Congress’s prestige at stake in the Buldhana district bank election : काँग्रेसमध्ये उत्सुकता शिगेला; प्रकाश पाटील यांच्या भूमिकेकडे सर्वांचे लक्ष
Buldhana बुलढाणा जिल्हा मध्यवर्ती सहकारी बँकेच्या (बीडीसीसी) निवडणुकीने जिल्ह्याच्या राजकीय वातावरणात चांगलीच रंगत आणली आहे. उमेदवारी अर्ज दाखल करण्याच्या अखेरच्या दिवशी इच्छुकांची मोठी गर्दी झाली. मात्र, सर्वाधिक चर्चा काँग्रेसचे जिल्हाध्यक्ष प्रकाश पाटील यांच्या उमेदवारीची आणि त्यांच्या राजकीय भूमिकेची होत आहे. जिल्हाध्यक्षपदाची सूत्रे स्वीकारल्यानंतर त्यांच्या नेतृत्वाखाली होत असलेली ही पहिली मोठी निवडणूक असल्याने ती काँग्रेससाठी प्रतिष्ठेची मानली जात आहे.
जिल्हा मध्यवर्ती सहकारी बँकेची निवडणूक ही केवळ सहकार क्षेत्रापुरती मर्यादित नसून जिल्ह्यातील राजकीय समीकरणांवर प्रभाव टाकणारी निवडणूक म्हणून ओळखली जाते. आगामी स्थानिक स्वराज्य संस्थांच्या निवडणुकांच्या पार्श्वभूमीवर या निवडणुकीकडे सर्वच पक्ष गांभीर्याने पाहत आहेत. त्यामुळे काँग्रेससह महायुती आणि महाविकास आघाडीतील नेत्यांची रणनीतीही चर्चेचा विषय ठरत आहे.
Teachers recruitment : बुलढाणा जिल्ह्यातील ८ महाविद्यालयांना प्रवेशबंदी; शिक्षक भरती न केल्याचा फटका
प्रकाश पाटील यांनी जिल्हाध्यक्षपद स्वीकारल्यानंतर संघटन मजबूत करणे, कार्यकर्त्यांमध्ये समन्वय निर्माण करणे आणि पक्षाला नवसंजीवनी देण्याचे प्रयत्न सुरू केले आहेत. अशा परिस्थितीत जिल्हा बँकेच्या निवडणुकीत ते पक्षातील सर्व गटांना एकत्र ठेवण्यात आणि प्रभावी राजकीय भूमिका बजावण्यात कितपत यशस्वी होतात, याकडे राजकीय निरीक्षकांचे लक्ष लागले आहे.
दरम्यान, उमेदवारी अर्ज दाखल झाला म्हणजे अंतिम लढत निश्चित झाली, असे चित्र अद्याप नाही. अर्ज मागे घेण्याची प्रक्रिया पूर्ण झाल्यानंतरच अंतिम उमेदवारांची यादी स्पष्ट होणार आहे. त्यामुळे अनेक इच्छुकांमध्ये अद्यापही चर्चा, समन्वय आणि राजकीय वाटाघाटी सुरू असल्याचे बोलले जात आहे.
राजकीय वर्तुळात आता अनेक प्रश्नांची चर्चा रंगली आहे. कोणता उमेदवार अखेर मैदानात राहणार? कोण माघार घेणार? कोणत्या गटामध्ये तडजोड होणार? कोणते नवे राजकीय समीकरण आकार घेणार? याची उत्सुकता वाढली आहे. विशेषतः काँग्रेसमध्ये प्रकाश पाटील यांच्या नेतृत्वाखाली पक्ष किती एकसंघ राहतो आणि त्याचा निवडणुकीवर किती परिणाम होतो, हे पाहणे महत्त्वाचे ठरणार आहे.
