vidhan-parishad-election-danve-card-thackeray-mva-conflict-bjp-seventh-candidate : महाविकास आघाडीत वाद; भाजप सातव्या उमेदवारीच्या तयारीत
Mumbai : महाराष्ट्रातील विधान परिषद निवडणुकीच्या पार्श्वभूमीवर राजकीय घडामोडींना वेग आला असून उद्धव ठाकरे यांच्या नेतृत्वाखालील शिवसेना (ठाकरे गट) कडून अंबादास दानवे यांचे नाव अधिकृतपणे जाहीर करण्यात आले आहे. आज उमेदवारी अर्ज भरण्याचा शेवटचा दिवस असताना सकाळी ११ वाजता दानवे विधान भवनात अर्ज दाखल करणार असल्याची माहिती समोर आली आहे. मात्र, या निर्णयामुळे महाविकास आघाडीत अंतर्गत नाराजी उफाळून आली असून विशेषतः काँग्रेस पक्षाने नाराजी व्यक्त केली आहे.
काँग्रेसकडून या निवडणुकीसाठी स्वतःचा उमेदवार उतरवण्याच्या हालचालींना सुरुवात झाली आहे. दिल्लीतून एबी फॉर्म मुंबईत पाठवण्यात येणार असून श्रीनिवास बिक्कड हे फॉर्म घेऊन येणार असल्याची माहिती मिळत आहे. याचबरोबर राज्यसभा निवडणुकीवेळी काँग्रेसने राष्ट्रवादी काँग्रेसला दिलेल्या पाठिंब्याची आठवण करून देत आता शरद पवार यांच्या गटाने काँग्रेसला पाठिंबा द्यावा, अशी मागणीही जोर धरू लागली आहे. काँग्रेसकडून राष्ट्रवादीशी चर्चा करून त्यांच्या मतांचा पाठिंबा मिळवण्याचा प्रयत्न सुरू असल्याचे संकेत आहेत.
Vidhan parishad election : विधानपरिषद निवडणुकीत ट्विस्ट; ठाकरेंकडून दानवे यांना उमेदवारी
दरम्यान, महाविकास आघाडीतील काही नेत्यांची भूमिका अशी होती की, या निवडणुकीत स्वतः उद्धव ठाकरे यांनीच उमेदवारी द्यावी. मात्र, मित्रपक्षांना विश्वासात न घेता अचानक अंबादास दानवे यांच्या नावाची घोषणा करण्यात आल्याने आघाडीत मतभेद तीव्र झाल्याचे दिसून येत आहे.
या पार्श्वभूमीवर भाजपनेही आपली रणनीती बदलत विधान परिषद निवडणुकीत सातवा उमेदवार देण्याची शक्यता तपासण्यास सुरुवात केली आहे. महाविकास आघाडीत सुरू असलेल्या मतभेदांचा फायदा घेण्याच्या दृष्टीने भाजपकडून हालचाली वेगाने सुरू आहेत. केंद्रीय पातळीवर अतिरिक्त उमेदवाराबाबत चर्चा होण्याची शक्यता सूत्रांनी व्यक्त केली आहे.
भाजपने यापूर्वीच सहा उमेदवारांची यादी जाहीर केली असून त्यामध्ये सुनील कर्जतकर, माधवी नाईक, संजय भेंडे, विवेक कोल्हे, प्रमोद जठार आणि प्रज्ञा सावंत यांचा समावेश आहे. या सर्व नावांना पक्षाच्या संसदीय समितीची मान्यता मिळाल्यानंतर अधिकृत घोषणा करण्यात आली आहे.
विधानसभेतील संख्याबळ लक्षात घेता सत्ताधारी महायुतीची स्थिती भक्कम मानली जात आहे. भाजपकडे १३१, एकनाथ शिंदे यांच्या शिवसेनेकडे ५७ आणि अजित पवार यांच्या राष्ट्रवादीकडे ४० आमदार असल्याने महायुतीचे एकूण संख्याबळ मजबूत आहे. त्यामुळे त्यांच्या आठ उमेदवारांच्या विजयाची शक्यता वर्तवली जात आहे.
दुसरीकडे महाविकास आघाडीचे एकूण संख्याबळ सुमारे ४६ असल्याने त्यांना केवळ एक जागा सहज मिळू शकते. विधान परिषदेच्या एका जागेसाठी २८ मतांचा कोटा आवश्यक असल्याने अतिरिक्त उमेदवार उभा केल्यास समीकरणे अधिक गुंतागुंतीची होण्याची शक्यता आहे.
या सर्व घडामोडींमुळे विधान परिषद निवडणूक बिनविरोध होण्याची शक्यता कमी होत असून प्रत्यक्ष लढत रंगण्याचे संकेत मिळत आहेत. महाविकास आघाडीत निर्माण झालेला अंतर्गत तणाव आणि भाजपची आक्रमक रणनीती यामुळे या निवडणुकीकडे राज्याच्या राजकीय वर्तुळाचे लक्ष लागले आहे.
