भूसंपादन प्रक्रियेला स्थगितीची मंत्र्यांकडे मागणी
Yavatmal : नेर-दारव्हा मार्गावरील प्रस्तावित जागेऐवजी वटफळी येथे सुरू असलेल्या एमआयडीसीच्या जमीन हस्तांतरण व भूसंपादन प्रक्रियेला स्थगिती द्यावी, अशी मागणी भाजपचे तालुकाप्रमुख नीलेश राठोड यांनी महसूलमंत्री चंद्रशेखर बावनकुळे यांच्याकडे निवेदनाद्वारे केली आहे. त्यामुळे नेरच्या प्रस्तावित औद्योगिक क्षेत्राच्या जागेचा प्रश्न पुन्हा चर्चेत आला असून, यावरून स्थानिक राजकीय वातावरण तापण्याची शक्यता निर्माण झाली आहे.
नेर शहराच्या जवळून जाणाऱ्या नेर-दारव्हा मार्गावर एमआयडीसी उभारावी, अशी मागणी यापूर्वीही करण्यात आली होती. शहराच्या भौगोलिक स्थितीचा विचार करता ही जागा औद्योगिक विकासासाठी उपयुक्त ठरू शकते, असा स्थानिक पातळीवरील दावा करण्यात आला होता. मात्र, प्रशासनाच्या पातळीवर पुढील कार्यवाही अपेक्षित गतीने झाली नसल्याची भूमिका स्थानिक पदाधिकाऱ्यांकडून मांडण्यात आली.
दरम्यान, वटफळी येथे औद्योगिक क्षेत्रासाठी जमीन उपलब्ध करून देण्याच्या दृष्टीने भूसंपादनाची प्रक्रिया सुरू असल्याची माहिती समोर आली आहे. एप्रिल २०२६ मध्ये झालेल्या आढावा बैठकीत वटफळी येथील औद्योगिक क्षेत्रासाठी जमीन उपलब्ध करून देण्याच्या प्रक्रियेचा आढावा घेण्यात आला होता. त्यानंतर या प्रक्रियेला पुढे नेण्यासाठी संबंधित यंत्रणांना टप्प्याटप्प्याने जमीन उपलब्ध करून देण्याच्या सूचना देण्यात आल्याचे सांगण्यात येते.
याच पार्श्वभूमीवर नीलेश राठोड यांनी महसूलमंत्र्यांकडे निवेदन सादर करून वटफळी येथील जमीन हस्तांतरणाची प्रक्रिया तातडीने थांबवून तिची चौकशी करण्याची मागणी केली आहे. प्रस्तावित जागेत बदल करण्यामागील कारणे, शासकीय जमिनीचा वापर, भूसंपादनासाठी अवलंबण्यात येणारे निकष तसेच या प्रक्रियेमुळे शासनावर पडणारा संभाव्य आर्थिक भार याबाबत स्पष्टता द्यावी, अशी मागणीही निवेदनातून करण्यात आली आहे.
राजकीय संघर्षानंतर दिलजमाई?; वडेट्टीवार बॅकफूटवर, धानोरकरांसोबतचे वैर संपल्याची घोषणा
विशेष म्हणजे, मे २०२६ मध्ये नेर-दारव्हा मार्गावरील प्रस्तावित जागेसंदर्भात तहसीलदारांकडेही निवेदन देण्यात आले होते. त्यामुळे काही महिन्यांतच एमआयडीसीच्या जागेचा मुद्दा पुन्हा ऐरणीवर आल्याचे चित्र आहे. आता हे प्रकरण थेट महसूलमंत्र्यांपर्यंत पोहोचल्याने प्रशासनाच्या भूमिकेकडे लक्ष लागले आहे.
भाजपचा नागपूरसह पुण्यावरही दावा; शिवसेना-राष्ट्रवादी अस्वस्थ
नेरच्या एमआयडीसीचा प्रश्न हा केवळ जागा निश्चित करण्यापुरता मर्यादित नसून, स्थानिक युवकांना रोजगाराच्या संधी, नवीन उद्योगांची निर्मिती, पायाभूत सुविधांचा विकास आणि परिसराच्या भविष्यातील आर्थिक प्रगतीशी संबंधित असल्याचे स्थानिक स्तरावर सांगितले जात आहे. त्यामुळे एमआयडीसी नेमकी कोणत्या ठिकाणी उभारली जाणार, वटफळीची निवड कोणत्या निकषांवर करण्यात आली आणि पूर्वी चर्चेत असलेल्या नेर-दारव्हा मार्गावरील जागेत बदल का करण्यात आला, याबाबत प्रशासनाकडून अधिकृत स्पष्टीकरण काय येते हे पाहणे महत्त्वाचे ठरणार आहे.
