Birth and death certificates issued by Naib Tehsildars cancelled : नागरिकांची चिंता वाढली, अनेकांना बसू शकतो फटका
Akola जिल्ह्यातील विविध तालुक्यांमध्ये नायब तहसीलदारांकडून उशिराने दिले गेलेले जन्म आणि मृत्यू दाखले प्रशासनाने रद्द करण्याचा निर्णय घेतला आहे. हा निर्णय घेतल्यानंतर नागरिकांमध्ये मोठी चिंता निर्माण झाली आहे. संबंधित दाखले विविध शासकीय योजनांमध्ये आवश्यक असल्याने अनेकांना त्याचा फटका बसण्याची शक्यता आहे.
अनेक नागरिक वेळेत जन्म किंवा मृत्यू नोंदणी करू शकले नाहीत. त्यामुळे त्यांनी उशिराने दाखल्यांसाठी अर्ज केले होते. काही प्रकरणांमध्ये प्रशासनाच्या गलथान कारभारामुळे तर काही ठिकाणी नागरिकांच्या अज्ञानामुळे आवश्यक कागदपत्रे वेळेत सादर झाली नाहीत. परिणामी, उशिराने नोंदणी झालेल्या या दाखल्यांबाबत फेरतपासणी करण्यात आली.
प्रशासनाला चौकशीअंती असे आढळले की, काही दाखले नियमांचे पालन न करता किंवा आवश्यक कागदपत्रांच्या अभावी जारी करण्यात आले होते. यामुळेच संबंधित दाखले तातडीने रद्द करण्याचा निर्णय घेण्यात आला आहे.
या निर्णयामुळे अनेक नागरिक हवालदिल झाले आहेत. जन्म आणि मृत्यू दाखले हे विविध शासकीय लाभ, वारसा हक्क, शैक्षणिक आणि इतर अधिकृत प्रक्रियांसाठी महत्त्वाचे असतात. विशेषतः वृद्ध नागरिक आणि वारसाहक्काशी संबंधित व्यक्तींना याचा मोठा परिणाम जाणवेल. अनेकांनी प्रशासनाकडे नव्याने अर्ज स्वीकारण्याची मागणी केली आहे.
Akola-Washim District Central Bank : कर्ज पुनर्गठन घोटाळा पोहोचला विधिमंडळात!
नियमांचे उल्लंघन करून दिले गेलेले दाखलेच रद्द करण्यात आले आहेत. परंतु, ज्या नागरिकांना योग्य प्रक्रिया पूर्ण करून दाखले हवे असतील त्यांच्यासाठी नवीन मार्गदर्शक तत्त्वे लवकरच जाहीर केली जातील. प्रशासनाने नागरिकांना शांत राहण्याचे आवाहन केले असून, योग्य कागदपत्रांसह अर्ज करणाऱ्यांना न्याय मिळेल, असे स्पष्ट केले आहे.
