Vanchit claims the support of 42 corporators : महापौरपद अद्याप अनिश्चित, ४२ नगरसेवकांचा पाठिंबा असल्याचा वंचितचा दावा
Akola अकोला महानगरपालिकेत सत्ता स्थापन करण्यासाठी शहरातील राजकीय घडामोडींना वेग आला आहे. भाजपविरोधी समविचारी पक्षांची आघाडी स्थापन करण्याची रणनीती ठरली असली, तरी महापौरपदाचा उमेदवार अद्याप निश्चित झालेला नाही.
महानगरपालिका निवडणुकीत २१ जागा जिंकून दुसऱ्या क्रमांकाचे संख्याबळ मिळवलेल्या काँग्रेसकडून भाजपविरोधी समविचारी पक्षांची सत्ता स्थापन करण्यासाठी नगरसेवकांची जुळवाजुळव सुरू आहे. या प्रयत्नांचा भाग म्हणून २२ जानेवारी रोजी काँग्रेससह इतर समविचारी पक्षांचे नेते व नगरसेवकांनी वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांची भेट घेतली. यावेळी महानगरपालिकेत भाजपविरोधी आघाडी स्थापन करण्याबाबत सविस्तर चर्चा करण्यात आली.
Chandrashekhar Bawankule : अंतर्गत वादावर पडदा! पालकमंत्री आज नगरसेवकांसोबत करणार वन-टू-वन चर्चा
महानगरपालिकेत सत्ता स्थापनेसाठी आपल्याकडे ४२ नगरसेवकांचा पाठिंबा असल्याचा दावा वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी प्रसारमाध्यमांशी बोलताना केला. काँग्रेससोबत जाण्यास आम्ही सकारात्मक असून सत्ता स्थापनेसाठी आवश्यक ‘मॅजिक फिगर’ आमच्याकडे आहे, असा ठाम विश्वास त्यांनी व्यक्त केला.
पुढील पाच वर्षांच्या कालावधीत आघाडीतील घटक पक्षांना कोणती पदे देण्यात येणार, याचा आराखडा तयार करण्यात आला असून सर्वांची सहमती झाल्यानंतरच महापौरपदाचा उमेदवार जाहीर करण्यात येईल, असेही ॲड. आंबेडकर यांनी स्पष्ट केले.
