Chief Minister Devendra Fadnavis along with Union Minister Nitin Gadkari performed the foundation stone laying and dedication of four projects : मुख्यमंत्री देवेंद्र फडणवीस व केंद्रीय मंत्री नितीन गडकरी यांची प्रमुख उपस्थिती
Nagpur : जननायक, ‘धरती आबा’ भगवान बिरसा मुंडा यांच्या १५०व्या जयंतीनिमित्त आयोजित जनजातीय गौरव वर्ष अंतर्गत राज्यस्तरीय आदिवासी सांस्कृतिक महोत्सवात आज महाराष्ट्रात आदिवासी विकासाच्या दिशेने मोठे पाऊल टाकले गेले. मुख्यमंत्री देवेंद्र फडणवीस यांनी केंद्रीय मंत्री नितीन गडकरी यांच्या समवेत आदिवासी विकास विभागाच्या महत्त्वपूर्ण प्रकल्पांचे ऑनलाइन भूमिपूजन आणि लोकार्पण केले.
कार्यक्रमात मुख्यमंत्री फडणवीस म्हणाले की, भगवान बिरसा मुंडा हे जल, जंगल, जमीन यासाठी लढणारे अद्वितीय क्रांतीकारक होते. त्यांच्या स्मरणार्थ आदिवासी समाजाच्या प्रगतीसाठी महाराष्ट्र सरकार कटिबद्ध आहे. तर केंद्रीय मंत्री नितीन गडकरी यांनी प्रकल्पांमुळे विदर्भासह संपूर्ण राज्यातील आदिवासी शिक्षण, संस्कृती आणि पायाभूत सुविधा अधिक मजबूत होतील, असे सांगितले.
आज भूमिपूजन व लोकार्पण झालेले महत्त्वाचे प्रकल्प :
सुराबर्डी, नागपूर येथे गोंडवाना आदिवासी सांस्कृतिक संग्रहालय व संशोधन-प्रशिक्षण उपकेंद्राचे भूमिपूजन. या प्रकल्पामुळे विदर्भातील आदिवासी समाजाचा इतिहास, परंपरा, नृत्य, कला, साहित्य आणि जीवनशैली यांचे जतन व संशोधनासाठी एक आधुनिक केंद्र उपलब्ध होणार आहे. संशोधक, विद्यार्थी आणि पर्यटकांसाठी ही सुविधा महत्त्वाची ठरेल.
Winter Session : नागपुरात 28 नोव्हेंबरपासून विधानमंडळ सचिवालयाचे कामकाज सुरू !
शासकीय आश्रमशाळा, घानवळ (जव्हार, पालघर) इमारतीचे लोकार्पण. नवीन इमारतीमुळे आदिवासी विद्यार्थ्यांना दर्जेदार शैक्षणिक वातावरण, सुरक्षित निवास आणि मूलभूत सुविधा अधिक उपलब्ध होतील.
शासकीय आश्रमशाळा, पळसुंडा (जव्हार, पालघर) प्रयोगशाळा इमारतीचे लोकार्पण. विज्ञान शिक्षणाला चालना देण्यासाठी अत्याधुनिक प्रयोगशाळा उभारण्यात आली आहे. विद्यार्थ्यांना प्रत्यक्ष शिक्षणाची संधी वाढेल.
शासकीय आश्रमशाळा, देवगाव (नाशिक) मुलींच्या वसतिगृहाचे लोकार्पण. आदिवासी मुलींसाठी सुरक्षित, सुसज्ज आणि आधुनिक वसतिगृहाची सोय उपलब्ध झाली असून मुलींच्या शैक्षणिक प्रवासाला मोठी मदत होणार आहे. या प्रकल्पांमुळे राज्यातील आदिवासी समाजाच्या सांस्कृतिक जतनासह शिक्षण, प्रशिक्षण आणि मुलींच्या सुरक्षिततेमध्ये लक्षणीय वाढ होईल, असा विश्वास मुख्यमंत्र्यांनी व्यक्त केला. भगवान बिरसा मुंडा यांच्या जयंतीनिमित्त आदिवासी विकासाला गती देणारी ही उपक्रममाला राज्यासाठी ऐतिहासिक ठरेल, असे मतही या प्रसंगी व्यक्त झाले.
