maharashtra-ias-transfer-25-officers-major-reshuffle-collectors-municipal-commissioners : महत्त्वाच्या शहरांना नवे जिल्हाधिकारी आणि मनपा आयुक्त
Mumbai : महाराष्ट्र राज्य प्रशासनात मोठा फेरबदल करत राज्य सरकारने एकाच वेळी २५ आयएएस अधिकाऱ्यांच्या बदल्यांचे आदेश जारी केले आहेत. या व्यापक बदलांमुळे राज्यातील अनेक महत्त्वाच्या जिल्ह्यांना नवे जिल्हाधिकारी मिळाले असून महापालिकांमध्येही नव्या आयुक्तांची नियुक्ती करण्यात आली आहे. विशेषतः छत्रपती संभाजीनगर, नागपूर, कोल्हापूर आणि सोलापूर या महत्त्वाच्या शहरांमध्ये प्रशासनिक पातळीवर मोठे बदल झाले आहेत.
या फेरबदलात छत्रपती संभाजीनगरच्या जिल्हाधिकारीपदी विनय गौडा जी.सी. यांची नियुक्ती करण्यात आली आहे. नागपूर जिल्ह्याची जबाबदारी कुमार आशीर्वाद यांच्याकडे देण्यात आली असून कोल्हापूरसाठी डॉ. विजय राठोड यांची निवड करण्यात आली आहे. सोलापूरच्या जिल्हाधिकारीपदी कार्तिकेयन एस. यांची नियुक्ती झाली आहे. याशिवाय चंद्रपूर येथे वसुमना पंत, लातूर येथे डॉ. भारत बस्तेवाड, बुलढाणा येथे डॉ. प्रवीणकुमार देवरे आणि गोंदिया येथे डॉ. मंगेश गोंदवले यांना जिल्हाधिकारी म्हणून जबाबदारी देण्यात आली आहे.
महापालिका स्तरावरही महत्त्वाचे बदल करण्यात आले असून छत्रपती संभाजीनगर महानगरपालिकेच्या आयुक्तपदी अमोल येडगे यांची नियुक्ती करण्यात आली आहे. कोल्हापूर मनपात डॉ. राजेंद्र भारुड, अमरावतीत वर्षा लड्डा, सांगली-मिरज-कुपवाड येथे संजिता मोहपात्रा तर जालन्यात अंजली शर्मा यांची आयुक्त म्हणून नियुक्ती झाली आहे.
या बदल्यांमध्ये विविध महत्त्वाच्या पदांवर कार्यरत असलेल्या अधिकाऱ्यांची अदलाबदल करण्यात आली आहे. जी. श्रीकांत यांची बदली छत्रपती संभाजीनगर मनपा आयुक्त पदावरून जल जीवन मिशनच्या मुख्य कार्यकारी अधिकारीपदी करण्यात आली आहे. दिलीप स्वामी यांना जिल्हाधिकारी पदावरून महाराष्ट्र राज्य बियाणे महामंडळात व्यवस्थापकीय संचालक म्हणून नियुक्त करण्यात आले आहे. वर्षा ठाकूर-घुगे यांची बदली लातूर जिल्हाधिकारी पदावरून मुंबई येथील एमआयडीसीमध्ये सह-मुख्य कार्यकारी अधिकारी म्हणून करण्यात आली आहे.
दीपक सिंगला यांना पुणे येथील पीएमआरडीएमधून मनरेगा आयुक्त पदावर नागपूर येथे पाठवण्यात आले आहे, तर के. मंजुलक्ष्मी यांची बदली कोल्हापूर मनपा आयुक्त पदावरून पीएमआरडीएमध्ये करण्यात आली आहे. डॉ. किरण पाटील यांना बुलढाणा जिल्हाधिकारी पदावरून पशुसंवर्धन आयुक्त म्हणून पुण्यात नियुक्त करण्यात आले आहे.
तसेच प्रजित नायर, अंकित, सत्यम गांधी, मिन्नू पी.एम., जास्मिन आणि कृष्णकांत कन्वरिया यांच्यासह अनेक अधिकाऱ्यांच्या जबाबदाऱ्यांमध्ये बदल करण्यात आले असून जिल्हा परिषद आणि महानगरपालिका स्तरावर नवीन नेतृत्वाची संधी देण्यात आली आहे.
Akola civil line police : शरिरसुखाची मागणी करणारा पोलिस निरीक्षक न्यायालयीन कोठडीत
या व्यापक फेरबदलामुळे राज्यातील प्रशासन अधिक गतिमान आणि कार्यक्षम करण्याचा सरकारचा प्रयत्न असल्याचे मानले जात आहे. नव्याने नियुक्त झालेले अधिकारी संबंधित जिल्ह्यांतील विकासकामे, प्रशासनिक सुधारणा आणि नागरिक सेवा अधिक प्रभावीपणे राबवतील, अशी अपेक्षा व्यक्त केली जात आहे.
