vijay-thalapathy-tvk-tamil-nadu-government-formation-governor-standoff-mla-resignation-crisis : सत्तासंघर्ष तीव्र; राज्यपालांच्या भूमिकेमुळे थलपती विजय आक्रमक
Chennai : तमिळनाडूच्या राजकारणात सध्या प्रचंड राजकीय नाट्य पाहायला मिळत असून अभिनेता ते राजकारणी असा प्रवास करणारे थलपती विजय आणि त्यांच्या तमिळगा वेत्री कळघम अर्थात टीव्हीके पक्षाने मोठा राजकीय निर्णय घेण्याची तयारी सुरू केल्याची माहिती समोर येत आहे. विधानसभा निवडणुकीत सर्वाधिक जागा जिंकूनही सत्ता स्थापनेपासून दूर ठेवले जात असल्याचा आरोप करत टीव्हीके पक्षाने आक्रमक भूमिका घेतली आहे. सूत्रांच्या माहितीनुसार, डीएमके किंवा अण्णाद्रमुकने सरकार स्थापन करण्याचा प्रयत्न केल्यास टीव्हीकेचे सर्व आमदार सामूहिक राजीनामे देऊ शकतात. या चर्चेमुळे तमिळनाडूतील सत्तासमीकरणांमध्ये मोठी खळबळ उडाली आहे.
तमिळनाडूच्या २३४ सदस्यीय विधानसभेत बहुमतासाठी ११८ आमदारांची आवश्यकता आहे. निवडणुकीत थलपती विजय यांच्या टीव्हीके पक्षाला १०८ जागांवर विजय मिळाला होता. मात्र विजय दोन मतदारसंघांतून निवडून आल्याने पक्षाचे प्रत्यक्ष संख्याबळ १०७ इतके राहते. काँग्रेसच्या पाच आमदारांनी टीव्हीकेला पाठिंबा जाहीर केल्यानंतरही त्यांचे एकत्रित संख्याबळ ११२ पर्यंतच पोहोचले आहे. त्यामुळे बहुमतासाठी अजून सहा आमदारांच्या समर्थनाची गरज कायम आहे.
Nashik tcs case : सूत्रधार निदा खान अखेर अटकेत, विदेशी फंडिंग, आंतरराष्ट्रीय जाळ्याचा तपास वेगात
गेल्या दोन दिवसांपासून थलपती विजय यांनी सरकार स्थापनेसाठी जोरदार हालचाली सुरू केल्या आहेत. त्यांनी दोनवेळा तमिळनाडूचे राज्यपाल राजेंद्र अर्लेकर यांची भेट घेतली. मात्र दोन्ही बैठकींमध्ये राज्यपालांनी स्पष्ट बहुमत सिद्ध करणाऱ्या ११८ आमदारांच्या पाठिंब्याची पत्रे सादर केल्याशिवाय सत्तास्थापनेचे निमंत्रण दिले जाणार नाही, अशी भूमिका घेतल्याची माहिती समोर आली आहे. राज्यपालांच्या या भूमिकेमुळे तमिळनाडूमध्ये घटनात्मक आणि राजकीय वाद निर्माण झाला आहे.
सामान्यतः निवडणुकीत सर्वाधिक जागा जिंकणाऱ्या पक्षाला सरकार स्थापनेसाठी प्रथम निमंत्रण दिले जाते आणि त्यानंतर त्या पक्षाला विधानसभेत बहुमत सिद्ध करावे लागते. मात्र तमिळनाडूतील सध्याच्या परिस्थितीत राज्यपालांनी वेगळी भूमिका घेतल्याने टीव्हीके समर्थकांमध्ये तीव्र नाराजी पसरली आहे. काल टीव्हीके कार्यकर्त्यांनी लोकभवनाबाहेर आंदोलन करण्याचा प्रयत्न केला होता. आज पुन्हा राजभवन परिसरात मोठ्या आंदोलनाची तयारी सुरू असल्याची माहिती समोर येत आहे.
दरम्यान, डीएमकेनेही राजकीय हालचालींना वेग दिला असून पक्षप्रमुख एम. के. स्टॅलिन यांना पुढील निर्णय घेण्याचे अधिकार देण्यात आले आहेत. अण्णाद्रमुककडूनही सत्तास्थापनेच्या शक्यता तपासल्या जात असल्याचे सांगितले जात आहे. त्यामुळे पुढील काही तास तमिळनाडूच्या राजकारणासाठी अत्यंत निर्णायक ठरणार आहेत.
काँग्रेसनंतर आता डाव्या पक्षांकडूनही टीव्हीकेला पाठिंबा मिळण्याची शक्यता व्यक्त केली जात आहे. दोन्ही डाव्या पक्षांचे एकूण चार आमदार आहेत. त्यांनी समर्थन दिल्यास टीव्हीके आघाडीचे संख्याबळ ११६ पर्यंत पोहोचू शकते. डाव्या पक्षांनीही राज्यपालांच्या भूमिकेवर टीका करत लोकशाही परंपरांचा आदर केला जावा, अशी मागणी केली आहे.
Mamata banerjee : पश्चिम बंगालमध्ये १५ वर्षांच्या ममता राजवटीचा अस्त
राजकीय निरीक्षकांच्या मते, थलपती विजय यांचा हा पहिलाच विधानसभा निवडणूक अनुभव असून अल्पावधीत त्यांनी तमिळनाडूच्या राजकारणात मोठी ताकद निर्माण केली आहे. मात्र सत्तास्थापनेसाठी आवश्यक संख्याबळ न मिळाल्याने निर्माण झालेला तिढा आता राज्यातील राजकीय स्थैर्यावर परिणाम करू शकतो. आगामी काही दिवसांत टीव्हीके कोणती भूमिका घेते आणि राज्यपाल पुढे काय निर्णय घेतात, याकडे संपूर्ण देशाचे लक्ष लागले आहे.
