beed-santosh-deshmukh-murder-case-supreme-court-rejects-walmik-karad-bail-krishna-andhale-update : जामीन अर्ज फेटाळला, कृष्णा आंधळे गावात आल्याच्या चर्चेने खळबळ
New Delhi : बीड जिल्ह्यातील संतोष देशमुख हत्या प्रकरणात मोठी घडामोड घडली असून आरोपी वाल्मिक कराड याचा जामीन अर्ज सर्वोच्च न्यायालयाने फेटाळला आहे. न्यायमूर्ती एम. एम. सुंदरेश यांच्या समोर झालेल्या सुनावणीत सर्वोच्च न्यायालयाने जामीन मंजूर करण्यास नकार दिला. याआधीही औरंगाबाद खंडपीठ तसेच बीड जिल्हा न्यायालयाने कराड याचा जामीन आणि दोषमुक्ती अर्ज फेटाळला होता.
या प्रकरणाची पहिली सुनावणी 19 फेब्रुवारी रोजी झाली होती. त्यानंतर आज झालेल्या सुनावणीत सर्वोच्च न्यायालयाने कराडला दिलासा देण्यास नकार दिला. मात्र, खटल्याची सुनावणी दीर्घकाळ प्रलंबित राहिल्यास वर्षभरानंतर पुन्हा जामिनासाठी अर्ज करण्याची मुभा असल्याचे स्पष्ट करण्यात आले आहे.
दरम्यान, संतोष देशमुख हत्या प्रकरणातील फरार आरोपी कृष्णा आंधळे हा तीन वेळा आपल्या गावी येऊन गेल्याचा गंभीर आरोप देशमुख यांचे बंधू धनंजय देशमुख यांनी केला आहे. त्यांनी ही माहिती सीआयडीला दिल्याचे सांगितले असून कुटुंबाला आरोपीपासून धोका असल्याचा दावा केला आहे. कृष्णा आंधळे मोबाईलचा वापर करत नसल्याने त्याचा माग काढणे कठीण जात असल्याचेही त्यांनी नमूद केले.
संतोष देशमुख, मस्साजोग येथील सरपंच, यांची 9 डिसेंबर 2024 रोजी अपहरण करून हत्या करण्यात आल्याचा आरोप आहे. 10 डिसेंबर रोजी जयराम चाटे आणि महेश केदार यांना अटक करण्यात आली. त्यानंतर घुले, विष्णू चाटे, सुदर्शन घुले, सुधीर सांगळे आणि सिद्धार्थ सोनवणे यांना विविध ठिकाणांहून अटक करण्यात आली. या प्रकरणात कृष्णा आंधळे हा अद्याप फरार असून पोलिसांकडून त्याचा शोध सुरू आहे.
Rohit pawar : “बिघडलेले विमान अजितदादांना दिले का?” एफआयआर नोंदवण्यास नकारावर रोहित पवारांचा संताप
धनंजय देशमुख यांनी सर्वोच्च न्यायालयातील सुनावणीपूर्वी कॅव्हेट दाखल करत आपले म्हणणे न्यायालयासमोर मांडण्याची तयारी दर्शवली होती. दीड वर्षांपासून कुटुंब न्यायाच्या प्रतीक्षेत असल्याचे त्यांनी नमूद केले.
पोलिसांनी दाखल केलेल्या आरोपपत्रात वाल्मिक कराड हा हत्येचा सूत्रधार असल्याचा दावा करण्यात आला आहे. आवादा कंपनीकडून खंडणी मागण्याच्या वादातून ही हत्या घडल्याचे आरोपपत्रात नमूद आहे. खंडणी, ॲट्रॉसिटी आणि हत्या या तिन्ही गुन्ह्यांचा एकत्रित उल्लेख करण्यात आला आहे.
love jihad law : भिगवण प्रकरणानंतर महाराष्ट्रात लव्ह जिहादविरोधी कायद्याची गती
एकीकडे कृष्णा आंधळे गावात येऊन गेल्याच्या चर्चेमुळे खळबळ उडाली असताना, दुसरीकडे सर्वोच्च न्यायालयाने वाल्मिक कराडचा जामीन अर्ज फेटाळल्याने आरोपी पक्षाला मोठा धक्का बसला आहे. आता या प्रकरणातील खटल्याची सुनावणी किती वेगाने पुढे सरकते आणि फरार आरोपीला कधी अटक होते, याकडे राज्याचे लक्ष लागले आहे.
__
