MLA’s full brother on BJP path : आमदाराचा सख्खा भाऊ भाजपच्या वाटेवर
Beed: बीड जिल्ह्यातील राजकारणात मोठी खळबळ उडाली आहे. शरद पवार गटाचे आमदार संदीप क्षीरसागर यांना आता घरच्याच मंडळींकडून राजकीय धक्का बसण्याची शक्यता आहे. त्यांचे सख्खे भाऊ हेमंत क्षीरसागर भाजपच्या वाटेवर असल्याची पुष्टी स्वतः हेमंत क्षीरसागर यांनी केली आहे. स्थानिक स्वराज्य संस्थांच्या निवडणुका जवळ आल्याने बीडच्या राजकीय गणितात मोठा बदल घडताना दिसत आहे.
स्थानिक स्वराज्य संस्थांच्या निवडणुका येत्या २ डिसेंबर रोजी होणार असून ३ डिसेंबरला मतमोजणी होईल. या निवडणुकांकडे ‘मिनी विधानसभा निवडणुका’ म्हणून पाहिले जात असल्याने सर्वच पक्षांनी कंबर कसली आहे. या पार्श्वभूमीवर राज्यात मोठ्या प्रमाणात पक्षांतर होत असून, बीडमध्ये क्षीरसागर बंधूंच्या वेगळ्या वाटांनी सगळ्यांचे लक्ष वेधून घेतले आहे.
Congress : काँग्रेसला कमकुवत करण्यात शरद पवारांसह विरोधी पक्षांची भूमिका !
आतापर्यंत आमदार संदीप क्षीरसागर यांच्या सोबत राजकारणात सक्रिय असलेले हेमंत क्षीरसागर यांनी आता भाजपमध्ये प्रवेश करण्याचा निर्णय घेतला आहे. “विकासाचा दृष्टिकोन आणि स्थिरतेचा विचार करून मी भाजपसोबत जाण्याचा निर्णय घेतला आहे,” असे हेमंत क्षीरसागर यांनी स्पष्ट केले.
या निर्णयामुळे शरद पवार गटासाठी आणि आमदार संदीप क्षीरसागर यांच्यासाठी मोठे आव्हान उभे राहिले आहे. आतापर्यंत भावांची राजकीय एकजूट बीडच्या राजकारणात चर्चेचा विषय होती, मात्र आता एकाच घरात दोन भिन्न राजकीय विचारांचे प्रवाह दिसत आहेत.
गेल्या काही वर्षांत संदीप क्षीरसागर हे बीडमधील आक्रमक भूमिकेमुळे चर्चेत होते. त्यांनी सरपंच संतोष देशमुख यांच्या हत्येप्रकरणी आवाज उठवला होता आणि त्या प्रकरणात धनंजय मुंडे यांना मंत्रिपदाचा राजीनामा द्यावा लागला होता. आता त्यांच्या सख्ख्या भावानेच भाजप मध्ये जाण्याची इच्छा दाखवल्याने स्थानिक पातळीवर नवे समीकरण तयार होण्याची चिन्हे आहेत.
Local Body Elections : सपकाळांनी चिखलीतून दिला ‘सत्ता परत मिळवू’चा नारा !
या घडामोडीमुळे बीडमधील आगामी नगरपालिका आणि जिल्हा परिषद निवडणुका अधिक रंगतदार होण्याची शक्यता आहे. क्षीरसागर बंधूंच्या राजकीय मतभेदांमुळे शरद पवार गटासमोर नवीन डोकेदुखी निर्माण झाली असून, भाजपला मात्र या विकासातून मोठा राजकीय फायदा मिळू शकतो, अशी चर्चा राजकीय वर्तुळात सुरू आहे.
________
