गायकवाड यांनी जिल्ह्यात आपली पकड मजबूत करण्यासाठी ही ‘मेगा भरती’ सुरू केली आहे. केवळ सामान्य कार्यकर्तेच नव्हे, तर इतर पक्षांतील मातब्बर पदाधिकाऱ्यांनाही पक्षात सामावून घेतले जात आहे. या नव्या चेहऱ्यांमुळे पक्षाला नवी ऊर्जा मिळेल आणि मतदारांमध्ये संघटन वाढल्याचा सकारात्मक संदेश जाईल, असा दावा पक्ष नेतृत्वातर्फे केला जात आहे.
Warning to Thackeray brothers : ‘महाराष्ट्र पालथा घातला असता तर चित्र वेगळे असते’
पक्षाच्या या वाढत्या लाटेत एक नवा पेच निर्माण झाला आहे. पक्षात प्रवेश करणाऱ्या अनेक नव्या कार्यकर्त्यांना थेट महत्त्वाच्या पदांची जबाबदारी सोपवली जात आहे. यामुळे गेल्या अनेक वर्षांपासून संकटाच्या काळातही पक्षाची साथ न सोडणारे जुने पदाधिकारी आणि कार्यकर्ते दुर्लक्षित झाल्याची भावना व्यक्त करत आहेत. नव्या कार्यकर्त्यांना पदसोपानात वेगाने वरचे स्थान मिळाल्याने ‘आधी येणाऱ्यांना काय?’ असा प्रश्न उपस्थित होत आहे. जर जुन्या कार्यकर्त्यांच्या श्रमाची योग्य दखल घेतली गेली नाही, तर ही अंतर्गत नाराजी निवडणुकीत उलटण्याची शक्यता राजकीय निरीक्षक वर्तवत आहेत.
NCP merger : राष्ट्रवादी काँग्रेसच्या विलीनीकरणाबाबत हालचालींना वेग!
पक्षाचा विस्तार करणे ही लोकशाहीतील अपरिहार्यता असली तरी, ‘निष्ठा’ आणि ‘नवे समीकरण’ यांचा ताळमेळ बसवण्याचे मोठे आव्हान आमदार संजय गायकवाड यांच्यासमोर असणार आहे. नव्या दमाच्या कार्यकर्त्यांची ताकद आणि जुन्या निष्ठावंतांचा अनुभव यांची सांगड घालण्यात पक्ष यशस्वी होतो की नाही, यावरच आगामी निवडणुकांचे भवितव्य अवलंबून असेल.
