Hussain Dalwai claims that Eknath Shinde’s first preference was Congress, but senior congress leaders opposed : हुसेन दलवाई यांच्या दाव्याने राजकीय खळबळ, उदय सामंतांचे प्रत्युत्तर
Mumbai महाराष्ट्राच्या राजकीय वर्तुळात पुन्हा एकदा एका मोठ्या दाव्यामुळे खळबळ उडाली आहे. शिवसेनेचे प्रमुख नेते व राज्याचे उपमुख्यमंत्री एकनाथ शिंदे यांची पहिली पसंती काँग्रेस पक्ष होती, असा दावा काँग्रेसचे ज्येष्ठ नेते हुसेन दलवाई यांनी केला आहे. मात्र आमच्याच पक्षातील काही वरिष्ठ नेत्यांनी त्यांच्या काँग्रेस प्रवेशाला तीव्र विरोध केला, असे दलवाई यांनी म्हटले.
काँग्रेसच्या केंद्रातील एका बड्या नेत्याने तर शिंदे यांना आधी आमदारकीचा राजीनामा द्या, त्यानंतर तुमच्या प्रवेशाबाबत विचार करू, असे सांगितले होते. या अटीमुळे आणि अंतर्गत विरोधामुळे शिंदे काँग्रेसमध्ये येऊ शकले नाहीत आणि त्यांना पक्षात न घेणे ही काँग्रेसची अत्यंत मोठी चूक ठरली, असा घणाघाती दावा दलवाई यांनी केला आहे.
दरम्यान, दलवाई यांच्या दाव्यानंतर सत्ताधारी पक्षांकडून तीव्र प्रतिक्रिया उमटल्या असून शिवसेनेचे नेते आणि राज्याचे उद्योगमंत्री उदय सामंत यांनी हा दावा पूर्णपणे हास्यास्पद असल्याचे म्हटले आहे. शिंदे हे बाळासाहेब ठाकरे आणि आनंद दिघे यांच्या विचारांचे निष्ठावंत पाठीराखे असून काँग्रेसमध्ये जाण्याचा प्रश्नच उद्भवत नाही, असे त्यांनी स्पष्ट केले.
Babanrao Taywade : जातनिहाय जनगणना होणार, आंदोलनाची गरज नाही
दुसरीकडे, अर्थराज्यमंत्री आशिष जयस्वाल यांनी यावर टीका करताना सांगितले की, स्वतःकडे मीडियाचे आणि लोकांचे लक्ष वेधून घेण्यासाठी आजकाल कोणीही काहीही वक्तव्य करतो, त्यामुळे अशा बिनबुडाच्या दाव्यांना फारसे महत्त्व देण्याची अजिबात गरज नाही. विशेष म्हणजे, या संपूर्ण प्रकरणावर काँग्रेसचे माजी प्रदेशाध्यक्ष नाना पटोले यांनी मात्र सावध भूमिका घेत या विषयावर कानावर हात ठेवले आहेत.
पक्षाच्या वरिष्ठ आणि मोठ्या नेत्यांच्या बंद दाराआड झालेल्या बैठकांमध्ये जर अशी काही चर्चा झाली असेल, तर त्याबद्दल मला कोणतीही माहिती नाही, असे सांगत पटोले यांनी या वादापासून स्वतःला लांब ठेवणेच पसंत केले आहे. दलवाई यांच्या या विधानामुळे महाविकास आघाडी आणि सत्ताधारी महायुती यांच्यात नवीन राजकीय वाद पेटण्याची शक्यता निर्माण झाली आहे.
