parth-pawar-kaynaat-dhar-engagement-on-29-july-who-is-kaynaat-dhar : जाणून घ्या कोण आहे पवार कुटुंबाची होणारी सून
Mumbai : पवार कुटुंबात पुन्हा आनंदाचे वातावरण निर्माण झाले असून लवकरच सनई-चौघडे वाजणार आहेत. राष्ट्रवादी काँग्रेसचे नेते आणि खासदार पार्थ पवार यांचा कायनात धार हिच्यासोबत २९ जुलै रोजी पुण्यात साखरपुडा होणार असल्याची माहिती समोर आली आहे. नुकताच खासदार सुप्रिया सुळे यांची कन्या रेवती सुळे हिचा विवाह पार पडला असताना आता पवार कुटुंबातील आणखी एका शुभकार्याची चर्चा राजकीय आणि सामाजिक वर्तुळात रंगू लागली आहे.
पार्थ पवार आणि कायनात धार यांच्या नात्याबाबत गेल्या काही महिन्यांपासून विविध चर्चा सुरू होत्या. दोघेही अनेक सार्वजनिक कार्यक्रमांमध्ये एकत्र दिसल्याने त्यांच्या नात्याबाबत उत्सुकता वाढली होती. आता त्यांच्या साखरपुड्याची तारीख निश्चित झाल्याची माहिती समोर आल्याने या चर्चांवर शिक्कामोर्तब झाल्याचे मानले जात आहे.
अलीकडेच मुंबईत पार पडलेल्या रेवती सुळे यांच्या विवाह सोहळ्यात पार्थ पवार यांच्यासोबत कायनात धार उपस्थित होती. उपमुख्यमंत्री सुनेत्रा पवार यांच्यासोबत तिची उपस्थिती विशेष चर्चेचा विषय ठरली होती. विवाह सोहळ्यातील छायाचित्रे आणि व्हिडिओ सोशल मीडियावर मोठ्या प्रमाणात व्हायरल झाल्यानंतर दोघांच्या नात्याबाबत पुन्हा चर्चा सुरू झाली होती.
Big Decision : शर्तभंग झालेल्या शासकीय जमिनींवर सरकारचा मोठा निर्णय!
यापूर्वीही पार्थ पवार आणि कायनात धार हे मध्य प्रदेशातील उज्जैन येथील महाकाल मंदिरात एकत्र दर्शनासाठी गेले होते. त्या भेटीची छायाचित्रे सोशल मीडियावर मोठ्या प्रमाणात व्हायरल झाली होती. त्यानंतर दोघे विविध सामाजिक आणि कौटुंबिक कार्यक्रमांमध्येही एकत्र दिसल्याने त्यांच्या नात्याबाबतच्या चर्चांना अधिक बळ मिळाले.
कायनात धार ही केवळ आनंदाच्या प्रसंगांमध्येच नव्हे, तर पवार कुटुंबाच्या कठीण काळातही त्यांच्यासोबत असल्याचे दिसून आले आहे. कुटुंबातील दुःखद प्रसंगी तिने बारामतीसह मुंबईत आयोजित शोकसभांमध्ये उपस्थित राहून कुटुंबीयांचे सांत्वन केले होते. त्यामुळे तिचे पवार कुटुंबाशी जिव्हाळ्याचे संबंध असल्याची चर्चा सातत्याने होत होती.
Ats Investigates : पाकिस्तानस्थित शहजाद भट्टीच्या कथित नेटवर्कशी संबंधित ११२ जणांची चौकशी
कायनात धार ही मूळची हरियाणातील असून सध्या दिल्लीमध्ये वास्तव्यास आहे. तिच्या वैयक्तिक आणि व्यावसायिक आयुष्याबाबत फारशी अधिकृत माहिती सार्वजनिकरीत्या उपलब्ध नसली, तरी पवार कुटुंबाशी तिचे निकटचे कौटुंबिक संबंध असल्याचे बोलले जाते. गेल्या काही काळापासून ती पार्थ पवार यांच्यासोबत विविध कार्यक्रमांमध्ये सातत्याने दिसत असल्यामुळे ती चर्चेत आली आहे.
दरम्यान, २९ जुलै रोजी पुण्यात पार पडणाऱ्या साखरपुडा सोहळ्यानंतर पवार कुटुंबात आणखी एका नव्या नात्याची अधिकृत नोंद होणार आहे. या सोहळ्याकडे राजकीय, सामाजिक आणि उद्योग क्षेत्रातील अनेक मान्यवरांचे लक्ष लागले असून पवार कुटुंबातील या आनंदसोहळ्याची राज्यभर चर्चा सुरू आहे.
