ugc-net-2026-question-paper-error-english-commerce-sociology-exam-retest-nta : इंग्रजी, कॉमर्स, समाजशास्त्र विषयाबाबत एनटीएचा मोठा निर्णय
New Delhi : राष्ट्रीय चाचणी संस्थेने अर्थात एनटीएने यूजीसी-नेट जून २०२६ परीक्षेबाबत मोठा निर्णय घेतला आहे. इंग्रजी, कॉमर्स आणि समाजशास्त्र या तीन विषयांच्या प्रश्नपत्रिकांमध्ये त्रुटी असल्याच्या उमेदवारांच्या तक्रारीनंतर या विषयांची परीक्षा पुन्हा घेण्यात येणार आहे. उमेदवारांच्या हिताचा विचार करून हा निर्णय घेण्यात आल्याचे एनटीएकडून स्पष्ट करण्यात आले आहे.
एनटीएने जून २०२६ मध्ये देशभरातील विविध परीक्षा केंद्रांवर एकूण ८७ विषयांसाठी यूजीसी-नेट परीक्षा आयोजित केली होती. ही परीक्षा २२ जून ते ३० जून २०२६ या कालावधीत घेण्यात आली. विद्यापीठे आणि पदवी महाविद्यालयांमध्ये कनिष्ठ संशोधन फेलोशिप, सहाय्यक प्राध्यापक पदासाठी पात्रता तसेच पीएचडी अभ्यासक्रमांच्या प्रवेशासाठी यूजीसी-नेट परीक्षा महत्त्वाची मानली जाते.
परीक्षा पार पडल्यानंतर इंग्रजी, कॉमर्स आणि समाजशास्त्र या विषयांच्या प्रश्नपत्रिकांबाबत उमेदवारांनी तक्रारी केल्या. काही प्रश्नांमध्ये चुका असल्याचा दावा करण्यात आला. त्याचबरोबर प्रश्नपत्रिकेतील भाषेच्या वापराबाबतही उमेदवारांनी आक्षेप नोंदवले. प्रश्नपत्रिकांमधील त्रुटींवरून उमेदवारांमध्ये नाराजी निर्माण झाली. त्यानंतर एनटीएने या तक्रारींची दखल घेत संबंधित विषयांच्या प्रश्नपत्रिकांचे परीक्षण केले. विद्यार्थ्यांच्या हिताचे संरक्षण करण्यासाठी अखेर या तीन विषयांची परीक्षा पुन्हा घेण्याचा निर्णय घेण्यात आला.
Fda Notice : शाहरुख खान, अजय देवगण आणि टायगर श्रॉफ एफडीएच्या रडारवर!
यूजीसी-नेट जून २०२६ परीक्षेच्या ८४ विषयांच्या तात्पुरत्या उत्तरतालिका एनटीएकडून प्रसिद्ध करण्यात आल्या आहेत. मात्र इंग्रजी, कॉमर्स आणि समाजशास्त्र या तीन विषयांच्या उमेदवारांसाठी उत्तरतालिका प्रसिद्ध करण्यात आली नव्हती. यानंतर एनटीएकडून याबाबत अधिकृत माहिती देण्यात आली. उमेदवारांकडून प्राप्त झालेल्या तक्रारींचा विचार करून या तीन विषयांची परीक्षा रद्द करून नव्याने घेण्याचा निर्णय घेतल्याचे एनटीएने स्पष्ट केले.
एनटीएने उमेदवारांना तात्पुरत्या उत्तरतालिकेवर आक्षेप नोंदवण्याची संधी दिली आहे. यासाठी उमेदवारांना ऑनलाइन पद्धतीने आक्षेप नोंदवता येणार असून, प्रत्येक आक्षेपासाठी २०० रुपये प्रक्रिया शुल्क भरावे लागणार आहे. आक्षेप नोंदवण्याची प्रक्रिया १६ ऑगस्टपासून सुरू झाली असून, १८ ऑगस्टपर्यंत उमेदवारांना आपले आक्षेप नोंदवता येणार आहेत. उमेदवारांनी अधिकृत पोर्टलवर जाऊन प्रक्रिया पूर्ण करण्याचे आवाहन करण्यात आले आहे.
इंग्रजी, कॉमर्स आणि समाजशास्त्र या तीन विषयांची परीक्षा पुन्हा घेण्याचा निर्णय जाहीर झाला असला तरी नव्या परीक्षांच्या तारखा, वेळापत्रक आणि प्रवेशपत्राबाबतची माहिती एनटीएकडून स्वतंत्रपणे जाहीर करण्यात येणार आहे. या तिन्ही विषयांच्या उमेदवारांनी एनटीएच्या अधिकृत संकेतस्थळावर प्रसिद्ध होणाऱ्या सूचनांकडे लक्ष ठेवावे. परीक्षेची नवीन तारीख आणि वेळापत्रक जाहीर झाल्यानंतर त्यानुसार उमेदवारांना पुन्हा परीक्षा द्यावी लागणार आहे.
परीक्षेच्या नव्या वेळापत्रकाबाबत सोशल मीडियावर किंवा इतर माध्यमातून पसरवल्या जाणाऱ्या अपुऱ्या किंवा चुकीच्या माहितीकडे उमेदवारांनी दुर्लक्ष करावे, असे एनटीएने स्पष्ट केले आहे. नवीन परीक्षा तारीख, वेळापत्रक आणि प्रवेशपत्रासंदर्भातील माहिती केवळ एनटीएच्या अधिकृत संकेतस्थळावरूनच मिळवावी. विद्यार्थ्यांनी कोणत्याही अफवेवर विश्वास ठेवू नये आणि अधिकृत सूचनांनुसारच पुढील प्रक्रिया पूर्ण करावी, असे आवाहन करण्यात आले आहे.
प्रश्नपत्रिकेतील कथित त्रुटींमुळे निर्माण झालेल्या वादानंतर एनटीएच्या निर्णयामुळे इंग्रजी, कॉमर्स आणि समाजशास्त्र विषयांच्या हजारो उमेदवारांना पुन्हा परीक्षा देण्याची संधी मिळणार आहे. आता नव्या परीक्षेचे वेळापत्रक कधी जाहीर होते आणि परीक्षा कोणत्या पद्धतीने घेतली जाते, याकडे उमेदवारांचे लक्ष लागले आहे.
