dadar-protest-viral-video-opposition-alleges-misconduct-with-student-rohit-pawar-reaction : रोहित पवारांसह विरोधकांची कठोर कारवाईची मागणी
Mumbai : मुंबईतील दादर येथे विद्यार्थ्यांच्या आंदोलनादरम्यान समोर आलेल्या एका व्हिडिओमुळे राज्यातील राजकीय वातावरण तापले आहे. सोशल मीडियावर व्हायरल झालेल्या या व्हिडिओमध्ये सिव्हिल ड्रेसमधील एक पोलीस कर्मचारी महिला आंदोलकाला पकडून खेचत असल्याचे दिसत असल्याचा दावा विरोधकांनी केला आहे. या घटनेनंतर काँग्रेस आणि राष्ट्रवादी काँग्रेस शरदचंद्र पवार पक्षासह अनेक विरोधी नेत्यांनी पोलिसांच्या कारवाईवर गंभीर प्रश्न उपस्थित करत संबंधित कर्मचाऱ्यावर कठोर कारवाईची मागणी केली आहे.
दिल्लीप्रमाणेच महाराष्ट्रातील विविध शहरांमध्येही नीट पेपरफुटी आणि शिक्षण व्यवस्थेतील कथित गैरव्यवहारांविरोधात विद्यार्थी आणि युवक रस्त्यावर उतरले होते. या आंदोलनादरम्यान पोलिसांकडून आंदोलकांना ताब्यात घेण्याच्या कारवाईचे अनेक व्हिडिओ सोशल मीडियावर व्हायरल झाले. त्यापैकी दादर येथील एका व्हिडिओवरून मोठा वाद निर्माण झाला असून, महिला आंदोलकासोबत गैरवर्तन झाल्याचा आरोप करण्यात आला आहे.
Sonam Wangchuk : २६ दिवसांच्या उपोषणानंतर सोनम वांगचुक यांचा मोठा निर्णय
काँग्रेसच्या मुंबई अध्यक्षा वर्षा गायकवाड, राष्ट्रवादी काँग्रेस शरदचंद्र पवार पक्षाचे आमदार रोहित पवार आणि आमदार जितेंद्र आव्हाड यांनी हा व्हिडिओ सोशल मीडियावर शेअर करत पोलिसांच्या कार्यपद्धतीवर टीका केली आहे. विरोधी नेत्यांचा आरोप आहे की, आंदोलनादरम्यान महिला आंदोलकाला एका पुरुष पोलीस कर्मचाऱ्याने अयोग्य पद्धतीने पकडून धक्काबुक्की केली. या प्रकरणाची निष्पक्ष चौकशी करून संबंधित कर्मचाऱ्याला निलंबित करण्याबरोबरच त्याच्यावर विनयभंगाचा गुन्हा दाखल करण्याची मागणीही त्यांनी केली आहे.
व्हिडिओ सोशल मीडियावर शेअर करत आमदार रोहित पवार यांनी तीव्र शब्दांत संताप व्यक्त केला. त्यांनी आपल्या पोस्टमध्ये संबंधित पोलीस कर्मचाऱ्यावर कठोर कारवाई करण्याची मागणी करत, महाराष्ट्र पोलीस दलाची प्रतिमा अशा घटनांमुळे मलीन होत असल्याचे म्हटले. त्यांनी संबंधित कर्मचाऱ्याला तात्काळ पोलीस दलातून बडतर्फ करून त्याच्यावर विनयभंगाचा गुन्हा दाखल करण्याची मागणी केली. अशा प्रकारच्या वर्तनामुळे संपूर्ण पोलीस दलाच्या प्रतिष्ठेला धक्का बसत असल्याचेही त्यांनी नमूद केले.
आमदार जितेंद्र आव्हाड यांनीही या घटनेचा निषेध करत पोलिसांच्या कथित अतिरेकावर सरकारने नियंत्रण ठेवावे, अशी मागणी केली. तर वर्षा गायकवाड यांनी महिला आंदोलकासोबत झालेल्या कथित गैरवर्तनाचा निषेध करत, महिलांशी अशा प्रकारची वागणूक अस्वीकार्य असल्याचे म्हटले.
या व्हिडिओच्या पार्श्वभूमीवर संबंधित पोलीस कर्मचाऱ्याविरोधात अधिकृत तक्रार दाखल झाली आहे का, तसेच मुंबई पोलिसांकडून या प्रकरणाची चौकशी किंवा कारवाईबाबत कोणते अधिकृत स्पष्टीकरण दिले जाते, याकडे सर्वांचे लक्ष लागले आहे.
