Pune mayoral seat likely to be reserved for an OBC male : ११९ जागांसह भाजपचे निर्विवाद वर्चस्व; २२ जानेवारीला निघणार आरक्षण सोडत
Pune पुणे महानगरपालिका निवडणुकीत भारतीय जनता पक्षाने ११९ जागा जिंकून ऐतिहासिक यश मिळवल्यानंतर आता सर्वांच्या नजरा पुण्याच्या नव्या महापौरांकडे लागल्या आहेत. आगामी २२ जानेवारी रोजी राज्यातील २९ महानगरपालिकांच्या महापौरपदाच्या आरक्षणाची सोडत निघणार असून, पुण्यात यंदा ‘ओबीसी पुरुष’ आरक्षण पडण्याची दाट शक्यता वर्तवली जात आहे. अशा परिस्थितीत, भाजपमधील दोन अनुभवी शिलेदार गणेश बिडकर आणि श्रीनाथ भिमाले यांची नावे आघाडीवर असून पक्षांतर्गत जोरदार हालचालींना वेग आला आहे.
१५ जानेवारी रोजी झालेल्या मतदानानंतर १६ जानेवारीला जाहीर झालेल्या निकालात भाजपला अभूतपूर्व यश मिळाले. एकूण १६५ पैकी ११९ जागा जिंकत भाजपने एकहाती सत्ता काबीज केली आहे. २०१७ ते २०२२ या काळात महापौरपद ‘खुल्या’ प्रवर्गासाठी (Open Category) होते, ज्यात दिवंगत मुक्ता टिळक आणि मुरलीधर मोहोळ यांनी जबाबदारी सांभाळली होती. नियमानुसार, मागील वेळी खुला प्रवर्ग असल्याने यंदा तो प्रवर्ग वगळून ओबीसी किंवा अनुसूचित जातीसाठी संधी मिळण्याची शक्यता आहे. त्यातही ओबीसी पुरुष आरक्षण निघाल्यास गणेश बिडकर आणि श्रीनाथ भिमाले हे दोन्ही नेते प्रबळ दावेदार मानले जात आहेत.
Mumbai BMC elections : मुंबईच्या महापौरपदाचा सस्पेन्स संपला; ‘अडीच-अडीच’ वर्षांवर शिक्कामोर्तब!
भाजपचे ज्येष्ठ नेते आणि माजी स्थायी समिती अध्यक्ष गणेश बिडकर यांनी यंदाच्या निवडणुकीत भाजपच्या विजयासाठी महत्त्वपूर्ण भूमिका बजावली आहे. त्यांना महापालिकेच्या प्रशासकीय आणि राजकीय कामकाजाचा प्रदीर्घ अनुभव आहे. शहराच्या विकास आराखड्यापासून ते आर्थिक नियोजनापर्यंत त्यांची चांगली पकड असल्याने, अनुभवी चेहरा म्हणून त्यांच्या नावाला विशेष महत्त्व दिले जात आहे.
दुसरीकडे, माजी सभागृह नेते श्रीनाथ भिमाले यांचेही नाव शर्यतीत आहे. भिमाले यांनी मागील अनेक वर्षांपासून पर्वती परिसरात भाजपचे संघटन भक्कम केले आहे. शांत आणि संयमी नेतृत्व तसेच पक्षाशी असलेली निष्ठा यामुळे त्यांच्या नावाचा विचार पक्षाच्या वरिष्ठ पातळीवर होऊ शकतो. भिमाले आणि बिडकर या दोन्ही नेत्यांचा महापालिकेतील कामाचा अनुभव पाहता, पक्षासमोर ‘पेच’ निर्माण झाला आहे.
Municipal Corporation Elections : सत्ता स्थापनेसाठी राजकीय डावपेच, भाजपच्या गळाला कोण लागणार?
केवळ ओबीसी आरक्षणावरच ही निवड थांबणार नाही. जर महापौरपद खुल्या प्रवर्गासाठी राहिले, तर भाजप शहराध्यक्ष धीरज घाटे यांचेही नाव स्पर्धेत आहे. घाटेंनी शहरात पक्षाला मिळालेल्या या मोठ्या यशात मोलाचा वाटा उचलला आहे. याव्यतिरिक्त महिला नेत्यांमध्ये मंजूषा नागपुरे आणि वर्षा तापकीर यांच्या नावांचीही चर्चा आहे.
येत्या २२ जानेवारीला मुंबईत होणाऱ्या आरक्षण सोडतीनंतर पुण्याच्या सत्तेचे चित्र पूर्णपणे स्पष्ट होईल. उपमुख्यमंत्री देवेंद्र फडणवीस आणि भाजपचे प्रदेशाध्यक्ष पुण्याच्या नव्या महापौराबाबत अंतिम निर्णय घेतील.
