समाजमाध्यमांवरील छायाचित्रांमुळे राजकीय चर्चांना उधाण; भाजपचे दिग्गज नेते सोबत नसल्याने तर्कवितर्क
Washim : भाजपच्या नेत्या पंकजा मुंडे आणि आमदार श्वेता महाले यांनी माहूरगडावरील दर्शनानंतर वाशिम शहरात थांबून काही जणांची भेट घेतली. या भेटींची छायाचित्रे समाजमाध्यमांवर झळकताच जिल्ह्याच्या राजकीय वर्तुळात चर्चांना सुरुवात झाली. पंकजाताईंनी नेमक्या कोणाकोणाची भेट घेतली, त्यांच्या या भेटी केवळ सदिच्छा होत्या की त्यामागे काही राजकीय संदर्भ आहेत, याबाबत उत्सुकता निर्माण झाली आहे.
माहूरगडावरील दर्शन आटोपून परतताना या दोघीही वाशिममध्ये थांबल्या. या भेटीदरम्यान काही व्यक्तींशी झालेल्या भेटींची छायाचित्रे समाजमाध्यमांवर प्रसारित झाली. त्यानंतर या भेटींच्या स्वरूपाबाबत राजकीय चर्चांना वेग आला. मात्र, भेटींचा नेमका तपशील समोर आलेला नसल्याने चर्चांना अनेक पदर फुटत आहेत.
या दौऱ्यातील विशेष बाब म्हणजे, वाशिम जिल्ह्यातील भाजपच्या काही प्रमुख नेत्यांसोबतची छायाचित्रे समोर आलेली नाहीत. त्यामुळे या नेत्यांच्या भेटी झाल्या होत्या की नाही, असा प्रश्न उपस्थित केला जात आहे. काहींच्या मते, दौरा खासगी स्वरूपाचा असल्याने भेटीगाठींचा जाहीर गाजावाजा टाळण्यात आला असावा. मात्र, याबाबत कोणतीही अधिकृत माहिती समोर आलेली नाही.
विजयादशमीआधीच मडावींचे ‘सीमोल्लंघन’; शिंदेसेनेत प्रवेशाने गडचिरोलीच्या राजकारणात चर्चांना उधाण
डॉ. दिनकर प्रभुजी गर्जे यांच्याकडे पंकजाताईंचा नियोजित कार्यक्रम होता आणि त्या तेथेच येणार होत्या, अशीही चर्चा राजकीय वर्तुळात ऐकायला मिळत आहे. या नियोजित कार्यक्रमाव्यतिरिक्त अन्य कोणत्या भेटी झाल्या, याबाबत मात्र स्पष्टता नाही. त्यामुळे समाजमाध्यमांवर झळकलेल्या छायाचित्रांमधून समोर आलेल्या भेटींपेक्षा चर्चेत असलेल्या आणि अद्याप स्पष्ट न झालेल्या भेटींबाबतच अधिक उत्सुकता दिसत आहे.
पदवीधर वेतनश्रेणीचा तिढा कायम! विदर्भातील ६ हजार शिक्षक नाराज; निवडणुकीत राजकीय पक्षांची कसोटी
पंकजा मुंडे या भाजपच्या प्रमुख नेत्या असल्याने त्यांच्या प्रत्येक राजकीय दौऱ्याकडे कार्यकर्ते आणि राजकीय निरीक्षकांचे लक्ष असते. वाशिममधील या थांब्यालाही त्याला अपवाद ठरता आले नाही. सध्या उपलब्ध माहितीनुसार या भेटींमागे कोणताही विशिष्ट राजकीय हेतू असल्याचे स्पष्ट झालेले नाही. मात्र, भेटींचा तपशील, उपस्थित व्यक्ती आणि दौऱ्याचे स्वरूप याबाबत अधिक माहिती समोर आल्यानंतरच या घडामोडींचे राजकीय संदर्भ स्पष्ट होऊ शकतो पण सध्या स्थानिक राजकारणात चर्चा मात्र चांगलीच रंगत आहे.
