आर्वीत ‘देश बचाओ, व्होट बचाओ’ मोहिमेचा आढावा; नवीन नोंदणीसह याद्यांच्या सूक्ष्म तपासणीवर भर
Arvi : लोकशाही व्यवस्थेत प्रत्येक पात्र नागरिकाला मतदानाचा अधिकार मिळणे आवश्यक असून, कोणताही मतदार या मूलभूत अधिकारापासून वंचित राहू नये, यासाठी काँग्रेसने मतदार यादी तपासणी आणि नवीन मतदार नोंदणीवर लक्ष केंद्रित केले आहे. याच पार्श्वभूमीवर प्रदेश काँग्रेस कमिटीच्या वतीने आर्वी येथे आढावा बैठक आयोजित करण्यात आली होती. प्रदेश काँग्रेसचे महासचिव अनंत मोहोड यांच्या प्रमुख उपस्थितीत झालेल्या या बैठकीत मतदार याद्यांच्या पडताळणीसह पक्षाच्या संघटनात्मक जबाबदाऱ्यांबाबत पदाधिकाऱ्यांना मार्गदर्शन करण्यात आले.
काँग्रेसच्या ‘देश बचाओ, व्होट बचाओ’ या मोहिमेच्या अनुषंगाने गावागावांतील मतदार याद्यांचे बारकाईने निरीक्षण करण्याचे निर्देश यावेळी देण्यात आले. मतदार यादीतून कोणत्या पात्र नागरिकांची नावे वगळण्यात आली आहेत, याची माहिती तातडीने संकलित करावी. तसेच, नव्याने मतदानासाठी पात्र ठरलेल्या नागरिकांची नावे मतदार यादीत समाविष्ट करण्यासाठी आवश्यक प्रक्रिया पूर्ण करावी, असे मोहोड यांनी स्पष्ट केले.
विशेषतः नवीन मतदारांच्या नोंदणीसाठी ‘फॉर्म क्रमांक ६’ भरून घेण्यावर भर देण्याच्या सूचना त्यांनी दिल्या. गावपातळीवरील पक्ष कार्यकर्त्यांनी आपापल्या मतदान केंद्रांच्या कार्यक्षेत्रातील मतदार याद्यांची नियमित तपासणी करावी. कोणत्याही पात्र मतदाराचे नाव चुकीने किंवा विनाकारण यादीतून वगळले जाणार नाही, याची दक्षता घ्यावी, असेही त्यांनी सांगितले.
महसूलमंत्री बावनकुळे आणि अनंतराव देशमुखांमध्ये स्नेहमिलन भेट राजकीय चर्चांना उधाण!
मतदार नोंदणीच्या प्रक्रियेदरम्यान तांत्रिक अडचणी किंवा अन्य समस्या उद्भवल्यास त्या प्रलंबित न ठेवता संबंधित प्रमुख पदाधिकाऱ्यांशी तातडीने संपर्क साधावा. मतदारांच्या हक्कांचे संरक्षण करण्यासाठी स्थानिक पातळीवर समन्वय ठेवून काम करणे आवश्यक असल्याचे मोहोड यांनी अधोरेखित केले.या आढावा बैठकीला आर्वी, आष्टी आणि कारंजा तालुक्यांतील काँग्रेसचे प्रमुख पदाधिकारी उपस्थित होते. आगामी काळात मतदार यादी पडताळणी आणि पात्र नागरिकांच्या नावनोंदणीसाठी पक्षाच्या कार्यकर्त्यांनी सक्रिय सहभाग घ्यावा, असे आवाहन यावेळी करण्यात आले.मतदार यादीतील अचूकता, नवीन मतदारांचा समावेश आणि मतदानाच्या अधिकाराचे संरक्षण या मुद्द्यांवर लक्ष केंद्रित करून काँग्रेसने या मोहिमेच्या माध्यमातून स्थानिक पातळीवर कामाला गती देण्याचा निर्धार व्यक्त केला.
____








