maharashtra-school-reopen-date-changed-vidarbha-schools-from-22-june-rest-of-state-from-15-june : उष्णतेच्या पार्श्वभूमीवर शिक्षण विभागाचा मोठा निर्णय
Mumbai : राज्यातील लाखो विद्यार्थी, पालक आणि शिक्षकांसाठी महत्त्वाची बातमी समोर आली आहे. उन्हाळी सुट्टीनंतर शाळा सुरू होण्यास अवघे काही दिवस शिल्लक असताना शालेय शिक्षण विभागाने शाळांच्या प्रारंभाबाबत महत्त्वाचा निर्णय घेतला आहे. राज्यातील बहुतांश शाळा नियोजित वेळापत्रकानुसार १५ जूनपासून सुरू होणार असल्या तरी विदर्भातील प्राथमिक, माध्यमिक आणि उच्च माध्यमिक शाळा २२ जूनपासून सुरू करण्याचा निर्णय घेण्यात आला आहे.
विदर्भात गेल्या काही दिवसांपासून तीव्र उष्णतेची लाट कायम असून तापमानाने विक्रमी पातळी गाठली आहे. विद्यार्थ्यांच्या आरोग्याची काळजी आणि सुरक्षितता लक्षात घेऊन हा निर्णय घेण्यात आल्याचे शिक्षण विभागाने स्पष्ट केले आहे. त्यामुळे विदर्भातील विद्यार्थ्यांना आणखी एका आठवड्याची अतिरिक्त सुट्टी मिळणार आहे.
प्राथमिक शिक्षण संचालक शरद गोसावी तसेच माध्यमिक व उच्च माध्यमिक शिक्षण संचालक डॉ. महेश पालकर यांनी संयुक्त परिपत्रकाद्वारे हा निर्णय जाहीर केला आहे. यासंदर्भात विभागीय शिक्षण उपसंचालक, शिक्षणाधिकारी आणि शिक्षण निरीक्षकांना आवश्यक सूचना देण्यात आल्या आहेत.
Reshuffle modi cabinet : राजकीय हालचालींना वेग; मोदी मंत्रिमंडळात फेरबदलांची शक्यता
यंदाच्या उन्हाळ्यात विदर्भातील अनेक जिल्ह्यांमध्ये तापमानाचा पारा ४५ अंश सेल्सिअसच्या पुढे गेला होता. चंद्रपूर जिल्ह्यातील ब्रह्मपुरी येथे ४७.२ अंश सेल्सिअस इतक्या विक्रमी तापमानाची नोंद झाली होती. त्यामुळे संपूर्ण देशात ब्रह्मपुरी हे सर्वाधिक उष्ण शहर म्हणून चर्चेत आले होते. वाढत्या तापमानामुळे उष्माघाताच्या घटनांमध्येही वाढ झाली होती. काही ठिकाणी उष्माघातामुळे मृत्यू झाल्याच्या घटनाही समोर आल्या होत्या.
हवामान विभागाने अकोला, अमरावती आणि वर्धा जिल्ह्यांसाठी रेड अलर्ट जारी केला होता, तर नागपूर आणि यवतमाळ जिल्ह्यांसाठी ऑरेंज अलर्ट देण्यात आला होता. नागरिकांनी अत्यावश्यक कामाशिवाय दुपारच्या वेळेत घराबाहेर पडू नये, अशा सूचनाही प्रशासनाकडून वारंवार देण्यात आल्या होत्या.
दरम्यान, विदर्भात मान्सून पोहोचण्यासाठी अजून काही दिवसांचा अवधी लागण्याची शक्यता असल्याने विद्यार्थ्यांच्या आरोग्यावर विपरीत परिणाम होऊ नये यासाठी शाळा सुरू करण्याची तारीख पुढे ढकलण्यात आली आहे. शिक्षण विभागाच्या निर्णयानुसार विदर्भातील राज्य मंडळाच्या सर्व प्राथमिक, माध्यमिक आणि उच्च माध्यमिक शाळा २२ जूनपासून सुरू होतील.
विशेष म्हणजे २२ जून ते ३० जून या कालावधीत विदर्भातील सर्व शाळा सकाळच्या सत्रात भरविण्यात येणार आहेत. त्यानंतर १ जुलैपासून शाळा नियमित वेळापत्रकानुसार सुरू राहतील. दुसरीकडे, मुंबई, पुणे, कोकण, पश्चिम महाराष्ट्र, मराठवाडा आणि उत्तर महाराष्ट्रातील शाळा नियोजित वेळेनुसार १५ जूनपासून नियमितपणे सुरू होणार आहेत.
शिक्षण विभागाच्या या निर्णयामुळे विदर्भातील विद्यार्थ्यांना उष्णतेपासून दिलासा मिळणार असून पालकांनीही या सुधारित वेळापत्रकाची नोंद घ्यावी, असे आवाहन प्रशासनाकडून करण्यात आले आहे.
