nagpur-bjp-pravin-datke-dj-ban-police-commissioner-vishwas-nangre-patil-badkas-chowk : बडकस चौकात डीजे वाजणारच’, प्रवीण दटकेंचा आक्रमक इशारा
Nagpur : गणेशोत्सवातील डीजे आणि लेझर लाईट्सच्या वापरावरून नागपुरात सुरू असलेला वाद आता पोलीस प्रशासन आणि स्थानिक भाजप नेत्यांमधील संघर्षाच्या दिशेने जाताना दिसत आहे. शहरातील कायदा-सुव्यवस्था आणि ध्वनिप्रदूषणाचा मुद्दा लक्षात घेऊन पोलीस आयुक्त विश्वास नांगरे पाटील यांनी १ नोव्हेंबरपर्यंत डीजे आणि लेझर लाईट्सच्या वापरावर बंदी घातली आहे. मात्र, भाजप आमदार प्रवीण दटके आणि शहराध्यक्ष दयाशंकर तिवारी यांनी या निर्णयाला विरोध दर्शवत पोलिसांच्या आदेशावरच प्रश्नचिन्ह उपस्थित केले आहे.
बडकस चौकातील दहीहंडी कार्यक्रमात डीजे वाजवणारच, अशी भूमिका प्रवीण दटके यांनी घेतल्याने हा वाद अधिक तीव्र झाला आहे. पोलिसांच्या बंदी आदेशाच्या पार्श्वभूमीवर दटके यांनी घेतलेल्या या भूमिकेकडे प्रशासनाला दिलेले थेट आव्हान म्हणून पाहिले जात आहे. त्यामुळे गणेशोत्सव आणि दहीहंडीच्या कार्यक्रमांमध्ये पोलिसांकडून या भूमिकेवर काय कारवाई केली जाते, याकडे आता लक्ष लागले आहे.
Uddhav Thackeray : २ कोटी मतदार वगळले; आता ‘मागच्या दाराने’ भाजप मतदार घुसवणार?
दरम्यान, डीजेबंदीच्या मुद्द्यावर नागपूर भाजपमधील अंतर्गत मतभेदही उघड झाले आहेत. पक्षाचे माजी महापौर संदीप जोशी यांनी डीजेच्या वापरावर कायमस्वरूपी बंदी घालण्याची मागणी केली आहे. ध्वनिप्रदूषण आणि नागरिकांच्या आरोग्यावर होणारे परिणाम यांचा हवाला देत जोशी यांनी ही भूमिका घेतली आहे.
संदीप जोशी हे महापालिका आयुक्त आणि पोलीस आयुक्त विश्वास नांगरे पाटील यांची भेट घेऊन नागपुरात डीजेच्या वापरावर कायमस्वरूपी बंदी घालण्याबाबत निवेदन देणार आहेत. त्यामुळे एकाच पक्षातील दोन प्रमुख नेत्यांच्या परस्परविरोधी भूमिकांमुळे भाजपमधील मतभेद अधिक ठळक झाले आहेत.
Rohit Pawar : ‘स्वाभिमान असता तर सत्तेच्या बाहेर गेले असते’; रोहित पवारांचा हल्लाबोल
दुसरीकडे, आमदार प्रवीण दटके यांनी डीजेबंदीच्या मागणीला तसेच पोलीस आयुक्तांच्या आदेशाला विरोध केला आहे. केवळ हिंदू सणांच्या वेळीच प्रशासनाला ध्वनिप्रदूषण आणि पर्यावरणाची आठवण होते का, असा सवाल त्यांनी उपस्थित केला. इतर धर्मांच्या सणांमध्येही अशाच प्रकारचे निर्बंध लागू केले जातात का, असा प्रश्न उपस्थित करत त्यांनी प्रशासनाच्या भूमिकेवर टीका केली आहे.
पुण्यात डीजेबंदीच्या मागणीवरून विद्यानंद बापट यांना मारहाण झाल्यानंतर हा मुद्दा राज्यभर चर्चेत आला. त्यानंतर मुख्यमंत्री देवेंद्र फडणवीस यांनी या विषयावर संयम बाळगण्याचे आवाहन केले होते. मात्र, नागपुरात भाजप नेत्यांमध्येच डीजेबंदीवरून परस्परविरोधी भूमिका समोर आल्याने हा मुद्दा अधिकच संवेदनशील बनला आहे.
एका बाजूला पोलीस आयुक्तांचा बंदी आदेश, दुसऱ्या बाजूला डीजे वाजवणारच अशी भाजप आमदारांची भूमिका आणि त्याच पक्षातील संदीप जोशी यांची कायमस्वरूपी डीजेबंदीची मागणी, या तिन्ही घडामोडींमुळे नागपुरातील राजकीय वातावरण तापले आहे. आता बडकस चौकातील दहीहंडी कार्यक्रमात डीजेच्या मुद्द्यावर प्रशासन आणि आयोजकांमध्ये काय भूमिका घेतली जाते, याकडे सर्वांचे लक्ष लागले आहे.
___
