disha-salian-case-satish-salian-matoshree-aaditya-thackeray-500-crore-defamation-notice : दिशा सालियन प्रकरणातील ५०० कोटींच्या नोटिशीवर मातोश्रीबाहेर घडामोडी
Mumbai : दिशा सालियन मृत्यू प्रकरणावरून महाराष्ट्राच्या राजकारणात पुन्हा खळबळ उडाली आहे. दिशा सालियनचे वडील सतीश सालियन यांनी शिवसेना उद्धव बाळासाहेब ठाकरे पक्षाचे नेते आदित्य ठाकरे आणि राष्ट्रवादी काँग्रेस शरदचंद्र पवार पक्षाचे नेते अनिल देशमुख यांना ५०० कोटी रुपयांच्या मानहानीच्या दाव्याची कायदेशीर नोटीस बजावली आहे. या नोटिशीनंतर शनिवारी सतीश सालियन स्वतः आपल्या वकिलांच्या टीमसह आदित्य ठाकरे यांच्या मातोश्री निवासस्थानी पोहोचले.
सतीश सालियन यांनी १६ सप्टेंबर रोजी आदित्य ठाकरे यांनी सोशल मीडियावर केलेल्या काही वक्तव्यांवर आक्षेप घेतला आहे. त्यांच्या मुलीच्या मृत्यूबाबत नव्याने चौकशीची मागणी करण्यामागे राजकीय हेतू असल्याचे चित्र निर्माण केले जात असल्याचा दावा त्यांनी केला आहे. याच पार्श्वभूमीवर त्यांनी मानहानीचा दावा दाखल करण्याची भूमिका घेतली असून, नोटिशीत माफी मागणे, संबंधित वक्तव्य मागे घेणे आणि ५०० कोटी रुपयांची नुकसानभरपाई देण्याची मागणी करण्यात आली आहे. शनिवारी मातोश्रीवर जाण्यापूर्वी सतीश सालियन यांनी माध्यमांशी संवाद साधला. “मला कोणीही कंट्रोल करू शकत नाही. फक्त देव मला कंट्रोल करू शकतो,” अशा शब्दांत त्यांनी आपली भूमिका स्पष्ट केली. आपल्या मुलीच्या प्रकरणात आपण कायदेशीर मार्गाने लढा देत असल्याचेही त्यांनी सांगितले.
Babasaheb Patil : मोठी बातमी! सहकारमंत्र्यांच्या संचालकपदावर टांगती तलवार!
सतीश सालियन आणि त्यांचे वकील मातोश्रीवर पोहोचल्याने परिसरात मोठी गर्दी झाली. परिस्थिती लक्षात घेता पोलिसांचा बंदोबस्तही तैनात करण्यात आला होता. नोटीस स्वीकारण्यासाठी आदित्य ठाकरे यांच्या कायदेशीर प्रतिनिधींकडून व्यवस्था करण्यात आल्याची माहिती समोर आली. यामुळे मातोश्रीच्या प्रवेशद्वारावर काही काळ तणावाचे वातावरण निर्माण झाले. दरम्यान, सतीश सालियन यांनी यापूर्वीच १९ सप्टेंबर रोजी मातोश्रीवर प्रत्यक्ष जाऊन नोटीस देणार असल्याची माहिती मुंबई पोलिसांना दिली होती. त्यासाठी त्यांनी पुरेशा पोलिस सुरक्षेची मागणी केली होती.
या प्रकरणात आदित्य ठाकरे यांनी दिशा सालियन यांना आपण कधीही भेटलो नसल्याचे सांगितले आहे. तसेच आपल्याला या प्रकरणाशी जोडण्याचा प्रयत्न हा राजकीय हेतूने केला जात असल्याचा दावा त्यांनी केला आहे. त्यामुळे सतीश सालियन यांची कायदेशीर नोटीस आणि आदित्य ठाकरे यांची भूमिका यामुळे प्रकरणाला आणखी कायदेशीर व राजकीय वळण मिळाले आहे. दिशा सालियन प्रकरणाच्या तपासासंदर्भात सध्या केंद्रीय अन्वेषण विभागाकडून प्रक्रिया सुरू आहे. त्यामुळे या प्रकरणातील पुढील कायदेशीर घडामोडींकडे सर्वांचे लक्ष लागले आहे.
__
