Appointment of guardian ministers will maintain the dominance of local leaders : जिल्ह्यांतील राजकीय वातावरणात मोठे बदल होण्याची शक्यता कमीच
Akola Amravati पश्चिम विदर्भातील अकोला, अमरावती, बुलढाणा आणि वाशिम या जिल्ह्यांमध्ये पालकमंत्र्यांची नियुक्ती करण्यात आली आहे. मुख्यमंत्री देवेंद्र फडणवीस यांच्या नेतृत्वाखाली शासनाने हे निर्णय घेतले आहेत. मात्र, या नियुक्त्या केवळ औपचारिक आहेत. प्रत्यक्ष जिल्ह्यांतील स्थानिक मातब्बर नेत्यांचाच खरा प्रभाव राहणार असल्याचे चित्र दिसत आहे.
शासनाने विविध जिल्ह्यांसाठी पालकमंत्री नेमले आहेत. तरीही स्थानिक स्तरावरील सर्व विकास निधीचे नियोजन हे पडद्यामागील प्रभावशाली नेत्यांच्याच हातात राहील, असे स्पष्ट संकेत आहेत. यामुळे नव्या पालकमंत्र्यांची भूमिका केवळ कागदोपत्री राहणार असल्याचे राजकीय जाणकारांचे मत आहे.
Nana Patole : नाना पटोलेंनी सांगितलं नागपुरातल्या आंदोलनामागील कारण !
अमरावती – अमरावतीचे पालकमंत्री म्हणून चंद्रशेखर बावनकुळे यांची नियुक्ती करण्यात आली आहे. परंतु त्यांच्याकडे नागपूरसारख्या मोठ्या जिल्ह्याची जबाबदारीही आहे. त्यामुळे अमरावतीसारख्या जिल्ह्यावर ते कितपत लक्ष केंद्रित करू शकतील, यावर शंका व्यक्त होत आहे.
अकोला – आकाश फुंडकर यांची अकोल्याचे पालकमंत्री म्हणून नियुक्ती झाली आहे. पण यापूर्वीचा अनुभव पाहता प्रत्यक्ष निर्णय प्रक्रिया आणि विकास कामांवर पडद्यामागून आमदार रणधीर सावरकर यांचाच प्रभाव राहील, असे स्थानिक सूत्रांचे मत आहे.
वाशिम – वाशिम जिल्ह्याचे पालकमंत्री म्हणून नियुक्ती झालेल्या मंत्र्यांकडे औपचारिक जबाबदारी आहे. प्रत्यक्ष प्रभाव मात्र आमदार सई डहाके आणि श्याम खोडे यांचाच राहणार आहे. जिल्ह्यातील राजकारणात त्यांचे वर्चस्व कायम राहील, अशी व्यवस्था केली गेली आहे.
बुलढाणा – बुलढाणा जिल्ह्याचे पालकमंत्रीपद साताऱ्याचे मकरंद पाटील यांच्याकडे देण्यात आले आहे. मात्र, हा निर्णय केवळ डॉ. संजय कुटे यांचे वर्चस्व कायम ठेवण्यासाठी करण्यात आल्याचे जाणवते. बुलढाणा जिल्ह्यातील सर्व विकास कामांवर डॉ. कुटे यांचाच प्रभाव राहणार असल्याचे स्पष्ट आहे.
मुख्यमंत्र्यांचा धोरणात्मक दृष्टिकोन
मुख्यमंत्री देवेंद्र फडणवीस यांनी पालकमंत्र्यांची नियुक्ती करताना स्थानिक राजकीय समीकरणांचा बारकाईने विचार केला आहे. मंत्री नसतानाही स्थानिक मातब्बर नेत्यांचे वर्चस्व कायम राहील, यासाठीची व्यवस्था केल्याचे स्पष्ट होते. त्यामुळे जिल्ह्यातील राजकीय वातावरणात कोणतेही मोठे बदल होण्याची शक्यता नाही. ही नियुक्ती आणि स्थानिक नेत्यांचा प्रभाव पाहता, पश्चिम विदर्भातील जिल्ह्यांमध्ये प्रत्यक्ष विकासकामांच्या अंमलबजावणीवर काय परिणाम होतो, हे पाहणे महत्त्वाचे ठरणार आहे.
