bombay-high-court-clerk-typing-test-cancelled-new-exam-date : हजारो उमेदवारांना पुन्हा संधी, नव्या परीक्षेची तारीख लवकरच
Mumbai : मुंबई उच्च न्यायालयाच्या लिपिक पदासाठी १६ ऑगस्ट रोजी राज्यातील विविध परीक्षा केंद्रांवर घेण्यात आलेल्या ऑनलाइन टंकलेखन चाचणीबाबत अखेर महत्त्वाचा निर्णय घेण्यात आला आहे. परीक्षेदरम्यान अनेक केंद्रांवर तांत्रिक अडचणी निर्माण झाल्याने उमेदवारांना मोठ्या त्रासाला सामोरे जावे लागले होते. काही ठिकाणी सर्व्हर डाऊन, संगणक आणि की-बोर्डमध्ये बिघाड तसेच इतर तांत्रिक समस्यांमुळे उमेदवारांना परीक्षा देता आली नव्हती. या पार्श्वभूमीवर १६ ऑगस्ट रोजी घेण्यात आलेली टंकलेखन चाचणी रद्द करण्याचा निर्णय मुंबई उच्च न्यायालयाच्या प्रशासनाने घेतला आहे.
या निर्णयामुळे परीक्षेदरम्यान अडचणींचा सामना करणाऱ्या उमेदवारांना मोठा दिलासा मिळाला आहे. आता ही टंकलेखन चाचणी पुन्हा घेण्यात येणार असून नव्या परीक्षेची तारीख नंतर अधिकृत संकेतस्थळावर जाहीर केली जाणार आहे. मुंबई उच्च न्यायालयातील लिपिक पदाच्या भरती प्रक्रियेत ऑनलाइन टंकलेखन चाचणी हा महत्त्वाचा टप्पा होता. या चाचणीमध्ये पात्र ठरणे उमेदवारांसाठी आवश्यक होते. त्यामुळे राज्यभरातील अनेक उमेदवार या परीक्षेला उपस्थित राहिले होते.
मात्र, १६ ऑगस्ट रोजी परीक्षा सुरू झाल्यानंतर काही परीक्षा केंद्रांवर तांत्रिक अडचणी निर्माण झाल्या. काही उमेदवारांच्या संगणकावर परीक्षा सुरू होण्यात अडथळे आले, तर काही ठिकाणी सर्व्हरशी संबंधित समस्या निर्माण झाल्याची तक्रार करण्यात आली. काही केंद्रांवर की-बोर्ड व्यवस्थित काम करत नसल्याने टंकलेखन करताना उमेदवारांना अडचणी आल्या. परीक्षा प्रक्रियेत निर्माण झालेल्या या गोंधळामुळे अनेक उमेदवार नाराज झाले. छत्रपती संभाजीनगर, कल्याण, वाशिम, हिंगोली यांसह राज्यातील विविध भागांतून उमेदवारांनी तांत्रिक अडचणींबाबत तक्रारी केल्या.
Tukaram Mundhe : ‘तुम्ही स्वतःला देव समजता का?’; एफडीएच्या कारवाईवर हायकोर्ट संतापलं
परीक्षेदरम्यान आलेल्या अडचणींनंतर उमेदवारांनी संबंधित प्रशासनाकडे आपल्या समस्या मांडल्या. मात्र, अपेक्षित तोडगा निघत नसल्याने काही ठिकाणी उमेदवारांनी आंदोलनाचा मार्ग स्वीकारला. छत्रपती संभाजीनगर येथे उमेदवारांनी ठिय्या आंदोलन केले. सीजेपीचे अभिजीत दीपके यांनीही परीक्षा देणाऱ्या उमेदवारांसोबत आंदोलनात सहभागी होत त्यांच्या मागण्यांना पाठिंबा दिला.
दरम्यान, या प्रकरणात राष्ट्रवादी काँग्रेसचे आमदार रोहित पवार यांनीही पाठपुरावा केला. परीक्षेतील तांत्रिक अडचणी आणि उमेदवारांच्या तक्रारींची दखल घेत त्यांनी न्यायालय प्रशासनातील वरिष्ठ अधिकाऱ्यांची भेट घेतली. परीक्षा प्रक्रियेत मोठ्या प्रमाणावर तांत्रिक अडचणी निर्माण झाल्याने सर्व उमेदवारांना समान संधी मिळाली नसल्याचा मुद्दा उपस्थित करण्यात आला. त्यामुळे १६ ऑगस्ट रोजी झालेली टंकलेखन चाचणी रद्द करून ती पुन्हा पारदर्शक पद्धतीने घेण्यात यावी, अशी मागणी करण्यात आली.
आमदार रोहित पवार यांनी मुंबई उच्च न्यायालयाचे महानिबंधक मुनगंटे आणि महाधिवक्ता मिलिंद साठे यांची भेट घेऊन या प्रकरणाची माहिती दिली होती. तसेच संबंधित टंकलेखन चाचणी रद्द करण्याची विनंती केली होती. उमेदवारांच्या तक्रारी, परीक्षा केंद्रांवरील तांत्रिक अडचणी आणि या प्रकरणातील पाठपुरावा यानंतर मुंबई उच्च न्यायालयाच्या प्रशासनाने १६ ऑगस्ट रोजी घेण्यात आलेली ऑनलाइन टंकलेखन चाचणी रद्द करण्याचा निर्णय घेतला आहे.
त्यामुळे आता संबंधित उमेदवारांना पुन्हा टंकलेखन चाचणी देण्याची संधी मिळणार आहे. मात्र, नव्याने परीक्षा नेमकी कोणत्या दिवशी आणि कोणत्या पद्धतीने घेतली जाणार, याबाबतची अधिकृत माहिती नंतर जाहीर केली जाणार आहे. मुंबई उच्च न्यायालय प्रशासनाच्या या निर्णयाचे आमदार रोहित पवार यांनी स्वागत केले आहे. परीक्षेत मोठ्या प्रमाणावर गोंधळ झाल्याचे निदर्शनास आल्यानंतर आपण संबंधित अधिकाऱ्यांची भेट घेऊन परीक्षा रद्द करण्याची मागणी केली होती, असे त्यांनी सांगितले.
तसेच १६ ऑगस्ट रोजी झालेल्या टंकलेखन चाचणीतील कथित गैरप्रकाराची उच्चस्तरीय चौकशी करण्यात यावी, अशी मागणीही त्यांनी केली आहे. नव्याने घेण्यात येणारी टंकलेखन चाचणी स्वतंत्र, पारदर्शक आणि कोणत्याही उमेदवारावर अन्याय होणार नाही अशा पद्धतीने घेण्यात यावी, अशी अपेक्षा त्यांनी व्यक्त केली. टंकलेखन चाचणी रद्द करण्याच्या निर्णयामुळे उमेदवारांना दिलासा मिळाला असला तरी पुढील परीक्षेची तारीख आणि परीक्षा प्रक्रियेबाबतच्या सूचनांची प्रतीक्षा आहे. त्यामुळे उमेदवारांनी मुंबई उच्च न्यायालयाच्या अधिकृत संकेतस्थळावरील पुढील सूचनांकडे लक्ष ठेवणे महत्त्वाचे ठरणार आहे. दरम्यान, नव्याने घेण्यात येणारी परीक्षा तांत्रिक अडचणींपासून मुक्त आणि पूर्णपणे पारदर्शक पद्धतीने पार पडावी, अशी अपेक्षा उमेदवारांकडून व्यक्त केली जात आहे.
