sahukar-sexual-exploitation-case-amit-sawant-arrested-maharashtra-crime : व्याजाच्या नावाखाली महिलांवर अत्याचाराचा आरोप, आरोपी अटकेत
Mumbai : राज्यात अलीकडे उघडकीस आलेल्या विविध धक्कादायक घटनांदरम्यान आता कोल्हापुरातून आणखी एक गंभीर आणि संतापजनक प्रकरण समोर आले असून व्याजाच्या व्यवहाराच्या नावाखाली महिलांचे लैंगिक शोषण केल्याचा आरोप असलेल्या सावकाराला पोलिसांनी अटक केली आहे. या प्रकरणामुळे राज्यभरात खळबळ उडाली आहे.
या प्रकरणातील आरोपी म्हणून अमित सावंत याचे नाव समोर आले असून तो कारचालक असतानाच खाजगी सावकारी करत असल्याची माहिती तपासातून पुढे आली आहे. गांधीनगर पोलीस ठाणे येथे दाखल झालेल्या गुन्ह्यानुसार, आर्थिक अडचणीत असलेल्या एका महिलेने काही वर्षांपूर्वी आरोपीकडून व्याजाने पैसे घेतले होते. काही काळ नियमित परतफेड केल्यानंतर आर्थिक परिस्थिती बिघडल्याने ती रक्कम देणे शक्य झाले नाही.
Sanjay gaikwad : ‘शिवाजी कोण होता’ पुस्तकावरून राज्यात राजकीय वादाचा स्फोट
त्यानंतर आरोपीने या परिस्थितीचा गैरफायदा घेत महिलेच्या घरी जाऊन जबरदस्तीने अत्याचार केल्याचा गंभीर आरोप पीडितेकडून करण्यात आला आहे. एवढ्यावरच न थांबता त्या घटनेचा व्हिडिओ काढून त्याच्या आधारे वारंवार धमकावत पुन्हा अत्याचार केल्याचेही तक्रारीत नमूद आहे. या घटनेनंतर पीडितेने धाडस करून पोलिसांकडे धाव घेतल्यावर संपूर्ण प्रकार उघड झाला.
पीडित महिलेने केलेल्या दाव्यानुसार आरोपीच्या मोबाईलमध्ये अशा प्रकारचे 200 ते 300 अश्लील व्हिडिओ असल्याची शक्यता व्यक्त करण्यात आली असून अनेक महिलांना अशाच पद्धतीने जाळ्यात अडकवून त्यांचे शोषण करण्यात आल्याचा आरोप करण्यात आला आहे. यामुळे या प्रकरणाची व्याप्ती अधिक मोठी असण्याची शक्यता पोलिसांकडून तपासली जात आहे.
तसेच आरोपीने संबंधित व्हिडिओ इतरांना दाखवल्याचा आरोपही समोर आला असून या प्रकरणात त्याच्या काही साथीदारांची भूमिकाही तपासली जात आहे. पीडित महिलेने आरोपीच्या मित्रांवर आणि काही नातेवाईकांवरही गंभीर आरोप केले असून पोलिस या सर्व बाबींची चौकशी करत आहेत.
Baramati bypoll voting : 2029 साठी पुन्हा ‘पवार विरुद्ध पवार’ची शक्यता चर्चेत !
या प्रकरणाचे गांभीर्य लक्षात घेऊन पोलिसांनी आरोपीला तात्काळ अटक केली असून पुढील तपास सुरू आहे. दरम्यान, अशा प्रकारच्या गुन्ह्यांचा बळी ठरलेल्या इतर महिलांनी पुढे येऊन तक्रार करावी, असे आवाहन करण्यात आले आहे. येत्या काळात आणखी पीडित महिला पुढे आल्यास या प्रकरणाचे स्वरूप अधिक व्यापक होण्याची शक्यता व्यक्त केली जात आहे.
