ladki-bahin-yojana-fraud-nandurbar-710-male-applications-rejected : पुरुषांचे बनावट अर्ज; प्रशासनाच्या सतर्कतेमुळे सरकारी निधी वाचला
Mumbai: राज्य सरकारची आर्थिकदृष्ट्या दुर्बल महिलांना सक्षम करण्यासाठी राबवली जाणारी मुख्यमंत्री माझी लाडकी बहीण योजना सध्या नंदुरबार जिल्ह्यात उघडकीस आलेल्या एका धक्कादायक गैरप्रकारामुळे चर्चेत आली आहे. महिलांसाठी राखीव असलेल्या या योजनेचा लाभ मिळवण्यासाठी तब्बल ७१० पुरुषांनी खोटी माहिती देत ऑनलाईन अर्ज केल्याचा प्रकार समोर आला असून, जिल्हा प्रशासनाच्या सतर्कतेमुळे हा घोटाळा वेळेत उघडकीस आला आहे.
नंदुरबार जिल्हा महिला व बालकल्याण विभागाकडून योजनेसाठी प्राप्त झालेल्या अर्जांची सध्या सखोल छाननी सुरू आहे. या प्रक्रियेदरम्यान आधार कार्ड, बँक खाते तपशील आणि अर्जातील लिंगाची माहिती यांची पडताळणी करताना काही अर्जांमध्ये विसंगती आढळून आली. संशय बळावल्यानंतर अधिक तपास करण्यात आला असता, महिलांसाठी असलेल्या योजनेत प्रत्यक्षात पुरुषांनी अर्ज सादर केल्याचे स्पष्ट झाले. या अर्जांसोबत आवश्यक कागदपत्रे जोडून योजनेचा आर्थिक लाभ मिळवण्याचा जाणीवपूर्वक प्रयत्न करण्यात आल्याचे प्राथमिक तपासात समोर आले आहे.
Finance Commission funds stalled : वित्त आयोगाचा निधी रखडला; जिल्ह्यातील ११ नगरपरिषदा आर्थिक कोंडीत
हा प्रकार निदर्शनास येताच जिल्हा प्रशासनाने तातडीने कारवाई करत सर्व ७१० पुरुष अर्जदारांचे अर्ज अपात्र ठरवून पोर्टलवरून रद्द केले आहेत. प्रशासनाने दिलेल्या माहितीनुसार, प्राथमिक छाननीच्या टप्प्यातच हा गैरप्रकार पकडला गेल्यामुळे एकाही अर्जदाराच्या खात्यात योजनेचा निधी जमा झालेला नाही. त्यामुळे संभाव्य आर्थिक नुकसान टळले असून शासकीय निधीचा गैरवापर रोखण्यात यश आले आहे.
या घटनेनंतर जिल्हा प्रशासनाने अर्ज तपासणी प्रक्रियेत अधिक कठोर उपाययोजना राबवण्याचा निर्णय घेतला आहे. यापुढे प्रत्येक अर्ज आणि त्यासोबत सादर करण्यात येणाऱ्या कागदपत्रांची सूक्ष्म पातळीवर तपासणी करण्यात येणार असल्याचे प्रशासनाकडून स्पष्ट करण्यात आले आहे.
Buldhana Zilla Parishad : बुलढाणा जिल्हा परिषद निवडणूक लांबणीवर; चिखलीतील इच्छुकांचा खर्चावर ‘ब्रेक’
महिलांसाठी असलेल्या योजनेत खोटी माहिती देऊन अर्ज करणे हा शासनाची फसवणूक करण्याचा प्रयत्न असल्याचे मानले जात असून, संबंधित अर्जदारांवर कायदेशीर कारवाई होणार का याकडे आता सर्वांचे लक्ष लागले आहे. या प्रकारामुळे जिल्ह्यात खळबळ उडाली असून, योजनेच्या पारदर्शकतेबाबत चर्चा सुरू झाली आहे. प्रशासनाच्या सतर्कतेमुळे मोठा गैरप्रकार उघडकीस आला असला तरी भविष्यात असे प्रकार घडू नयेत यासाठी अधिक कडक नियंत्रण यंत्रणा उभारण्याची गरज व्यक्त केली जात आहे.
